Bang hangin Politics hua i hiam?
( Why do we hate Politics?)
Hih
lai kigelh a sim thei mi khempeuh in Politics cih kammal a kizak tak ciangin
gam vaihawmna leh ki-ukna thuneihna nei gam kumpi, tua tawh a kikim thuneihna
panmun a len mite i mitkha ah kimu pah lian hi. Minam vai leh gamvai a sem mite
pen politics a sem mite in kiciamteh pah cihna a hihi. Biakna vai, sumbawlna
vai tawh kisai kipawlna zawdeuh pen politics tawh kisawh khalo bangin kikoih cihna
zong ahihi. Khial hi, a kicih pah theihloh hangin man khin tuanlo hi. A manna
om a, a khialhna zong om hi. A manna in minam leh gamvai nasepna ah ukna
thuneihna ngahna dingin a kilangtang in kituhna kinei a hih manin politics
kisem mahmah cih theih hi. A khialhna lam leuleu ah, biakna vaite ah ukna
thuneihna ngahna dingin a simtham (mi nautang i theih luatloh in kidemna om)
in kituhna om a hihmanin KIDEMNA om veve hi kici theihi. Na Sepna (Minam,
gamvai leh biakna) bek lieuliau pen politics hi kici theilo a, na sepna a hang
leh a zia (ukna leh panmun kituhna) ciangin politics kici theipan hi. Minam leh
gamvai na sep manin politics a sem cih pah lanlan ding hilo a, minam leh gamvai
na sepna ah ukna thuneihna ngah nopna tawh sepzia a om ciangin politics kisem
cih ding hi zaw hi. Tua mah bangin biakna vai nasep a hih nakleh politics a
semlo cih pah ding hi tuanlo a, biakna sungah ukna thuneihna ngahna ding na sepna
leh sepzia a om leh politics kisem mah cih ding ahihi. Politics kihelna,
kimawlna pen nisim nuntakna mun khempeuh ah kimu thei hi. Nasepna, veng
kipawlna, khua kipawlna cihte khempeuh ah zong kimu thei hi. Tua hi a, biakna
vai a hih kei nak leh Politics cih ding hilo a, biakna vai a hih nak leh
Politics omlo bangin san ding zong hi pah hetlo hi. (Note:
Biakna sungah Politics pen a kilanglo ( a simtham) in kidemna om a hih manin
mun dangte sangin Politics pen pilvang kul zaw lai hi.)
Politics
in Mihing nuntakna tawh kipelh theilo a hih manin Politics pen “Mihing kizopna
ding siamna (Social Arts)” cih bangin a genteh in, a phatbawl bang om leuleu
hi. Politics pen “A bangci mite in ukna thuneihna nei ding” cih kitaitehna khat
hi a, “kiholemna zangin khat le khat kizop theihna ding” lampi zonna khat hi,
ci uhhi. Man hi; Mihing nuntakna, nekzonna ah thu vaihawm ding, ukna nei ding mi
pawlkhat kisam a, tua thuneihna a nei ding mite in a mau siamna zui in
thuneihna ngahna ding kidemna neih ding pen lampi man khat ahihi. Mi nautang in
zong a mau nuntakna sunga kisapna leh deihna a ngah theihna dingun veng le pam,
midangte tawh kiho lemsiamna neih kul hi. Mihing in kisap leh deihna tawh kidim
(or) mihing a piang khat in nuntakna dingin kisap leh deihna neilo omlo, a hih
manin tuate ngahna ding kimawlna/kidemna ah lut in siamna lahkhiat kul a hihi.
A siam zawzaw leh a hat zawzaw in a deih leh kisapnate ngah zaw a hih manin a
siam leh a hat kituh kul pen ngeina khat a hihi.
A
hizongin mihing a piang khempeuh in i kisap leh deihna khempeuh hunkhat leh
thakhat thu in ngahkim ngeilo a hihna pen leikiak thuman (natural truth) a
hihi. Mihing in tua leikiak thuman pen kinawlkhin in kisang utlo khazel hi.
Ukna thuneihna a nei mite a hi a, mi nautang a hizongin a mau nuntakna sungah a
deih leh kisap pen a kingah kim zawhloh takciangin lungkim zawhlohna om hi. Lungkimna
a kingah zawhloh tak ciangin deih leh sapnate ngah theihna dinga, kigen politics
hang hi ci’n mawhmatna kinei hi. I tupna a tangtun lohna, i nuntakna a kilamdanlohna
cihte pen politics nitna hang kici hi. Tua hi a, mi tampite in politics a huat lawhna
pen:
1. Deih leh sapna khempeuh ngahna ding
a kipom hi napi’n thakhat thu a i ngah lohna hang a hihi. Mihing pianzia limlim
ah lungkimna dingin i dinmun or i hihna sangzo kei leng lungkimna (contentment)
a om ngeilo ding a hihi. Lungkimna ngahna ding i dinmun leh i hihna san theihna
kisam a hihi. Dinmun sang (High class) a nungta, dinmun lai (middle class) leh
dinmun niam (lower class) a nungta mi khatpeuh in a omna/hihna a san theih kei
leh lungkimna neilo hi. Dinmun niam (Lower Class) a nungta mite in dinmun lai
(middle class) a nuntakna zawhna ding, dinmun sang (High Class) a tunzawh na
ding tup leh hanciam nei hi. Lampi tuamtuam tawnin hanciamna hi. Tua lampi
tuamtuamte ah midang zong na pai a hih manin tupna tunna ding hanciamna pen
mitawh kidemna vive a hihi. Deihna leh kisapna ngahna dingin politics kidemna
ah kihel kul a, tupna a kimualsuah zawhloh
tak ciangin politics ki mudah lawh a hihi.
