Biakna sungah Politics

Thu masa:

Biakna sungah Politics cih thulu i muh tak ciangin, i lungsim sungah a sianglo thu khat ngaihsutna om pahlian thei hi. A hangin biakna pen Pasian biakna leh paiina tawh kisai thu bulphuh a kivai hawmna mun le phual in kitel (understood) a, kha nuntakna ding zonna munin a kisan man ahihi. Politics leuleu ciangin leitung a om Pasian bawlsa nuntakna nei khempeuh hinkhawm, ten khawm theihna ding tawh kisai vaihawmna thu in ki mu hi. Hih thu nihte gel i et takciangin a ki kelki (ki-el puak) thu bangin kimu a hih manin bang hangin kisai kha thei ding hiam cih lungsim ngaihsutna ah om a hihi. Tua ngaihsutna in a thu guicing in i telloh man a, mite uanggen (exaggerate) na hangin hih bang ngaihsutna a nei zong i hi thei hi. Thu kihual nih a kigawm khop pen thahatna a piansak hangin thu ki-el puak (ki kelki) nih a kituah khak tak ciangin puahkhapna piang thei a hih manin biakna sungah politics cih pen a lauhuai thu ci leng kikhiallo kha ding hi. Thu paidan ding bang takin a pailo thu hi cileng zong man ding hi.

Biakna cih kammal i zatna pen leitung a om biakna (religions) a huam sak nuam i hihi. Tua biakna tuamtuamte sung pan in Zomite i biakna a hi Christianity (Tapidaw upna) sung a om saptuam (churches) sung thu lam i kawk zaw ding hi. Christian biakna a hilo biakna dang sunga om Zomite vaihawm zia pen banpha zolo ding hihang. Tua banah Christian biakna sunga kalsuan zia, vaihawmzia leh ki-uk zia i gen tak ciangin Christian biakna hoih saklohna, siatsak nopna, deih lohna leh ko-na cih bang lungsim om hetlo a hihna i gen nuam hi. Biakna khatpeuh langpan nopna lungsim tawh kigelh zong hilo hi.

Biakna: ( Religion)

Biakna pen mipi nautang te’n i teldan leh sandan in a gen hi leng, “nuntakna neite in kha (spirit) nei a hih manin sih khit ciangin tua kha pen a tunna/paina ding a uk a vanglian khat (supernatural/divine power) om hi cih kiptak a upna” a hihi. Nuntakna neite cihtak ciangin pawlkhat in mihingte bek huamsak a, pawlkhat leuleu in mihingte banah huih dik a hinna nei na khempeuh huamsak hi. A vanglian khat (divine power)  cihtak ciangin leitung ah biakna a kiciamteh pawlkhat in tua a vanglian khat a om lam umlo kawikawi a, sih khit ciangin i kha tunna/paina ding pen i nuntakna lai in eima ukna, khensatna hi, ci uhhi. Tua ahih manin, "biakna" kammal i khiatna pen leitung mipil tampi te’n a genciat lian ding hamsa sa uhhi. Bang hang hiam cihleh “nuntakna neite” leh “a vanglian khat (divine power)” cih kammalte gel sandan, pomdan kibang hetlo hi. Minam tuamtuam te upna (hun beisa in Zomite zong a kihel) “nuntakna neite” cih sungah mihingte bek hilo, gandingte zong kihel kha hi. Gentehna in Zomite i ngeina upna ah, “Hanken sa gawh a kigo sate i kha pen misi pa/nu tawh misi khua ah tonkhawm ding” cih upna kinei hi. Pasian nialna (Atheism) leuleu pen biakna khat a kiciapteh hangin “A vanglian khat ( divine power)”  umlo kawikawi uhhi.

