Tualsuak mite’ Hamphatna Tungah Leitungbup Minam Kipawlna Thupuan:

Tualsuak mite’ Hamphatna Tungah Leitungbup Minam Kipawlna Thupuan:

(United Nations Declaration on the Rights of Indigenous Peoples)

 

Thukhil 1

Leitungbup minam kipawlna i kiciamna laipi, Khuavannuai Mihing Hamphatna Tangkona leh Leitungbup tawh kisai mihing hamphatna thukhun tuamtuam i theihpihna, san leh zuih a kinei mimal khatsim (or) mihon i suahtakna thuguipi leh mihing hamphatna khempeuhte pen Tualsuak mite in zong a vek sitset in ngahkim in nopsak theihna ding hamphatna nei uhhi.

Thukhil 2

Tualsuak mite leh mimal kim in minam dangte leh mimal dangte tawh a kibangin suahtakna leh tanhkikimna nei uh a hih manin a maute i tualsuak mi hihna,  zia le tong khatpeuh paulap a zang-in khentuamna neilo in hamphatna ngahna thei ding uhhi.

Thukhil 3

Tualsuak mite in a mau vai ah a mau deihtel khensat theihna hamphatna nei uhhi. A maute in gam leh minam vai, sumsinna vai, khotang nuntak zia leh ngeina tawh kisai khantohnate ah a mau deihna tawh suakta tak in khensat theihna ding hamphatna nei uhhi.

Thukhil 4

Tualsuak mite in a mau i deihtel khensatna zangin a mau i sungkuan vai leh tualsung vai tawh kisai thute ah a mau leh a mau in ukna nei in vaihawm thei ding ban-ah, tua bang vaihawmna ding a kisam sum leh pai ngahna dingin suakta takin zon theihna ding hamphatna nei uhhi.

Thukhil 5

Tualsuak mite in a mau gam le minam vai, thukhun vai, sumsinna vai, khotang hinkhua vai leh ngeina vai-ah a maute i tuamdannate kepcingna leh hatsakna ding hamphatna nei uh a, a maute i tenna gamsung a gam le minam vai, sumsinna vai, khotang hinkhua vai leh ngeina vaite ah a mau deihtelna bang-in kihel theihna ding hamphatna nei uhhi.

Thukhil 6

Tualsuak mimal khatsim in gammi, minam suah theihna ding hamphatna nei hi.

Thukhil 7

(1)  Tualsuak mi khatsim in nuntakna, pumpi leh lungsim cidam thahatna, zalenna (suahtakna) leh mimal i lungmuanna ngah theihna ding hamphatna nei hi.

(2)  Tualsuak mite in a tumdang minam hihna tawh suaktakna, daihna leh bitna nei-in tenkhop theihna ding hamphatna nei uhhi.  Tualsuak mite i naupangnote pen minam dangte tungah thagum hatna zangin khumlutna, minam beisiang na ding a thahna leh ngongtatna nam khatpeuh tualsuak mite tungah kizang theilo ding hi.

Thukhil 8

(1)  Tualsuak mite leh mimal kim in a mau i neihsa ngeina zia leh tongte siatsakna ding leh beimang na ding ngimna tawh minam dang khatpeuh i ngeina sungah gawmlut sakloh na ding hamphatna nei uhhi.

(2)  Gam kumpite in tualsuak mite i suahtakna bittak in a kepcing na dingin a kisam vanzat leh nasepte a piak ding ban-ah hih a nuai a vaite zong gelsak ding hi.

a.      Tualsuak mite pen a tumdang mite hihna tawh a mau minam dinkipna, a mau ngeina manphatna leh minam hihnate ngimna nei a siatsakna ding nasepna khatpeuh pan-in humbit ding hi. 

b.      Tualsuak mite neihsa leitang, luahsa gamlei leh leitung leikiak sumpiang khempeuh ngimna nei a siatsakna ding nasepna khempeuh pan in humbit ding hi. 

c.      Tualsuak mite hamphatna khatpeuh a siasak leh a linglawngsak thei ding thagum zang a munsuanna leh lalsakna khempeuh pan in humbit ding hi. 

d.     Minam dangte’ minam leh ngeina sungah thagum zangin gawmlutna leh minam beimangna ding ngimna tawh nasep khempeuh pan in humbit ding hi. 

e.      Tualsuak mite langpan in minam deidanna leh minam sung kisiatna ding ngimna tawh hanthotna khempeuh pan in humbit ding hi. 

