Zo
Minam leh Federal- Khen- 11
Galhiam
tawi Galkap le Palik
Galhiam
tawi Galkap (Army, Navy leh Air Force) limlim i kilamkhiatzia pen bulpi pan
ukna, a hih keileh tunglam pan thupiakna zui dinga kilam khia vive a hihi. Gal
le sa vai, sih le hin vai a hih manin galsiam makai khat i gelna tawh kizui a
sepna pen muimun zaw leh hoihzaw thei a hihman a hihi. Tunglam pan thupiakna
tawh ki-ukna zui a vaihawmna ahih bangin galkap nautang deihna kidonglo zaw a,
thupiakna a zuizo dingin kisinna mun hizaw hi. Tua ahih manin Political
Scientist pawlkhat in Galhiam tawi galkap pen Democracy paizia i a gal lianpen
a hihi ci’n genteh liang uhhi.
Galhiam
tawi Galkap ki-ukna pen bulpi pan (or) tunglam pan thupiakna zui na sem ding a
ki-ukna a hih manin gamsung kivaihawmna daihna a om hunlai takin mikhat bek or
mikhen khat bek in thupiakna nei in gamvai ah lutkha leh a kizui henhan ding a
hih manin tua mi i deihna bangin gambup vai kihei thei hi. Belpawl gam (Federal
State) pen thuneihna kikhen dimdiamna zui a kiphuh gam a hih mah bangin bulpi
leh a tungpan thupiak tawh ukna a nei galkap in gamvai saina sungah hong
lutkhak ciangin thuneihna kikhenna zong hong susia thei hi. Tua hangin Belpawl
gamte ah Galhiam tawi Galkap pen gamvai saina ah a lut khaklohna dingin
pilvangtak in dalkholhna leh gelna neih kisam hi.
Belpawl
gam a galhiam tawi galkapte kilamzia leh Lomkhop gam (Unitary State) a galhiam
tawi galkate kilamzia pen kilamdang hamtang hi. Banghang hiam cihleh, Belpawl
gam ah ukna thuneihna pen gambup leh gamke kikal ah kikhenkim in kihawm a,
lomkhop gam ah a hihleh ukna thuneihna kikhenna omlo a hihna hang a hihi. Ukna
thuneihna kikhenna gamsung ah, a zawdeuh in galhiam tawi galkap pen a munmun ah
kiphahzak zaw a, gambup kisapna hun bek in kilomkhat dingin gelna tawh kilam
khia hi.
Belpawl
gamte ah galhiam tawi galkap pen a munmun ah kiphahzak zawkna a hangin gamsung
ah thubuai leh thukin omloh hunin mi khatpeuh in galkapte khutzat in zangin
mimal/mi khenkhat metna ding bek in gambup thuneihna a mawk suhkhiat theihlohna
ding deihna a hihi. Gambup tawh kisai thukin, gambup bitna ding tawh kisai sa
le galvaite, gamdang khat tawh gal kidona hun ah gambup bitna dingin gambup
kumpi khutnuai ah koih theihna ding ngimna nei-in kigel ahihi.
Belpawl
gamte ah galvan tawi galkap kilamzia pen gambup kumpi thuneihna, huzap nuai a
om galkap leh gamke (state) kumpi thuneihna huzap nuai a om galkap ci’n pawlnih
in kikhen hi. Gambup kumpi ukna huzapna nuai a om galkapte pen a diakin Army,
Navy leh Airforce hi zaw a, Gambup kumpi in sinsakna (Training), galkap mite
kisapna nek le dawn, innten loten pia hi.Lamkhat pan in gen leng, gambup kumpi
tung pan khasum sang- gambup kumpi a ding nasem mite kici thei hi. Gamke
(State) kumpi ukna huzapna nuai a om galkap a hih leh, Police, gamgi zul bitna
a sai (Border Security Force-BSF) leh mipi bitna ding a sai Security Force lam
a hihi. Gampawlkhat ah gambup kumpi ukna huzapna nuai a om galkapte pen gamke
(state) sunga teng mimal (population) zui in galkap sem ding kisawl/ septheihna
kipia thei hi. A hizongin gambup galkap sunga galkap tum (service) ding pen
gambup innpi a thukhun bawlna sung pan kikhensat bang kizang zaw hi.
