Open Letter to Phungzathang and V Hangkhanlian

Azahtak huai pute,
Pu Phungzathang Tonsing
Pu V. Hangkhanlian

Gam-leh-nam itna ziak a na kipiakna uh (mipi palai dia MLA na hong hihna uh) thupi sa in phathuai ka honsa pet mah hi. Gam-le-Nam a dia kipiak chih pen a thu in nuamsim bangmah leh a taktak a lungsim tawng a kipia a, mahni angmasial hetlou a “Ken ka tan kei leh, ka min a siat leh leng, sihna tan hial tuak mah leng, ka mi kasa ten a tan ua, nek ding a neih ua, ka nam in min hoihna a tan a, huan ah ka Gam-le-Nam a dia hinna/hoihna ding ahih nak leh,” chi a kipe te a din thil baihlam ahi kei ding chih a theihtheih hi. Tulel din mun in Manipur a Zomi te a deuhkholin Paite-Zomi Churachandpur District a omte a din ka lei Pathian taktak na hi uhi. Pu Pa khang a i na luah sa uh LAMKA (Manipur Sorkar in hon Cheptehsak dan in Churachandpur) Ka Gam ka Inn i chih theihna uh omsun a palai hihna len a vaihawmtu na hih ziak un, zahtakna ka hon pe masa hi.

Tulai khovel huih hongnun dan a kidang ta mahmah mai a, nidang apan i na neih gige gal muanna in i gamlei a taihsanna a sawtta hi. Solkal vaihawmna khuampi pukse dimdem a, ei sung leh ei sung ki gensiat na, ki hazatna leh ki khenna huihte hong nung zel ten bang lam peuh ah kiat niamna a hontut ziak in a liangvai Zomi te kahtam hon lousak zel hi. Ei kituahlouh ziakin i kim i vel a nam dangte nui kawm hiauhiau a khut beng kawmin ei SA BAAK tan ding te hon tansak zel uhi. Hichibang huih hongnung zel mahleh, Pu Thang leh Pu Lian aw, Zomi liangvai te na itna uh leh Gam-le-Nam na khaulna ziak ua “Lungkituak a, na kal suan uh..... na khut vei uh.....et lawm na e, et lawmna e, et lawm hina maizen e maw.

A hamphathuai mahmah, Pathian hehpihna ziak a na tan uh Pu Lian, MLA na hong hih tung apat in District incharge hihna na hon len ngal a, huchi in Pu Thang in tu dong District incharge hihna na len lai hi. Pu Thang, tu in nang bang, Manipur kia hilou Mizoram ah leng Pathian in dinmun lian zo in hon vok kaitou a kipah na lian mahmah. A ruling Govt a ompeuh mahin Cabinet na tang zel ua, opposition a om pen inlah opposition lam a patin Powerful takin thu vek thei dinmun in na om uhi. Hiai Power na tawi tuak uh kithutuaktak a zangkhawm a civil organisation tuamtuam in a hon za thuap chiangun i Gam muh theih in hongkhang a, a liangvai na mi nasate nunnuamin lambang ka pak uhi. Khat veivei dawimang simthu hia, singdang simthu, sum-le-pai deihna ziakin, thukhat-sakhat satkhawm theilou in na hong omthei zel ua, tua chiangin nou Powerful tuaktuak na hih ziakun, alangtuak (opposite direction) a hong kiphut tuah khak chiang in, muh di omteng hong kithehzak a, Zomi te lak ah a nengthem leng a tukha kei a, a neng kithehzakte singdang in a na hamphatpih uhi. Aana mahmah a theihsiam a haksa mahmah. Nougel Government a ka heutute uh na pankhawmna ziak uh leh Civil organisation tuamtuamte toh pankhawmna ziak ua i Gam uah thil omthak tampi muh theih in a om, kipahhuai petmah. Tuni in Development omte tam law mahmah a hih chiang in, gen ka hon sawm kei hi. Himahleh hiai a nuai a point ka awlmoh mahmah tamlou ka hon kum ut hi.

CCPur AIR Link Language
Pi-le-Pute’n ana sat uh Lamka khopi ei a ahi. I khopi neihsun i it a, i suang a, i kisak theihpih hi. Nam tuamtuam tengkhawm in, ei Paite pau zang in michih kituaktak in ina khosa khawm uhi. Himahleh, bangtan hiam paita apat damtui luang dialdial bang a i kituahna hong kitamkham a, chi leh kuang a hamhaih tak a khanlohna hongpiang hi. CCPur AIR a link language dia Paite pau dia order omsa hi zenpi, Kuki Civil Organisation khenkhat ban ah Unau Kuki MLAte leh Kuki MP khenkhat in ana nan ziak un Govt in Order omsa a zukik hithet, chih ka na zakha a, na kasa pet ah a, ka hatang a thak tuntun hi. En unau, unau i chih lai in i sanggamten i ngawng hon tansak geih uh hi mailou hia maw, a na mahmah mai. Hiai ka thuzak dik din ka gingta, order suah nung kum giat (8) bang ching ding hita; tutan order a om thak nai kei!