"Nuntakna neite" leh "a vanglian khat" cih kammal thu nih kikal ah mi tampi i sandan/pomzia a kibat loh hangin biakna sungah upna kibang pawlkhat in “si le sa pan sih khit ciangin (kha) nuntakna kizom suak hi” cih kisang thei tek a hih manin sih khit vai dingin biakna kinei hi, cileng kipom thei kim pen dinghi. I sih khit nung a kizom paisuak (kha) nuntakna hoih leh nuam ngahna ding i zonzia a tuamtek hizaw hi. Pawlkhat in si le sa tawh nuntak hun sungin i thalawhna ciangciang kingah ding hi ci’n upna kinei a hih manin thaman limci ngahna dingin hanciam uhhi. Gentehna in Pasian nialna (Atheism) sunga om mite bangin a vanglian khat, a om dingin sang theilo a hih manin mihing tha mah tawh thalawh kul hi ci’n sang uhhi. A hizongin a nungta Pasian (God) a um Christian te in “hot khiatna ngahna dingin nang le kei sep kullo, Pasian in hehpihna tawh hong piak khong hi” ci’n i um hi. Leitung ah biakna khempeuh sungah “Gup ngah nangin, nang leh kei gamtat pha hang hilo” cih upna nei pen Jesu a sang Christian biakna bek a hihi.

Sih khit nung thu (or) kha a ding tawh mihingte in a nuntak hun sungin a zon uh thu khat pen biakna thu hi a, leitung vai tawh a kithuap linlian theilo thu khat a hihi. A hizongin biakna vai pen mihingte nuntakna tawh kizom thu a hihmanin a tonkhom ding, a paikhawm ding ahihi. Hih mun-ah leitung vai i cih tak ciangin mihing pen si le sa tawh a nungta lai i hih manin si le sa kisapna ( i Topa Jesu mahmah zong a dangtak, gilkial thei a hih manin) pen ki nusia thei tuanlo a, seploh a phamawh thu pawlkhat om hi. Pawlkhat leuleu ciangin seploh a phamawh hilo a, mimal utna leh uukna zui a kisem om veve hi. Lamkhat pan gen leng, mihing nuntakna a thu khennih om a, khat pen "si le sa kisapna zui in seploh a phamawh leitung vai" leh "mihing utna leh uukna zui a deihtelna tawh nasepte" a hihi. Hih laisung a i gen politics or leitung vai pen mihing utna leh uukna zui a deihtelna tawh nasepte hi zaw hi.

Politics

Politics cih kammal i zak tak ciangin Zomite sunga mi pawlkhat i muhzia leh sanzia pen i biak Pasian thu tawh ki tuaklo, ki-el puak thu, leitung vai lua ci'n lungsim i nei hi. Biakna leh a nungta Pasian biakna (Christianity) tawh a kisai lo, vaihawm khop theih ding thu zong hilo in i mu hi. Politics cih a huampi a kigenna hi a; ngaihsutna (thoughts), lungngaihna (ideology) te kikup ding sawmna om lo in, nisim nuntakna kizang thute tawh kituak pen a kipelh theilo thute bek bulphuh a gen ding i deihna ahihi.

Biakna sungah Politics (leitung vai) a kisep zia ka gelhna a ka siksan pen in American Political Scientist Harold Lasswell (Feb 13,1902- Dec 18,1978) i politics genciatna a hi "Who gets What, When and How- Kua in bang pen banghun in bangci ngah hiam" cih a khiatna zui in biakna sungah a leitung vai na sepna a taklang nuam ka hihi. Mr. Lasswell in politics i deihna/khiatna a genna zui in thu a sui hi leng, mimal sim i nisim nuntakna leh i kim i kiang a kizoppih mun khempeuh ah kimu thei ding suak hi. Mi pawlkhatte muhna ah politics pen a nin, a siangtholo leh a lipkhap huai bangin gen uhhi. Mr. Lasswell i khiatna bangin cileng, politics pen a nin huai a hi phial zongin mihingte kipawl khopna mun khempeuh ah kizang le mi khempeuh zat hong suak hi. A hizongin i khuatang kipawlna khempeuh i ban zo kei dinga, leitung vai tawh ki sawh khalo ding a i ngaihsut biakna sung ah bangci bang in ki mu hiam cih i gen ut zaw hi.