Thukhil 9 

Tualsuak mite leh mimal kim in a mau i minam ngeina leh tawnzia tawh kituak tualsuak minam leh khotang nuntakna khatpeuh sungah kihel theihna leh minam suahtheihna hamphatna nei hi. Tua bangin a mau suahtakna a kizatna ah deidanna om theilo ding hi. 

 

Thukhil 10 

A mau leitang leh luahsa gamlei pan in thagum hatna zangin tualsuak mite kihawl khia theilo ding hi. Thuzak sak kholhna, tualsuak mite thukimna, a kilawm a kituak liausum piakna, a kisapna leh ciahkik, tenkik theihna ding thukimna om masa lo in thagum hatna zang a mun leh mual suanna khatpeuh kisem theilo ding hi. 

 

Thukhil 11 

(1)  Tualsuak mite in a mau minam ngeina paizia, pupa zia le tongte suaktak tak in zat theihna leh thaksuah sakna nei thei ding uhhi. Tua thusung ah  a mau minamte i ngeina lahkhiatna thute tawh kisai khang tangthu ciamteh mun manphate, ngeina manphate, lim kigelhte, kithoihna vante, set (khawl) vante, muh theih ngeina lahna limte leh laite khempeuh a beisa, tuhun leh mailam ah kepcing theihna, venbit theihna leh puahphat theihna kihel hi. 

(2)  Tualsuak mite i phalna omlo pi a kisuhsak (or) a mau i thukhun, ngeina leh pupa tawnzia tawh kituaklo pi a kilak khiat sak biakna leh kithoihna, pilna siamna tawh kisai thu muhna, leh ngeinate pholhkhiat kik theihna, kepcin theihna, venbit theihna dingin gam kumpite in gelna nei in nasem ding hi. 

Thukhil 12 

(1)   Tualsuak mite in a maute i tual biakna leh paii-na, pusha pasha kithoihna, ton leh aihnate sem thei, sinsak thei, zuun thei leh pulak khia thei ding uhhi. A maute i biakna leh ngeina tawh kisai kithoihna munte zang thei, zuun thei, vengbit thei ding uhhi. Biakpiakna van tuamtuamte, pu leh pa hanmual cihte kemcing leh ngah kik theihna ding hamphatna nei uhhi.

(2)   Tualsuak mite i lunggulhna om bangin biakna vanzat tuamtuamte leh mihing guh le tangte siangtho leh thutang lampi zangin a ngahkik theihna ding leh a zatkik theihna dingun gam kumpite in gelna hoih nei in nasem ding uhhi.

Thukhil (13)

(1)  Tualsuak mite in a mau i tangthu, pau, kamgen tangthu, thuthuk ngaihsutnate, lai mal leh laite a mau i khangsawnte tungah a kizat suak theihna dingin puah in thaksuak sak theihna ding leh a maute i minpiak sa mun leh mualte, mihing minte kepcing leh zatsuak theihna ding hamphatna nei uhhi.

(2)  Hih tualsuak mite i ngah ding hamphatnate gam le minam, thukhun leh ukna vai ah kicingtak in a kingah sak leh a kidalsakna dingin gam kumpite in gelna nei in na sem ding uh a, a kisapna zui in a kilawm pen paidan kibawl ding hi.

Thukhil (14)

(1)  Tualsuak mite in a mau deihna zui-in siamsinna leh thusinna munte phuh khia in vaan thei ding uhhi. Tua ban ah a maute i ngeina tawh kituak in hilhna leh sinsakna zong nei thei ding uhhi.

(2)  A diak in tualsuak naupangnote in deidanna khatpeuh mah omlo in gamsung a kisin pilna leh siamsinna nam khempeuh sin theihna ding hamphatna nei uhhi.

(3)  Tualsuak mite’ naupangnote in koi mun koi mual ah a om zongin a mau i ngeina tawh kituak a kibawl siamsinna a ngah theihna dingun gam kumpite in gelna hoih nei in na sem ding uhhi.

Thukhil (15)

(1)  Tualsuak mite in a mau’ ngeina, pupa tawnzia, tangthute i manphatna leh tumdannate pen siamsinna leh mipite theih dingin lahkhiat theihna ding hamphatna nei uhhi.

(2)  Khotang nuntakna khat sunga tengkhawm mihing dangte leh tualsuak mite kikal ah kigimneihna leh kideidanna beina ding, thukhual tak a kizopna hoih leh kitelsiamna lapsangna dingin gam kumpite in gelna hoih nei-in na sem ding uhhi.