Thu ka zak beh danin i lawmten Meitei pau peuh, English peuh CCPur AIR Link Language din hi hen chi in dolkhat peuh khia uh hileh ki lawm hi. Pute aw, Meitei pau leh English pau a thei Lamka leh a sehvel ah i tawm mahmah uh chih noule na theih uh ka gingta hi. Huan ah, Meitei pau i zak nopleh Imphal AIR station ah hek khiat theih a, huan ah English i zak nopleh Khovel pumpi ah station hekhiat ding a pum dim hi. Ahihleh Pute aw, Paite pau i hekhiat nop leh koi mun station apat i hek khe ding ua? Station hekkhiat na ding i nei kei uh, hiai CCPur AIR Station a i hekhiat ding dan nou na honhih kei ngal uhleh! CCpur District ah pau i ki theituah vek ua, huan ah Paite pau a tualleng pen chih leng, ei chauh hilou in Manipur Govt inleng a thei mahmah hi. Phualpi solkal in tribal language kepbitna a awlmoh mahmah lai a i sanggamte khenkhat leh Manipur Sorkar in English hiam Meitei pau hiam va zatding chih thil hi thei hetlou ahi.

Pute, nou leng hiai toh kisai in, hun paisa ah pan naktak in nana la uh chih ka thei a huaiban ah tu in leng naktak in na la lailai ding uh chih ka gintak ziak in ka lung a nuam tuam deuh hi. Order omsa, min a phel zoh leh en leng i phelkik thei veve hi, chih ginna ka nei tinten hi. Huai ding in, Pu te aw, nougel mah na poimoh masa pen ua, nougel na pankhawm nak uhleh kuamah hon nangzou ding a om kei uh! Lungkham kei un, mipin na nung uh hon thuap mahmah din ka gingta hi. Nak zosem in aw, Pute, nougel loungal lamet ka nei kei....

Guite Road
Kum 1980 leh chihvel in in, Pu Thang, nang mengmuhna lianpi na neih ziakin Singngat leh Tuivai kikal lampi bawl khiat ding, huan ah lampi hoih taktak na deih ziakin PWD khut a piak khiat ding lemsalou in BRO te nana kai khe teitei hi. Kipahuailua, kumsawtpi lampi hoihtak i neih uhi. Manipur a om Zomi te a din hiai GUITE ROAD hinna gui i neihsun uh a hong suakta hi. Himahleh kum bangzah hiam paita apatin hiai Guite Road in lampi hoihni a mu ngei nawnkei ahi; tuktui luangzek lelah lampi paisuak theihlouh chih hi gige, khallai hi lelah leivui khulua chih hizel! Hiai in a honmuh sak hi a ka theih a hihleh Zomi te i hinna sisan gui uh tan dekdek, hongtan leh si eu-ou mai ding ihi. Hiai lampi a hongtan a i sih hial ma un lampi bawl hoih ding himailou di hia maw, Pute?

Hiai lampi a hoihna dia a bawltu din Students Organisation teng, Civil Organisation teng ban ah ka theih khelh keileh Gam-le-Nam itna ziaka thautawi ten leng BRO te mah in a bawl ding uh ahi chi in a hahpan thei mahmah ua, huan ah nou gel bang inleng BRO mah ding a hi na chi uh, chih thu kaza hi, kipahhuailua. Huai ban ah Manipur Chief Minister hial inleng BRO in Guite Road a bawl ding ahi chi in thukhun Student te toh a na bawl uhi. A thu a poimoh teng kimvek himahleh BRO in la ngeilou - bangziak ahi deh aw, deihna taktak toh i panlouh ziak ahi diam? Huchi kawmkal ah PWD bang in widening chi in Rs 20 crores bang bei in a na bawlta uh! Maizen, Rs 20 crores bei a lampi PWD in a bawl hichitel, hichitel lawmlawm! A siat dan genngailou in i thei vek uhi. Lampi hoih deih huailua hilou maw, Pute.