Zomi sungah biakna kipawl zia pen pawlpi (denomination) zui in a munmun ah saptuam (church) in i kivai puak hi. Pawlpi (denomination) kibang saptuam (church) pen a huam gol zaw association (or) district ah cih bangin kipawl khawm to leuleu hi. Tua kipawlna te pen gamkhen/ gambup ah kipawl khawmna khat in kigawm kik leuleu hi. Nahtang khil bangin a khilkhil in i om hangin i pawlpi (denomination) ah kung khat in i ding khawm thei hi. Tua pen Pasian a ding na sepna ah muibun zaw bek thamlo in, maliau zaw leh nasep dan tampi takin nuam zaw hi. Tua kipawlna pen Pasian min leh gam a ding mitsuan gige kawm a na sepna a hih manin mite in zong gelna hoih le nasep hoih a sem dingin theihsa in kikoih hi. A hizongin tua pawlpi (denomination) leh saptuam (church) a kipawl dimdiamna pen leitung si leh sa kizopna khat bek thamlo in, a sem a bawlte zong leitung mihing mah a hih manin leitung paidan tawh kipai kan thei tuanlo hi. Tua bang hun tak ciangin a lamdang pi in kingaih sun kha zaw hi.

A diak in mipi nautang in a theih pen dingin saptuam (church) sungah politics pai zia zui-in vai kihawmna pen kimu kha den hi. Nisim phial a kizopna leh kisai khakna a hih manin mipi nautangin saptuam sungah thusia thuhoih kimu baih pen hi. Saptuam sung mahmah ah zong panmun len tawh vaihawmna neih kul a hih manin "kua in bang pen banghun in bangci ngah hiam?" cih thu nisim a i tuak kha hi. Saptuam sungah hih Mr. Lasswell i politics khiatna bang lian a nisim i tuah thute en leng:

1. Pastor and Priest ( Tuucing leh Siampi)te sepkhakte

Saptuam (church) a kiphuh ciangin, a cing a kem ding Pastor (Tuucing) leh Priest (Siampi) kisam pelmawh hi. Tuucing leh Siampi omlohna ah Saptuam pen khava in lungneu hi. Saptuam mite'n Tuucing leh Siampi hoih neih ding lunggulh hi. Tua a hih manin Saptuam mite'n in a mau hih theihna ciangciang tawh Tuucing leh Siampi te mawkkoih loh a, thaman piak ding gel tawntung hi. (Tuhun teh bel Tuucing leh Siampi te deihthawh luat manin thaman cih sangin kammal kilawm zaw tuamtuam kizang ut zaw hi.)

Tuucing leh Siampi pawlkhat in zong saptuam pen nasep na mun (workplace) in tuat a hih manin tua mun ngahna ding leh a panmun a kipna ding lampi tampi tawh panlakna nei thei hi. Tuucing leh Siampi khat in saptuam sungah panmun a ngahna dingin in saptuam mite sungah mi a tuam in khawi cihbang nei theihi. Panmun ngahsa Tuucing leh Siampi te in zong a mau sepna pen a khahsuah lohna dingun na sem uhhi. Lampi ( Strategies) tuamtuam sung pan in;