Thukhil (16)

(1)  Tualsuak mite in a mau pau tawh thu kizakna nei thei ding uh a, minam dangte pau a thu kizaknate zong deidanna omlo in zat theih, ngah theihna ding hamphatna nei uhhi.

(2)  Kumpi neihsa thu kizakna leh gam mi neihsa thukizakna tungtawn in tualsuak mite i a tumdang ngeina leh pupa tawnziate lahkhiat theihna dingin gam kumpite in gelna hoih nei in na sem ding hi.

Thukhil (17)

(1)  Tualsuak mite leh mimal kim in leitungbup nasemte thukhun leh gamsung nasemte thukhun (labor law) sunga kigelh hamphatna khempeuh a kim in ngah thei ding uhhi.

(2)  Sumsinna ah metdawhna leh a luahuai mun ah nasep sawlna (or) naupangte siamsinna buaisakna, pumpi, lungsim, kha khantohna ding a siasak thei nasepnate khatpeuh tualsuak mite leh naupangte in a thuak lohna dingin gam kumpite in gelna hoih nei in na sem ding hi.

(3)  Tualsuak mimal kim in nasepna mun hoih leh hoilhlo, nasep nam, khasum tawh kisai thute ah minam dang tawh deidanna omlo in ngah theihna ding hamphatna nei hi.

Thukhil (18)

Tualsuak mite in a maute’ ki-ukna paizia zui a kitel taangmi tungtawn pan in a maute’ hamphatna leh vaite khensatna ah kihel thei ding uh a, a mau thu leh vai kikupna leh vaihawmna paiziate kepcingna leh lapsang theihna ding hamphatna nei uhhi.

Thukhil (19)

Tualsuak mite a sukha ding vaihawmna leh thukhun gelna a om ciangin a maute i phalna leh thukimna lak masak theihna dingin gam Kumpite in tualsuak minamte i tangmite tawh kikum in nasem khawm ding hi.

Thukhil (20)

(1)  Tualsuak mite in a mau’ gamsung vaihawmzia, sumsinna leh khotang nuntakziate ah a mau’ deihna tawh kituak in lungmuang tak in a khosak theihna dingun gamvai, sumsinna vai leh khotang nuntakna vai ah a mau i paizia tawh kituak in suakta tak in sep theihna leh bawl theihna ding hamphatna nei uhhi.

(2)  Tualsuak mite in a maute i nuntakna ding leh khantohna ding a kisam nate thumanlo pi in a kisuhsak ciangin a suakta leh a thuman lampi zui a thukhenna zangin ngah kik thei ding hamphatna nei uhhi.

Thukhil (21)

(1)  Tualsuak mite in deidanna omlo in sumsinna leh khotang nuntakna, siamsinna, nasepna, nekzonna sangkahna leh thusinna, inn le lo, sianthona, cidamna leh mimal bitnate tawh kisai hamphatna ngah thei ding uhhi.

(2)  Tualsuak mite i sumsinna leh khotang nuntakna a khattohna ding ngimna nei in gam kumpite’n gelna hoih nei in nasem ding uh a, a diak in khangham mite, numeite, khangnote, naupangte leh zawmna a nei mite kisapna leh hamphatnate mitsuan masak in nei ding hi.

Thukhil (22)

(1)  Hih Tangkona sunga thute a kisep khiatna dingin khangham mite, numeite, khangnote, naupangte leh zawmna nei mite kisapnate mitsuan masa ding hi.

(2)  Tualsuak numeite leh naupangte in a kicing vengbitna a ngahna ding leh a maute tungah ngongtatna leh deidanna a om lohna dingin gam kumpite in gelna hoih nei in nasem ding uhhi.

Thukhil (23)

Tualsuak mite in a mau i khantohna ding mitsuan masak theihna ding sepziate geltheihna leh khensat theihna ding hamphatna nei uhhi. Tualsuak mite in cidamna, inn le lo, sumzon paizonna, leh a maute a sukha thei ding khotang nuntakna vaite gel leh vaihawmna ding phualpi phuh in thukhensatna ah a mau mahmah kihel theihna ding hamphatna nei uhhi.

