Paunak Zuunna: Nahkhok no Musi Suak in a pi ne

-->

Tual Khan Suan

A kizatna: Nu leh Pa, a hihkei leh mi khatpeuh in a it mahmah a ta/tanu, a hihkei leh mi dang khatpeuh khuasuak dingin pantah a, tua mipa/minu a khanliat/zaliat ciangin a mah a pantah mite siatna/sihna ding bawl kikna mun ah kizang hi. Hoihna pen siatna tawh thukkikna cihte pawl ah zong kizang hi.

Mangkangte’n zong hih bang dan paunak na nei uhhi. “Nang an hong pia khut pet na” (Bite the hand that feed you) na ci uhhi. La phuahsiam Trent Reznor “The Hand That Feeds” cih thulu tawh la na phuak a, La sa “Nine Inch Nails” in na sa hi. A la, sakkik (chorus) ah:

Just how deep do you believe?
Will you bite the hand that feeds?
Will you chew until it bleeds?
Can you get up off your knees?
Are you brave enough to see?
Do you want to change it?

“Bang ci bangin  ngaihsun in um mawk na hiam?

Nang an hong pia khut pet ding na hiam?

Sisan a luan dong hai ding na hiam?

Na khe phongto inla ding dih ve?

En ngamlo na hi hiam?

A piangthu khek ngam takpi na hiam?”

Tua banah, Greek minam sungah zong hih bang dan thu na piang ngei hi ding hi. Greek mipil a hi Aesop in thupi (Fables) a genna sungah “ The Farmer and the Viper” cih tangthu tomno khat tawh na genteh hi. A tangthu tomno sungah, “ Lokho pan in khuadam thuak a, votsa lua in a si ding Gul gu nei khat a muh tak ciangin hehpih huai sa in a anglum ah koih hi. A sawtlo in gul gu nei hong cidam kik a, lokhopa tu lum hi” na ci hi. A gilo khat pen a cimawhna pan huh le cin hong cih theih hun ciangin, nang hong thak kik thei hi a cihna a hihi.

Zomite in zong i paunak sungah “ Nahkhok (vasa) khat in no nei a, a pi in a no a ding an nek tui dawn zong in buai den hi. A pi in a no vak zawhna ding hanciam mahmah hi. A hizongin a no hong khangtoto in a gol tak ciangin, Musi ( mu sa ne) suak in a pi ne kik hi” ci’n ki zang thei zel hi.

Nu leh pa te’n a tate uh a ding nisim nai sim in a zu a ham thuak, nisa nuai ah gim pipi in na sem in a tate/ tanute a ding na sem uhhi. An lim, meh lim na ngawn a tuam in ne ngamlo in ta/tanu te a ding in sit vauvau uhhi. Ta/tanute mailam nuntakna ding, khosakna ding deihsakna tawh neh leh dawn, sum leh pai khol uhhi. Ta/tanute a ding a hoih pen dinga a mau muhna tawh gelna nei uh a, tua bangin a tangtunna ding hanciam uhhi. Tua pen nu leh pa tavuan (duties) ciang bek hilo a, tate/tanute itna leh deihsakna, lainatna tak tawh a gelna a hihi. Tanu/tapate leh tua banga pattahna tawh et a om mite in ei hong kem, hong pantah leh lam hong sialsak mite tungah siatna tawh i thuk kik loh ding kilawm hi. A mau hong kep leh hong pattah bangin i nuntakna in a zui kei kha phial zongin siatna tawh i thukkik lohna pen a mau tungah itna lahna a hihi.

Innsung pan in, khuasung ah, khuasung pan in minam sungah en to le hang; I Zomi sungah mipil misiam te’n kuamah pattahlo cih bang kampau kiza kiaukiau thei hi. A hang khat om thei ding hi. Tua a hang pen, Zomi sungah a kipattah leh lamlahna a om simin, tua mipi, minu hong khangkhin ciangin a pantah leh a lamtak mipa, minu pen siatna tawh thuk kik a hih man zong hi kha thei ding hi. A mah a pantah pa/nu i khut pen pehsak a, sisan a luan dong khahlo zong hi kha dinghi. A hih kei leh “Nahkhok bangin, a khan khit tak teh Musi suak in, a pi ne kik” zong hi kha thei ding hi. Mipil misiam te’n in a mau nung thuap ding mi tampi tak pattah leh lamlak ut ding hi na pi’n, a pattah leh a lamlah mite in siatna tawh a thuk kik khak man a hihna ding ki-et phat huai mahmah hi.

Mihing in a hoih na sep pen a hoih mah tawh kithuk kik ding lam-etna kinei a, siatna tawh a kithuh kik tak ciangin midangte tungah na hoih sep kik ding thasialna om thei hi. Hih ciang dong hong tunpih, Pasian tungah lungdamna tawh i kiko bangin, tu a na tunna ciang, na tunna ding na lampi totna ah hong panpih mite siatna tawh na thuk kik loh ding thupi hi. A maute pen na lampi totna ah na nungtolh lohna ding, ka kipaih lohna ding, na gim leh tawl hun a hong huh ding Pasian mizat taktakte hi zaw uhhi.

Date: August 11, 2019