a) Committee or Board suanga panmun ngah ding zonna: Pasian biakna leh paiina ding a kiphuh saptuam a hih hangin Pasian lamlahna Laisiangtho sangin panmun ngahna dingin mimal kimai-etna kimasak zaw thei hi. Saptuam sunga thu vaihawm Comittee leh Board in panpih in hum leh mun ngah ding, a mun kip dingin a hih manin Tuucing leh Siampi pawlkhat in tua lampi zang hi. Saptuam mi pawlkhat i inn ah a tung ngeilo tuucing leh Siampi khat pen saptuam sunga thu vaihawm Comittee leh Board member te kiang tung pahpah hi, cihdan zong hunsawt pek panin Zomi thu-um mite sungah ki za den hi. (Hih bang thu a om theihna dingin vaihawm te'n Saptuam sung thuneihna pen Board leh Committee te'n a let hang a hih manin a maute thu nei sakkei leng hih thu omlo ding hi kici kha theihi. Hih thugen pen a langkhat bek et a genna hi a, saptuam pen mi tuamtuam leh leitung ngeina a kipawl khopna a hih manin kipawlna khat peuh pen Board leh Committee mah tawh kivai puak pen a thupi pen a hihna phawkloh man hizaw hi. Committee leh Board in vaihawmna a let hang hilo zaw a, panmun deihna hang tawh lampi tuamtuam sung pan strategy khat ki zang hi zaw cih phawk huai hi.)

b) Beh leh phung suang a panmun ngah ding zonna: Saptuam pen Pasian thu tawh ki makaih hi cih pen a thu in a man mahmah hangin a makaite pen leitung mihing mah a hih manin si leh sa kinaina, beh le phung kizonna, leh phung leh nam kihuainate pen a kal laklak ah hong kihel thei zel hi. Saptuam khat sungah beh leh phung nei zaw deuh, a phungpha zaw deuhte in zong midangte pen ei deihdan hong zuih uh kul ding hi cih muh dan nei mawk uhhi. Tuucing le Siampi te'n a mau beh leh phung zaw deuh teng huai bawl, maivil masa in saptuam sungah a sungtang theihna ding hanciamna pen kimu zelzel hi. Saptuam sungah a mau deihna a kizuihna dingin beh leh phung sung pan a pau zo leh a thu genzo zaw deuh teng gensak thei uhhi. Beh leh phung sungah kituah khopna om leh "ei teng mah ki en ding" cih tawh thu gen in, saptuam sungah zong "ei beh teng mah i ki ang-van ding hi" cih thu golh den uhhi. Mipite in zong a takpi mah kisa pah a hih manin ei beh teng mah saptuam sungah zong ki masak ding cih Tuucing leh Siampi te thugen a man pen in ki sang pahhi. Saptuam vai a hi zongin beh le phung kideihsak zawk ding, ki masak zawk dingin lampi kizonsak a hih manin Tuucing leh Siampite panmun pen a kipsuak na ding hanciam uhhi. Beh le phung te a mau nungthuap ding a gelna lampi khat a hihi.

c) Khua leh tui suang a panmun zonna: Mihing pen mun khat pan mun khat-ah kilal kawikawi a hih bangin khuapih lui teng tawh teng khawm, khawlkhawm cih tuhun ciangin hamsa hi. Zogam pan Kawlgam, Kawlgam pan gamdang ah i lalkhiat tak ciangin khuakhat a teng khawm teng ngei lian bek kiteng khawm thei nawnlo hi. Mun tuam mual tuam, khua tuamtuam pan paikhawm in kiteng khawm ta hi. Tua bangin i kiten khawm na pan saptuam khat i suak hi. Saptuam khat sungah a i om khawm tak ciangin Tuucing leh Siampi te in a mau deih panmun a ngahna ding or a mau panmun a kip suakna dingin a khuapih teng zawdeuh pen huai bawl deuh, leh mai-et in a mau nungthuap ding a panlakna kimu thei hi. Panmun ngahna dingin mun leh mual khuatkhuat a hih lam a phawk pah loh hangin a zung kipna ding un khuapih tuipih lui teng tawphah in zang thei uhhi. A khuapih zawdeuh tengin zong, "i khuapih a hih manin hoih leh sia leh a thu in kannawnlo in panpih ding, hum ding" cih lungsim tawh kipai hi.