2. Uanggen luatna (hyperbole) hangin
na khempeuh a kicing ding sakna hang a hihi. A hi leh a om leikiak thuman
(natural truth) khengval gen lua-in midangte upsak na pi’n, a hong pianzawh
lohna a hihi. Thu gen mi in lah, gen theih tah ci’n a piang thei ding leh a
piang theilo ding khentello in zaugen gawp, a za mite in zong thu kigen khempeuh
khinkhai selo in pompah, a tawpna ah a kigen thu khempeuh hong tangtun loh tak
ciangin politics pen ki mudah thei hi. ( A vanglian -Supreme Being in hong
pialo hi ci’n paulap om theihloh man zong hi dinghy.) A gen mite in a piang
thu leh la, leikiak thuman bulphuh in genlo a hih manin siatna tun zaw ahihi.
Duhthu saam (wishful thinking) tawh thu a kigen ciangin a za leh a ngai mite in
sun kal, zankal a hong tung pah ding; tua bangin hong tuntak ciangin kisapna
leh deihna teng kicing ding cih kipom mawkmawk hi. Deihkaihna leh thu langgenna
(Bias) bulphuh in thugenna ah a piang/a om taktak thu kinawl khin a, tupna
bangin hong piang khinlohna hang ahihi.
3. Malsimna leh tehna om theilo (Innumeracy)
in a lompi in zau genna kihah zat luatna a hihi. A lompi (mass) huam a genna
pen mipi in sangthei na pi’n a malmal a simna leh tehna hangin mihing nuntakna
ah kisapna leh deihnate kingah thei zaw a hihna kiphawklo hi. A lompi (mass)
huam a thugenna pen a kizak laitak in a za khempeuh in lungkim na pi’n a kimuh
taktak ciangin a malmal tungah kimu a hih manin lungkim zawhlohna om thei hi.
Mipi lungkim sak henhan na pi’n mimal nuntakna ah khantohna leh kilamdanna omlo
a hih manin mite’n lungkimna ngahlo hi.
4. Guptuam paihtuam neihna (myside
bias) tawh na kisem leh zingvai kihawm a hih manin “kei lam panglo peuh ka gal”
cih lungsim neihna pian sakna hang a hihi. Guptuam paihtuam neihna mun khempeuh
lungsim kilang neihna in zui tawntung a hih manin kisiatna in zui den hi. Tupna
tunna leh deihna ngahna ding kidemna ciat-ah, siatna a pian tak ciangin Politics
in siatna piangsak hi ci’n kimawhmatna hang a hihi.
5. A gualzo pen in man hi ( Winning
proves I am right) cih lungsim puak kinei a, a thahat leh a gualzo zawzaw kiman
sakna lungsim tawh kiliat sakna kinei hi. A taktak in gualzawhna in manna (righteous)
lahna hi pahlo a, min thanzawkna (or) min ngah zawkna (popularity) hang hi zaw
htei hi. Minthanna (popularity) pen manna (Right) hi denlo hi. Gualzawhna a om tak
ciangin “kimuan khengvalna (over confidence ) kinei a, midangte thusimlohna leh
khat le khat kithupi bawllohna piang hi. A gualzo zaw deuh mite kiphatsakna a
neih lai takin a guallel zaw deuhte in maizum na nei a hih man a hihi.
Politics
sungah mihingte’ gamtatzia leh nasepzia pawlkhat a lipkhaphuai le a kihhuai
mahmah hangin a sem mihing pen muhdah ding hilo hi. Politics sungah gamtatzia,
nasepzia a om bangin Biakna (religious) sungah ah zong gamtatzia, na sepzia om
hi. Politics, Religious cihte pen a ithuai, a deih huai mahmah cihpah theih a
hihloh bangin a lipkhaphuai, a kihhuai cihpah thei ding zong hilo hi. Tuate
sunga gamtatzia, na sepziate hangin Politics, Religious cihte it huai, deih
huai maw- lipkhaphuai, kihhuai maw cih kigen thei bek ding hi. A gamta le a sem
mite in a siangtho leh a hoih in a sep leh it huai leh deih huai dinga, a nin
leh a hoihlo in a sep leh lipkhap huai in kih huai ding hi.
Dated:
December 16, 2019
Tual Khan Suan