Thukhil (24)

(1)  Tualsuak mite in a mau i cidamna ding a kizang singkung lopa, ganhing leh leikiak sumpiang vante zangin kikhoi kikepna leh a maute i ngeina zatuite bawltheihna, zat theihna leh kepcing theihna ding hamphatna nei uhhi. Tualsuak mimal kim in zong mi khempeuh a ding kibawl mihing tangsapna leh cidamnate deidanna omlo in ngah thei ding hi.

(2)   Tualsuak mite in a sang pen pumpi leh lungsim cidamna nei nuntakna a neih theihna dingin midangte tawh a kikim hamphatna nei uhhi. Hih hamphatnate a kingah na dingin gam kumpite in a kisam gelna leh sepna nei ding uhhi.

Thukhil (25)

(1)  Tualsuak mite in a mau’ ngeina leh neihsa a tumdang tualbiakna tawh kisai leitang, huang, tui leh tuipi piau leh a dang leikiat van manphate venbit, kepcing theihna leh a maute i khangsawn suan le khakte tungah gou leh gam luahsuk sak theihna ding hamphatna nei uhhi.

Thukhil (26)

(1)  Tualsuak mite in tanglai hun pek pan in a mau i neihnsa leitang, luahsa gamlei leh hauhna manpha nate tungah thuneihna nei uhhi.

(2)  Tualsuak mite in tanglai hun pek pan in a maute i neihsa leitang, luahsa gamlei leh hauhna manphat nate kipbitna, zatna, puah le zuunna, zeekna ding hamphatna nei hi.

(3)  Gam kumpite in tualsuak mite’ neihsa leitang, luahsa gamlei leh hauhna manpha nate tungah thukhun bawl in theihpihna leh venbitna pia ding hi. Tua bangin theihpihna a piakna ah tualsuak mite i pupa dante, zia leh tongte leh leitang hawmzia tawh kituak in sem ding hi.

Thukhil (27)

Tualsuak minamte in a mau leitang, huang leh nuntakna ding a kisam nate a kepsuak theihna dingun a maute i thukhunte, ngeinate, zia leh tongte, pupa tawnziate leh leitang hawmzia tawh kituak in Kumpi gamte in a thutang, a tangdin, thu lang genlo leh siangtho tak in thukhun bawl in theihpihna pia ding hi. Tua bangin vaihawmna sepna ah tualsuak minamte zong kihel theihna ding hamphatna nei uhhi.

Thukhil (28)

(1)  Tualsuak mite in tanglai pek pan a neihsa uh a maute i phalna leh thukimna om masa lo a kisuhsak leitang, luahsa gamlei leh hauhna manpha nate khempeuh pen a thutang thukhun zui-in ngahkik theihna ding leh liausum ngah theihna ding hamphatna nei uhhi.

(2)  A kibang lian in tua leitang, luahsa gamlei leh hauhna manpha nate ngah kik theilohna a om leh tualsuak mite lungkimna om bangin a maute supna leh baina khempeuh tawh a kituak a kilawm dingin liausum kipia ding hi.

Thukhil (29)

(1)  Tualsuak mite in a maute neihsa leitang, luahsa gamlei leh hauhna manpha nate i kim leh kiang venbit theihna, khansuah theihna, kepcing theihna ding hamphatna nei uhhi. Gam kumpite in deidanna om hetlo in tua bang kepcing leh venbitna a kisep na dingin gelna nei in nasem ding hi.

(2)  Gam kumpite in tualsuak mite i phalna leh thukimna omlo in amaute’ neihsa leitang, luahsa gamlei sungah cidamna a siasak thei van kholna, paihnate nei theilo ding hi.

(3)  Natna a piangsak thei ding vante hangin tualsuak mite i cidamna a siatsak leh a maute khoina ding, kidalna ding leh cidamna etcik na ding a kisam zatui, zaha leh van khempeuh ngahsak thei ding hi.

Thukhil (30)

(1)  Tualsuak mite i bitna leh metna (or) thukimna, ngetna omlo pi in a maute neihsa leitang (or) luahsa gamlei sungah galvai savai tawh kisai in galkapte gamtatna limlim kibawl theilo ding hi.

(2)  Tualsuak mite neihsa leitang (or) luahsa gamlei sung ah galkap nasepna khatpeuh gambup mipite bitna dingin zatloh phamawh hun a om a leh gam Kumpite in a kilawm a kituak paidan lampi zui dingin nasem ding uh a, tualsuak mite tawh kisai kipawlna leh tangmite tung pan in phalna leh thukimna lak masak ding gelna nei in na sem ding uhhi.

