A beisa hun in Kawlgam sungah ki lemna om ding deihna tawh a
hunhun in gam-uk kumpi a semte zong a mau deih lampi tawn in na hanciam zelzel uh
hi. Galkap kumpi in zong gamsung ah kilemna a om ding leh gam khantohna ding
paulap mah in a mau uk hun sungin gam nuai bel thautawi a minam nasem kipawlna
tampi tawh suaikai ( letmat thuh) ngei khin zo uhhi. 2010 kum a Kawlgam kitelna
pan a kitel cing Union Solidarity and Development Party ( USDP) min pua kumpi
in zong na hanciam leuleu a thautawi leh thau tawilo minam nasep tampi tawh
kimu in kikupna a neih khit uh ciangin hamphatna deihdiak kipawlna pawl khat
tawh suaikai ( letmat thuh) leuleu uhhi. Gam sungah kilemna leh khantohna ding
paulap in thu kikupna khawmpi a kineih zelzel hangin gam leh minam metna (
interest) sangin mimal (individual) leh mi pawlkhat ( elite ) bek metna ding
deihna hi den kei a hih manin thu hoih tawh mual kikhup zo ngeilo hi. Tutungin
leitung bup leh Kawlgam sunga mi zahtak Daw Aung San Suu Kyi in makaih ding a
hih manin minam leh gam a ding hoihna tampi kigen thei ding leh ki sem khia
thei ding cih lam-en i hih manin i gam a dingin mual dawn ni suak mah hong bang
ta hi.
Kawlgam sungah kilemna leh gam hoihna ding i gen a, i sem
zongin i gam sunga buaina bulpi ( roots of problem) i puah or i sian sak kei
leh kilemna leh gam daihna taktak ki ngah ngeilo ding hi. A diak in thu khunpi
tawh kisai buaina ( constitutional problems) leh satanh kikimna buaina
(equality problems) hang a Kawlgam in suahtakna a ngah pan minam pawlkhat in
lungkimlohna tawh gamnuai bel in thau tawi a hihna pen thubulpi pen suak hi.
Tua a hih manin hih thu nihte gen khalo in nuntakna khantohna leh sum leh pai
hauhna ( economic reform) ciang bek tawh gamsung ah daihna man taktak om thei
ngeilo ding hi. I gamsung ah buaina a ven siang theihna ding a bawl kik huai
thu pawl khat in: -
1). Gam kumpi lam khiat zia ( Formation of Government)
Gam kumpi kilam khiat zia pen gam khempeuh in a neih loh a
pha mawh a hih bangin kumpi kilam khiat zia hoih leh gam sung hoih hi. Gamsung
hoihna dingin mipite kihel ( involvement) kul a, tua mipi a kihel theihna ding
in gam sung kumpi pen Democracy government tawh kilam khia bek leh hi thei hi.
Gam sung makai ding leh mipi palai sem ding pen mipi te'n tel ( elected) hen
la, mimal khat deih lak ( selected) hi kei leh bek democracy hi maw, hi lo cih
ki khen tel thei hi. Mipi tel palai leh makai te a kitel khiat theihna dingin
zong kitelna pai zia ( the process of election) bang dan in nei leng mipi deih
makai taktak kingah ding cih tung ah kinga lai hi. Democracy gam kumpi ah zong
mipi tel vive a hih hangin kitel zia man kei leh mipi deih ten ngah tuanlo hi.
Tua hi in, kitelna a kibawl ciangin zong kitel dan man leh siangtho pen zat
ding kilawm hi.
Democracy gam veve gam kumpi kilam khiat zia pen Presidential
democracy leh Parliamentary democracy
ci'n kikhen thei hi. Gam pawlkhat in Presidential Democracy tawh kalsuan in
leitung ah gam khangto pen gam a suak om hi. Gam pawlkhat leuleu in Parliamentary
Democracy tawh kal suan in leitung gam dangte tawh liangko kikim veve hi. Gam
kumpi kilam khiat zia pen tua gamte dan (system) hoih penpen cih om lo a, ei
gam i tangthu leh minam vai tawh kituak a zat theih pen khantohna hoih pen suak
hi. Kawlgam tangthu leh gamsung a teng mite minamte i et kik ciangin gam kumpi
lam khiat zia ding pen Parliamentary democracy tawh kituak zaw sa ing. Kawlgam
tangthu en kik leng minam bulphuh a kigawm khawm gam a hih manin minam khempeuh
in a kikim panmun let theihna ding leh piak ding kilawm hi. Parliamentary
Democracy paidan man tak tawh kipai thei hi leh gambup innpi ( parliament) pan
party te hanciamna tawh kumpi kiphuh khia ding minam neu party ten zong thu
neihna nei thei hi. Tulai tak a Kawlgam a kizang Semi-presidential democracy
dan tawh a kibat hangin gam bup President sep ding a tel dan ah kibang lo hi.