Pu Thang leh Pu Lian, nougel loungal Guite Road bawldia BRO te sam khethei ding a omkei; lampi hoih i deih leh, PWD te nasep lah a hoih louh dan i theih sa ahi ta. Huan ah nougel mahin hoihtakin PWD official/Contractor te kiang ah, lampi hoihtak Guite Road a deih huai ziakin, kigolh nawn mahmah kei un, chi le uchin, a maule Gam-le-Nam it ngen ahi ua, kuaman a honsel uh ka gingta kei hi. Thu kana zaktei dan in, BRO in next financial year (2009-2010) sung in hiai Guite Road nnasepna amau khut a lak a lunggulh thu uh, lehkha in a gelh uh chih thu kaza kha hi. Pu Thang leh Pu Lian aw, khut kilen helhel in Zomi nam na khualna ziak un Delhi tual ah ah va hoh unla, BRO te Guite Road bawl din va pi ve ua maw? Pute, Zodawn mizawng genthei ten nou te a honsam chiachiai uhi.

Pherjawl ADC
Zomi khangthu a mun poimoh mahmah ana luah leh i khopi suan mahmah Thanlon a ADC pen mansuah in, Pherjawl in ana tangta hi. Thei siamlou leh khem chavaih a om kisa in, lu a ki khuat viai lel a, hihtheih dang bangmah a omkei hi. Hiai thu bang leng, Zomite maban ding hoihtak Govt leh Nam heututen na gel uh hingei din ka lamen (mimaltaka theihsiam haksa sa kawm pipi in). Hoihzawkna dia sep tutan in kithei naikei mahleh a hong kisep khiat pah nou te tungtawn in lametna lianpi ka nei hi.

Delimitation
2007 kumtawp lam leh 2008 kumbul lam in India Gam pumpi Constitutency Delimitation in naktakin a hon nawk hi. Ei tenna Manipur bang a hon hah nawk petmah a, adiak in ei Churachandpur bang, meikuang ding a hongbang hial hi. Hiai Constituency Delimitation draft proposal bang hong paisuak hileh, kei a na suangtuah dan leh ka Zomi pih tamtakte muh dan in, i district in tulel a MLA 6 i nei ua, tuate lak ah Zomi in MLA 4 i neihtheihlai in 2 in kiamsuk ding a, unau Thadou-Kuki leh Hmar in 1 tuak neihbeh in 2 tuak neita ding un kilang hi. Hiai in tulel a Zomi nomenculture pom te lak ah MLA election vai in, naktakin a hon nawk dingin ki lang hi. (Zomi sung ki nawktuahna leh Tribe bing a kimelmak na tan hontun theih ding a gintak huai hi). A ziak a hihleh, Singngat ah Zou Tribe ching nawnlou dia, Paite tribe ching thei ding (Thanlon Constituency mang hithet ding a hih ziak in). Huaiban ah, Henglep Constituency ah Vaiphei Tribe ching nawnlou ding bang hi. Zomi political movement pailel pen, i unau dangten hon nuai chimit sawmna uh hi dia, zeldim thu bawl theih mawk hi (Zomi political movement in MLA election tan lel a tum chihna hilouin, ei a Zomi te mahmah MLA election a i lunglut luat ziak un).

Huchi bang hileh, “Paite (Zomi chih bangle hong ging nawnlou phial dia ka gintak ziakin, MLA vai lel et in), Thadou-Kuki leh Hmar” kikal a kikantuahna nasa takmai hongpiang ding a, a kikim ngen, a hatzaw sam omlou in namkal buaina hong piangtou ding bang hi (Tulel a Zomi in MLA 4 nei in a dangten 1 tuak a neih lai ua leng policy tamtak a zoulou i hi dua aw, chih theih tampi a om ziakin). Ahihkeh, a sezaw sem ah, i hihna leh imun-imual tanpha mansuah a, nawmvalh a om din kilang thei bang mawk hi.

Hiai Delimitation Committee, Manipur ah ei Churachandpur District a pat a member din Pu Thang, nangkia na pangpha zou a i hamphatna sawnsawn uh ahi. Hiai Delimitation proposal deihlouhin nougel mah a guk in naktakin na pang uh chih, mi hongen sawn ka zak manin kipahhuai kasa hi. Na pankhawmna gah uh leng ahi ngei dia, Manipur ah Delimitation thak zat hilou ding chih order a hong suak, Kipahhuailua chihlouh ngal gending ka thei kei hi. Na pankhawmnate uh ziak a i gam adia na thupi takmai nana sepkhiat te uh, mipite’ lunglai ah mangngei lou ding hi. Na tung uah ka kipak lua uh, na honna hotdam tak ziak un.