d) A demzo ding mite nawlkhinna leh langpanna suang a panmun zonna: Saptuam tampi a kikhenna a hangin kinawl khina leh kidem bawlna hang hi theihi. Tua kinawlkhinna leh kidem bawlna pen panmun kituhna leh thu nei kituhna pan hong kipan a hihi. Tuucing leh Siampi pawlkhat in a mau deihna ngahna dingin a mah khekhap a mu thei ding mite pen saptuam sung pan nawlkhin theihna ding sawm den thei hi. A mah a dem thei ding, a mah sangin a khangto zaw theih ding mikhat a om ciangin dem sawmna, nuaisiah sawmna leh nawlkhinna te kizang pahpah hi. A seppih mite simmawhna leh neu-etna nei in midangte mai ah mun a ngah loh theih theihna ding, a khantohna dingin lam khak mawk uhhi.

e) Zia leh tong kibang zawdeuh teng suang a mapanna: Saptuam pen mi khat hilo a, mi tampi kigawm khawmna a hih manin i duh, i deih kibang lo a, i zia i tong zong kilam dang hi. Pawlkhat a thahat om a, pawl khat a thanem om hi. Tuucing leh Siampi pawlkhat in a maute panmun a kipna ding leh panmun a ngahna dingun tua bang a, kilamna om saptuam mite thanemna lian pen vanzat in nei thei uhhi. A mau deih a ngahna dingun zia leh tong kibatna om teng paulak in " ei pen tua ci hang, a mau pen tua ci lua" cih lungsim guan den hi. Zia leh tong kibangin teng kiu khat ah kikhin in a om leh, thu zawhna nuam zaw ding ngimna a hihi. Lamkhat pan cileng, "khen kham dingin uukzo ding ( Divide and rule)" cih a zangzang a hi uhhi.

2. Board Members and Committee ( Thu vaihawmna leh Committee i sepkhak thute)

Saptuam khat sungah si le sa tawh kisai thu, kinu sia theilo pawlkhat om a hih manin tuate a van ding leh a sem dingin, tua banah saptuam sungah pawl mite a si leh sa kitang sapte a van dingin thu vaihawmna makai leh Upate kisapna zui in kikoih hi. Vaihawmna ah mavan zawkna ding leh saptuam nasepna a thahat zawkna ding ngimna a hihi. A hizongin hih vaihawm makai leh Upate in zong saptuam sungah panmun ngahna dingin lampi tuamtuam (strategies) zangin hanciam thei uhhi.

a) Tuucing leh Siampi te mai-etna: (Tuucing leh Siampi te maivil siam ding thupi a, mai-et ding pen a khengval in zatloh ding kisam hi.) Saptuam pawlkhat pen tuucing leh siampi te cih bangbang, (a vom leh a kang nangawn pen a mau cih pen a man hi zaw) tawh ki-uk pawlkhat om hi. Tua bang saptuam sungah vaihawmna makaite leh upate in pawl mite a ding kitang sapna leh Pasian mai et ding sangin tuucing leh siampi te maivil zaw tawntung hi. Tuucing leh Siampi a mai-etlo saptuam vaihawmna makai leh upate pen tuucing leh Siampi te'n a kum kik ciangin panmun a piak nawnlohna hang a hihi. Tuucing leh Siampite maipha ngahloh khak ding launa in vaihawm makai pawlkhat in saptuam thahatna zah khengval in tuucing leh Siampite thaman ding pen kumsim in a pulak masa ding vaihawm makai leh Upate sung pan kituh phial mawk hi.Saptuam pawlkhat bangah Tuucing leh Siampi a thunei zaw deuh pen mai-et in, a dangte pen neubawl, simmawh bawl le thu in sim mello in Tuucing leh Siampi tektek sung na ngawn ah mai-et dan kibang lo lai hi. (Mimal i neihsa lak pan ki zang ding hilo lel a hih manin minpha ngah ding kitha siallo hi.)