Presidential Democracy paidan man taktak tawh a pai gam hi leng, gambup
President ding pen mipi bup in a mimal ( individual) a teel in, ( party tel
hilo in) a tel kul ding a hih man in gam sung ah mimal a tam pen ( tulai tak
Kawl minam te) in President ngah den ding hi. Minam dangte a dingin kong khak
om lo ding suak hi. Tua a hih man in party tuamtuam kidemna ( multi party) gam
te a dingin Parliamentary Democracy pen hoih pen leh kituak pen hi.
2). Gam kilam zia ( Structure of the states)
Gam kilam zia ka cih tak ciangin gam sungah gamke ( state)
bang zah om ding, Administration Unit bang zah om ding cihte a gen nuam ka
hihi. [Kawlgam sung ah kizang Division pen administration Unit khat hi a, state
level taktak hilo hi.) I theihsa tek bangin Kawlgam pen a kilam khiat cil a pan
in minam bul phuh a kilam khia hi a, leitang (geographical boundary) bulphuh
hilo hi. Minam lian leh minam neu, minam neu leh minam neu kikal ah thukimna om
tawh kilam khia a hihi. Tua a hih manin gam lamzia pen minam bulphuh mah tawh
gam khiat ding pen thu lai pen dingin ka um hi. Tua a hih manin minam bulphuh
ding gam kilam khia hen la, minam kibanglo leh minam khat i zia leh tong (
characteristics of the nation) a nei minam khempeuh gamke ( state) khat ta in
om ding hoih pen hi. Tua pen Kawlgam suahtakna lak ding lai a minam makai
masakte thu kimna a hi, " Kawl mi in pek khat, Karen in pek khat, Zomi in
pek khat" cih thu kimna a hihi. Kawl
mite Division sagih tak a lak ding uh kilawm lo hi. Kawl mite teng minam khat a
hih manin State khat in om leh minam dangte tawh satanh kikim thei pan ding hi.
Minam tampi ten khopna mun te ( gtn: Irrawaddy Division, Tanintari division cih
te pawl) pen a kisapna zui in state khat in leh minam dangte in zong sang zo
lel ding hi.
Gam kilam zia a dik loh manin gambup innpi ( parliament) ah i
palai sawl theih a phazah kikim nawnlo a hih man in minam neute lungkim zolo
hi. Zomi te in state khat ngah ding satanh khat a ngah tak ciangin Kawl minam
te in satanh sagih bang ngah a hih manin i ngah zah hong kibang thei nawnlo hi.
3). Satanh kikimma ding
Kawlgam suahtakna lak hun ding lai tak a thu kimna pen minam
neu leh mual tung minam te in Kawl minam te, "to" ( Lord) a neih ding
a utloh man leh Kawl minam te bang in a kikim hamphatna ngah ding utna bek tawh
thukimna bawl uh hihi. A mau ukna gam sungah suakta tak a vai hawm theih ban
ah, minam khempeuh in kizah tak tuahna neih ding lunggulh uhhi. Kawl minam te
in a piak leh bek a ngah ding cih lungsim nei lo uhhi. A pia thei ding, a ngah
thei ding din mun ah Kawl leh mualtung mite a kikim in a om ding deihna ahihi.
Tuhun tak teh mualtung mite satahn ding om nawnlo a, Kawl
minam ten hong piak leh bek a ngah ding dinmun hita hi. Gam ukna lam tawh kisai
dinmun a hi a, biakna leh ngeina vai a hi zongin mualtung mite pen Kawlte
khatehnen kia tawm ding bek suak ta hi. Minam dang hih man in " ngah ding
a kilawm kim lai, ngah nawnlo" cih din mun a hih manin kilem na lam sangin
khasiatna, mui siatna lam kima nawh zaw den hi. Tua hi in, Kawlgam ah kilemna
taktak a om theihna dingin satahn kikim ding pen thupi khat ahihi.
4). A kisamlo pawl khat beisak ding
Kawlgam pen minam tampi, biakna tampi leh ngeina tampi kigawm
khopna khat a hih manin kumpi thuneina tawh kisai pawlkhat pen mitam zawte a
ding bek in hoih a, mitawm zaw te a dingin siatna tun zaw hi. Gentehna in Kumpi
bawl ministry khat a hi Religious affairs bang biakna tuamtuam omna gam ah
kisam hetlo lel hi. Biakna lian ( Kawlgam a dingin Buddhism) a ding bek a hoih
a hihi. Thu khunpi sungah biakna khempeuh suahtakna kibang ding cih kiptak a
gelh ding bek kisam a, biakna khatpeuh a thupi sak ding kumpi nungthuap
ministry/agency khat pen thu lai hetlo hi. Buddhism leh Muslim/ Christian kikal
ah buaina a om zenzen leh zong kumpi in tavuan la thei lua hi. Biakna vai pen
minam khat a ding a thupi mahmah a hih bangin luang kham a kipum piak mitam pi
a om na thu a hih manin biakna khat bek thupi sak na pen kilemna ding pan lam
pialna a hihi.
Dated: July 27, 2016