Pute, maban ah panlak ding tampi om hi in ka thei hi. Ki dotna masa, bangziaka hiai a tung a Delimitation draft proposal ei a dia valh haksa mahmah hong pawt ahi dia? Hi dia ka gintak khenkhat, i u naute te leh Meitei te policy bawl bang leng ahithei mai diam? Nihna ah, ei lawi in Census pibawl lou law mahmah, hiai in factor poimohtak len kha a hiai, a taktak sang a Census a i tawm zawk ziak uh ahi diam? Thumna ah, Voter ID bawl ding bangleng limsaklou law mahmah, MLA election om ding chiang a pi bawl sim, (a kikhel nung pi a) Voter ID nei i tawmluat ziak uh ahi diam? Lina ah, MLA election om ding chiang a, ei deih candidate te a dia nakpan theilua in, ei lam a pang dia gintak chiah louhte, i mi i sa ngoihngoih gentak louh i innkuan pih te bang leng, Voter List a pat a min thai mang, i chin sek ziak uh ahi diam? Thudang a omkei leh Kum 2026 in Delimitation om thak nawn ding a, hiai hun a tua i lungkham bang a lungzing tak a i om nawnlouhna ding leh i Zomi nam itna ziakin tu apat a lam tuamtuam a pan i lak uh poimoh mahmah ta hilou hiam? Hiai panla din, Pute, nou mah na hong kipat khiat masak ua, i nam sung vai pawte toh na hong pankhawm un thupi gen pendin ka lamen hi.

District Sports Complex
Churachandpur District in Sports Complex lungulhna lianpi i nei ua, a biktakin kum bangzah hiam paita in New Lamka in New Lamka Youth Club min in Sports Complex mun ding lei khiat teitei sawm in naktak in pan honla ua, vengsung leh pua ah sum khon chihtak in khon uhi. Kithalawp tak a a pankhawm lai un leng a deih chia uh lei khe zoulou ding un ki lang uhi. Himahleh hiaihun in, Pu Thang, nang minam na khual na ziak liauliau in, sum kisam omlai teng na hukdim sak a, Pathian panpihna toh Sports Complex a min ding PT Sports Complex ding leikhiat a hong hi ta. New Lamka mipi nna kimkhat zoh bang a ki ngai in, kipakpet mah in a om ua, a gamte Government a piak khiat a Sports Complex bawlsak din nou te tungtawn in pan a honla uh hi. Ka thu zak dan in, nougel hah panna ziakin, Sports Minister leh a Official team te ban ah Chief Minister mahmah in leng hiai PT Sports Complex mun a District Sports Complex bawl khiat ding, chih hoih a sa mahmah uh, chih ka za hi. Hiai te ziakin New Lamka kho mipi gentaklouh Sports a lunglut tamtak nuih mai heuhau in om uhi.

Huchi in, NLYC in Silver Jubilee lopna thupitak a a neih lai un, Chief Minister leh Minister tuamtuam in thuhoih pipi a gen khia ua, huan ah, Pu Thang, nang mahmah in CCPur ah District Complex mun nih ah om ding, chih na hon gen khia hi - khat Tuibuang leh khat New Lamka ah! Ka lung hon kam khat a om, ei district neu chik ah Government in District Sports Complex muh nih ah bawl ut taktak ding ahi diam, ka chi hi. Huan ah tu’n PT Sports Complex nasep pailel in a om hi, himahleh a budget ban ah kimawlna bangzah kibawl ding chih leh State hia ahih kei leh Central Government a fund pe tu ding chihte chiangtakin tak khiat in a om nai kei hi in ka thei, a nnasepna bel pai dan in om mah leh!

Huchibang kal ah, State Govt in chiang tak in thil bangkim fel takin DoNER kiang ah Churachandpur a District Sports Complex, Tuibuang a bawl ding in thupukna la in, tu in DoNER in a formalities ngaklel dan in om hi. Hiai Sports Complex Rs 20 Cr val a bawl ding chih ahi. Rs 24.755 crores vel bei dia hisap, District Sports Complex in 10,000 capacity Main Stadium, Indoor Stadium, Kho-kho/Volleyball/Kabaddi playfield, Basketball Court, Swimming Pool, 80-bedded sports hostel(30 girls+50 boys), staff quarter (8 units), chowkidar quarter, gate li (4), drain, generator house, pump house, flexible pavement, water supply system, electrical substation lengtel ding hi.

Pute, Sports Complex deih a chiauchiau mipite kipiak khiatna (a gam lei khia uh) khualna in District Sports Complex New Lamka ah om thei lai mahmah din ka gingta, himahleh hiai din kin a kin a na hong pankhawm ua, nasep pah poimoh hi.