b) Beh le phung lungsim ul-tung sak luatna: Saptuam sungah vaihawm makai leh Upate in saptuam kitel hun ciangin panmun a ngahna dingun a mau beh leh phung teng sungah vote zong thei mawk uhhi. Vote pia thei pawl mite in zong a mau beh leh phungte saptuam vaihawmna makai leh upa dingin tel ding/piak ding cih lungsim kinei theihi. A ki vaa zaw leh a kipia zaw midang tampi om na pi'n a mau beh leh phung sung bek pan makai sem ding cih lungsim om a hih manin midangte in tel theih dingin kikoih lohi. A mau mite a hih kei leh telloh ding cih bang kiho kholhna om thei mawkmawk hi. Pawl mite sung pan in tuucing leh siampi a mau beh leh phung a hih nak leh saptuam sung pan hamphatna ngah theihna ding "paulap" tuamtuam zangin deidanna leh khentuamna tawh vai kihawm hi. Thu khat la khat a om tak teh, ei beh le phung bek en lian in a thu luan zia ki-en lo in ki pum gup tuam den hi.

Mipi nautang a tamzaw in biakna pen Pasian thu zuihna a hih manin Politics kihel kilkello, leitung vaite tawh kigawm theilo in ki mu hi. Pasian thugen mikhat or Tuucing leh Siampi khat a hih nak leh a ma sepna pen a ma thu tawh politics tawh kisawh khalo danin kisang hi. Laisiangtho bu tawi khat a hihnak leh a gen khempeuh pen Pasian thu tawh kituak dingin kisang mawk hi. A langkhat leuleu ah Laisiangtho tawilo leh LST sinna neilo khatpeuh i thu gen leuleu ciangin Pasian thu hilo leh thutak dingin kisanglo leuleu hi. Biakna na sem a hilo, mi nautang (layman) khat a hihna hangin a thu gen le gamtatna pen Politics danin kisan sak leh kigen sak thei mawk hi.

A hizongin Tuucing leh Siampi te leuleu in zong a mau mimal mahmah in pawl mite nisim nuntakna, khotang hinkhua (social life) vai pen nutsiat ding leh koihdap dingin ngaih sunlo kawikawi uhhi. Tuate sepna pen Pasian deih nasep in sang thei leuleu uhhi. Pawl mite haksatna, gentheihna, lungzin hunte ah va huh, va panpihna pen Pasian deihna in sang thei hi. A laklawh mahmah khat thu in pawl mite nisim khotang hinkhua a kisapna te pen Laisiangtho a sin ngeilo leh mi nautang ( layman) khat in va huh, va panpih leh Pasian deihna sep cih sangin Politics sem danin lah ki mu kawikawi zel hi.

Bangteng a hi zongin mihingte in thu i deih kaih ut hangin nate paidan thu (the law of nature) pen kikhel tuan hilo hi. Mihing te i nasep silbawl, hihna te in tua nate paidan thu pen kilam dangsak tuan hilo a, a mu leh a ente muh zia, sanzia bek kilam dang a hihi. Tuucing leh Siampi te in a mau sepna leh bawlna ah "kua in bang pen banghun in bangci ngah ding in sem hiam" cih tawh a kituak nasep pen politics a sem mah suak veve hi. Saptuam sung a hi a, Pawlpi sung a hi zongin tua lampi (strategy) tawn a hih nak leh politics tawh kipelh tuanlo a suak veve hi. Tua banah pawl mite cimawh huhna, haksatna pan panpihna pen pawl mi nautang (layman) khat in a piak hangin zong Pasian deih nasem a hihna beituan lo a, Tuucing leh Siampi te mah bangin a deihna uh kibang veve a hihi. Mite muhna ah muhzia kilamdang dinga, kigel tawm bek hi a, nate paidan thu ( the law of Nature) a leh pansuak hi. Mihing khatpeuh in si le sa kipawlna a hi a, biakna kipawlna a hizongin, a deih khat a ngahna dingin "bang hun in bang pen bang ci ngah dingin sem hiam?" cih tawh a sem mikhatpeuh pen politics tawh kipelh tuanlo a suak a hihi.

Dated: January 2018