Belpawl
gam sunga galhiam tawi galkap kilamzia tawh kisai etteh leh sinkhiat theih ding
gam tampi om ding hi. Tua sungpan ei tawh kinaihuai pen gam a hi, India gam i
galkap lamkhiatzia a puatham tawm khat genteh leng kilawm ding hi. India gam
pen Minam neu tam mahmahna gam leh biakna tuamtuam kigawm khopna bek hilo in,
dinmun khenna (class) a hat mahmah na gam khat a hihi. Kibatlohna tam mahmah a
hih manin kibatlohna hangin buaina zong tampi a kituahkhopna gam a hihi. Gambup
pianzia zui in gamsung kilemna leh daihna a om theihna ding ngimna tawh belpawl
gam a lamkhia uh a hihi. Belpawl gam a hih zui-in thuneihna khenna (division of
power) pen gamke (state) ah kipia tek hi. Tua hi a, galhiam tawi galkap a hi, Army,
Navy le Airforce zong gambup kumpi ukna huzapna nuai ah koih uhhi. Gambup
galkap na ngawn zong minam zui in phuh khiat ding phal uhhi. Minam zui in
galkap a kiphut khiat hangin minam khat (or) mimal khat in tua galkapte khutzat
a zangin gamvai saina ah, a met dawh theihloh dingin galkap leh gamvai kikhenkhia
sak uhhi. Gambup galkap pen gambup kumpi huzapna nuai ah kikoih a, gamke
(state) sunga Police, bitna lam sai galkap (security Forces) te pen gamke kumpi
huzapna nuai ah om hi. India Prime Minister or Defense Minister a hizongin
gambup galkapte zangin panmun ngahna ding sep theih hilo hi. Tua mah bangin
gamke (state) ukna huzapna nuai a om galkap (or) police in zong a mau minam
pumgup in gambup kumpi lehdo or langpan theilo dingin kilam khia ahihi. Minam
vai in buaina a om leh zong minam zui a kiphuh khia galkap in zong a mau minam
hihna hangtawh pumgup theih hilo hi.
Tuhun
Kawlgam kilam khiatzia zui in galkap pen gambup Kumpi ukna leh huzapna nuai bek
ah om hi. Army, Navy leh Airforce bek hilo, bitna lam sai Police zong gambup
panin khasum sang or gambup kumpi ukna nuai leh thupiakna nuai a om vive a
hihi. Chin Rifle Regiment ci’n Mangkangte’n a hong phuatsak minam galkap zong
gambup thuneihna nuai ah om in, a beibei hi ta hi.
Galkap
kilamzia pen gambup kumpi (or) gamke kumpi in a mau ukna nuai a om galkapte pen
a mau i ukna leh thuneihna kipsuakna dingin a zatziau theihlohna in gamsung cidamna
leh nopsakna hong pia zaw hi. Thuneihna kikhenna zui a gambup galkap kilamzia a
zuih ding thuhoih khat a hihi. Gambup galkap pen gambup kumpi thupiak a zui
ding a hih hangin gambup kumpi in a thumanlo, a thutanglo pi in thupiak a neih
hun in gamke kumpi in zong a mau ukna nuai a om galkapte a diklo le a manlo
thupiak zuilo dingin thupiak kik theihna pen thumanlo thupiak dothuk thei hi.
Gambup galkap sungah minam khat (or) gamke khat bek pan in a langsang a tamzaw
tawh kiphuh khia hileh gamke dangte a ding leh gambup a ding in lauhuai thei a
hihi. Gamvai sai makai khat, Party khatpeuh in gambup galkapte khutzat in a zat
theihlohna dingin gambup leh gamke in a kisam bangin galhiam tawi galkap
neihtuak pen belpawl gamte in zang hi.
Date
January 20, 2020
Tual
Khan Suan