Post Office leh Fire Station
Hun sawt pek a kipan buaina bang mah om hetlou a, Lamka mipi te adia thil phattuam tam tak sem khia a ana omtou, post office leh fire station te a omna mun uh khopi laili mahmah na mun apan Tuibuang a suankhiat suk in a om uhi. Bangziak a hiai mun poimoh mahmah te khopi nawl khat a suankhiat a ommawk ahi ua, chih kithei bunlou hi. Solkal office leh mun poimoh te Tuibuang a suansuk pen district administration a dia lemtang zaw ahi diam, chih dotna piang thei hi. Indian constitution in solkal office te mun/veng khat a binkhawm teitei a ngiat lam a kitheikei a, huaimah bang in, India gamsung state leh district tuamtuam te ah leng solkal office te mun/veng khat ah a omkhawm teitei tuankei hi. Mipi nautang nasem ahih man un hiai bang office te Lamka khopi laili mun a a om uh lunggulh huai hi.

FCI Godown
Churachandpur District adia FCI Godown i lungulh mahmah ua, huan ah tua Mautaam kialpi ziak bang in ei District ah hong om thei leh chih mitamtak apatin lungulh huai thu a kiza hi. Manipur State Govt bang in FCI Godown thu Central ah a ngen ut hetkei mawk uh, chih thu bang kana za sawnsawn a poi kasa mahmah. Himahleh mimal bangzah hiam leh Civil organisation khenkhat leh noute pankhawmna te ziakin tun 2,500 MTs capacity FCI Godown ei District a bawl ding chih FCI apat in order a hongsuakta, kipahuai petmah. Hiai thu a hong omphetin DC in Thingkangphai ah mun a recommend pah a Imphal lam ah khak suk pah chih thu kiza hi. Aw...bang doh ai hiam, hem simthu hia, State Govt nasan in FCI ei District a dia a ngen utlouh uh himahleh ei te pankhawmna ziak a a gah muhtheih dia a hong omtak in, mipi leh DC deih na mun nelhsiah in suanlam tuamtuam bawl in Koite mun lam a din Imphal lam thu neiten a na bawl zel uh! Imphal lamte ut leh tup hi dia ka gintak ahih leh, tunung chiang a antang hongpai ding te a helpawl te un ut dandan a control thei ding, ban ah amau thuthu a vai a hawm theih na ding ua Divide and Rule policy hon zang in, a thu omlou pi in Zomi leh Kuki hon kingeu etsak zel tel uhi. Genthei leh liangvaite khualna leh antang ei lak a hoihtak a a hongtun theih na din, Pute, nou gel mah in kintak a pan na honlak khawm kei uleh hiai FCI Godown le i gilpi ua patin singdang in hon sawk khiatsak zel tel ding uh lauhhuai kasa hi. Nougel loungal a pang thei a omkei......

Thukhitna
Hiai a tung ah points bangzah hiam ka awlmoh thu ka hon gen khia, (ta in thil deih tampi a nei a, himahleh a man hih theih bangmah neilou a hih ziakin, a pa kiang a gen, bang deuh in) ken leng kei mimal vai hilouin ka mi ka sa Zomi te khualna in ka hon genkhia a, na panpihna uh ka hon ngen hi. Huan ah maban ah leng i pankhawm uhleh i tan ding uh thiltampi etsakna din - Mini Secretariat, Airport, Tourist Center, Park, Hill University leh a tuamtuam gensenglouh tampi a om hi. Pute, nougel Gam-le-Nam itna ziak a Lungkituak a thu-khat, la-khat na hon sat khawm nak uhleh (Civil Organisation tuamtuam inleng na thu uh a hon zui duamduam ding ua) i Zomi pih MLA dangten na thu uh a hon nial kei ding ua, huan ah midang MLA ten leng a hon kalh kei ding uh. Hichileh Manipur Govt bang inleng na thu uh a hon zahtak ding ua, State a pat gentaklouh Central Govt bang ah leng i tui tum mahmah ding uhi. Tua bang a i pankhawm nak uh leh, kana theih dan in Manipur polam ah i mi i sa tampi a om ua, a biktakin Delhi bang ah mi zat theih ding om mahmah ding in ka um tinten hi, i Gam-le-Nam a ding a hih nak leh. Pute aw, Pathianin honvualzawl ut mahmah din ka lamen, tua ding in ei i kituah a i pankhawmna uh poimoh masa pen hin ka thei hi. Pute, ka gen khelh a om lehleng Gam-le-Nam itna ziak a lampi dik a na honpi uh ka ki nem hi.

Gam-leh-nam itna toh,

Thangmuanlian Zomi
Lamka
21/12/08