Gim neihna (stereotype)
tawh kisai in laibu gelh Mike Cardwell in Dictionary of Psychology cih laibu
sungah, gim neihna pen a tomkim khiatna a neih na-ah "gim neihna kici pen mi khatpeuh a hih kei leh minam / pawlkhat
peuh tungah a ki bikhiah ( fix) leh a khengval a upmawh thugenna" hi
ci'n na gelh hi. Mimal khat, mipawl khat leh mi bawngg khat tungah hih bang a
upmawhna neihna pen a hoihna a om bangin a ki-it, kilem a nuntak khopna ding in
a hoihlo na zong na om kawikawi veve hi. Gentehna in, a hoihna lam ah khat gen
hi leng: A beisa hun in tua bang mite in tua bang gitloh gamtatna na sem ngei a
hih manin tutung a zong tua bang mite mah hi dinghi ci'n sansat theih pah i hih
manin thuman zonna leh kiven kholhna dingin hoih thei pah hi. A hoihlohna tampi
sung panin khat gentehna danin a gen hi leng: mimal khat, minam khat leh khat
pianzia kibanglo i hih manin i thupi sakte kibang lo a, gamtat khoheknate
tuamtek a hih manin kitheih siamlohna khang sak semsem a, midangte tungah
muanmawhna, sansatna i neih pen man mim/den hetlo hi cih pen ki mangngilh kha
hi.
Zomite sungah zong mimal
nuntakna bek hilo in khotang nuntaknate ah zong hih bangin gim neihna pen nakpi
takin a om lam ki theithei hi. I Zogam sungah khua khat leh khua khat kikawmna
hamsa in ki mu mengmeng lo i hih manin i lungsim hong kigamla sak hi. I lungsim
hong kigam lak ciangin khat leh khat kitel taktakna om theih nawnlo a hih
manin, " tua khuate a hih leh tua ci dan lungsim nei deuh uh cih a hi
zongin; tua awkaih zangte a hih leh tua bang in lungsim kawi/ hoih neih zaw
deuh uh" cih bangin a pongpi in kigen mawkmawk theihi. Tua bang a i ki
sansat mawkmawk pen na man khit dek hetlo a hih manin zong tanglai in i pu leh
pate khua khat leh khat ki muangzo/ngamlo uh a, gal leh sa in kinei in na kido
zelzel uhhi. Sim leh mal cih peuh lungsim neihna ki nei mawkmawk a, "i
unau simlam te bel tua ci lua uh, i u nau mal lamte bel tua ci lua uh cih leh i
unau zo lamte bel tua ci pha diak uh cih" tawh mi kigim neih mawkmawk a,
thu leh la ki vaihawm/ kigel kha mawkmawk hi. Tua bang a ki gim neihna/ thu
sansatna hangin khat leh khat kitel cianna omlo a hihi manin unau sanggam zong
kitel khial bek hilo in sanggam melmak bangin sa leh gal in i kinei kha lai
zang hi.
Tu dongciang mah i
nuntakna sungah gim neihna leh upmawh thu tawh sansatna pen kinei tawntung veve
hi. I Zogam leh i Zomite nuntatzia (context) bul phuh in a en hi leng: Biakna
na sem khat a hih nak leh mi hoih ding, sup thuak ngam mi, leh pahpih ding cih
sandan khat kinei hi. A mimal in i theih kei a, a mimal i a beisa nuntakna i
thei kha ngeikei zongin (a lungsim puak zia i theih loh hangin) mi hoih hi
hamtang ding cih sandan ki nei a hih manin muanna kinei hi. A maute tungah thu
hoih thupha bawl ding pen Pasian nasepna zah bangin kituat hi. Biakna paulam a
hih nak leh mi hoih hi ding cih tawh upmawh sansat in i inn sungah sung tum
pusuak sak ding zong kiphal pah lel hi.
A hizongin Pasian thu um
mahmah veve mi khat pen biakna na sem a hih kei leh tua bangin mi hoih khat hi
ding cih upna kinei ngam pahlo hi. A diak in gamvai (politics) sem mite bang
pen bang zahta in Pasian thu a um uh zongin mi hoih leh thuman mi hi dingin
kituat thei ngiatlo zen hi. Biak inn a pai uh hangin Pasian thu a um taktak
diam maw ci peuh tawh muahlohna lungsim tawh kigen thei lai hi. I Zomi sungah a
nungta Pasian a um leh Christian biakna sung pan khang khia minam leh gamvai na
sem Pu Chin Sian Thang pen a beisa hun in i Zomite makaihna pawlpi biakpiakna
ah a kikhop ding a deih phalo om ngei hi ci'n ka za ngei hi. A mah pen biakna
nasem hilo a hih manin mihoih ding a kituat theilo hi ding aive maw ka ci hi.
Tua mah bangin biakna nasem hilo in, Laisiangtho sang manlo khatpeuh in minam
vai hong sem leh mi hoih leh thuman ding kimu theilo/zolo laizang hi. A tattak
in cileng tua bang a ki gim neihna/ upmawh sansatna pen mimal a kitheih ding
sawmlohna leh mimal sung thu theilo pi a khensat piakna a hih manin kikhial
gige thei hi.
Christian biakna sung
tektek na ngawn ah zong gim neihna / upmawh sansatna pen bei tuanlo hi. Hih pa/
nu bel tua pawlpi a hih man in tua ci ding hi ci'n kigen khol mawkmawk thei hi.
Ko pawlpite bel a tuaci te hi ungin, piangthak ung peuh ci mawkmawk in thu i
gen ziauziau thei mawk hi! Mimal thu kitel sawm lo, zia leh zong kitel sawmlo
in upmawh thu peuh tawh midangte zia ding kisan sat sak a hih manin kitel
siamlohna piang zaw thei hi.
Biakna sung bek hilo in
beh khat leh khat kikal ah zong gim neihna ki tam muh thei mahmah hi. A mau bel
tua beh te hi uh in, tua ci tentante uh hi, kipha sak uh hi peuh ci in, mi peuh
kigen thei hi. Minam vai leh pawlpi vai na ngawn ah beh vai tawh gim neihna
tung sak dekdek mawh thei hi hang.
Ki gimneihna, upmawh thu
tawh sansatna pen mihingte nuntakna ah a kinu sia siang sitset thei thu hi
tuanlo hi. Nutsiat siang sitset zo ding hi leng zong a hoihlohna na om kawikawi
kha ding hi. Cih takciangin i nutsiat theihloh manin gim neihna i neih manin
thupiang pawlkhat pen manlang takin kinung zun theih pah zawkna mun om a hih
man a hihi. A hizongin mimal thu tello pi a gim neihna/ upmawh thu tawh
sansatna in midangte hoihna, leh kilemtakna nuntak khop theihna ding lampi
tampi hong khak tan hi. Thu man muh khiatna ding lampi bing zaw hi. Biakna sungah
leh biak piakna a neih manin mihoih a i san pen khial hetlo na pin, biakna
nasem a hilo mi khatpeuh Pasian thu um kei cih tawh i sansat mawk pen kikhial
mahmah thei hi. Mi khempeuh in biakna na sep a sep theihloh bangin, biakna
nasem lo Pasian thu-um leh mihoih tampi om hi. Gam makai mi tampi tak pen
Pasian deihna tawh a nungta tam mahmah a, thuman leh cihtakna lampi a zui mi
tampi om veve a hihlam pen mangngilh huai lo hi. " Laibu pen a kawm bek en
a, thukhenna i piak loh ding" kisam pen ding hi.
Dated: 10/02/2016