Thukhil (31)

(1)  Tualsuak mite in a maute i luahsuk ngeina, ngeina thuciinte, ngeina lahkhiatna leh siamna tuamtuamte kepcingna, venbitna, zatna leh puahna ding hamphatna a neih ban-ah, a mau neihsa nate telsuina, set (khawl) vante, hauhna manpha nate, khaicite, zatuite, gamsa lopate minlawhna, tangthu genna, lai, limte, ngeina kimawlna vante, mit tawh kimu thei ngeina lahna limte lahkhiat theihna ding hamphatna nei uhhi. Tualsuak mite in a maute i luahsuk ngeina, ngeina thuciinte leh ngeina kizepnate kepcingna, venbitna leh puahna ding hamphatna nei uhhi.

(2)  Hih hamphatnate tualsuak mite in suakta takin a zat theihna dingun gam Kumpite in tualsuak mite deihna tawh kituak in gelna nei in na sem ding uhhi.

Thukhil (32)

(1)  Tualsuak mite in a maute’ leitang, luahsa gamlei leh huahna manpha nate zatna (or) zekna ding vaite gel kholhna leh khensatna ah koi masak zaw ding cih tel theihna nei uhhi.

(2)  Gam Kumpite in tualsuak mite’ neihsa leitang, luahsa gamlei leh hauhna manpha nate a sukha thei ding zonna, zekna, zatna a neih ut zenzen leh tualsuak mite phalna leh lungkimna ngahna dingin a maute kipawlna, tangmite tungtawn in thukimna la masa ding hi.

(3)  Gam Kumpite in tualsuak mite i neihsa leitang, luahsa gamlei leh huahna manpha nate zangin nasep ding a sawm uh leh tualsuak mite i kim leh paam, sumsinna, khotang nuntakna, ngeina leh biaknate  a siasak lo dingin gelna nei in nasem ding uhhi.

Thukhil (33)

(1)  Tualsuak mite in a tumdang ngeina leh pupa tawnzia zui in minam hihna khensat theihna (or) minam dangkhat sungah pawlmi suahna ding hamphatna nei uhhi. Hih thu in a maute tenna gam ciat-ah gammi suahna ding tawh kisai in tualsuak mimal sim nawngkai sukha lo ding hi.

(2)  Tualsuak mite in a maute i ngeina paizia tawh kituak vaisai-na phualpi phuh theihna leh pawlmi ding telkhiat theihna ding hamphatna nei uhhi.

Thukhil (34)

Tualsuak mite in  leitungbup mihing hamphatna thuguipite tawh kituak in a maute i tualsung vaisaina phualpi leh tumdang ngeina paiziate, pusha pasha biakna, pupa tawnzia, tualsung vai hawmna leh paiziate, ngeina thu khenzia leh ngeina paizia kepcing theihna, puah theihna leh lapsang theihna ding hamphatna nei uhhi.

Thukhil (35)

Tualsuak mite in a mau tualsung vai tawh kisai ah mimal kim i mawhpuakte khensat theihna ding hamphatna nei uhhi.

Thukhil (36)

(1)  Leitungbup gamgi khenkhapna sunga teng tualsuak mite in biakna, ngeina, minam le gamvai, sumsinnate ah a mau’ tenna gamhuam sunga om mite a ding; gamdang huamsung a om midangte a tawh metna ngah khopna dingin kipawlkhawm in nasep theihna leh kikawm kizop theihna ding hamphatna nei uhhi.

(2)  Hih hamphatna khempeuh tualsuak mite in kicingtak in a ngah theihna dingin gam kumpite in a kisam gelna hoih nei in na sem ding hi.

Thukhil (37)

(1)  Tualsuak mite in a maute tenna gam-ah thukimna laipite leh thuhoih gelna thukimna laipi tuamtuamte pen a mau mahmah in sittel in kipsakna leh sepsuah theihna ding hamphatna nei uh a, gam kumpite in tua thukimna laipi tuamtuamte zahtaksak leh kepbit sakna ding mawhpuakna nei uhhi.

(2)  Tualsuak mite i thukimna laipi leh gelna hoih thukimna laipi tuamtuam te a siasak thei ding, a beisak thei ding deihna nei in hih thupuan sungah om kammal khatpeuh kilet khia theilo ding hi.

Thukhil (38)

Hih thupuan a tangtun, a lawhcin leh a kisepsuah theihna dingin gam kumpite in thukhun bawlna zangin a kilawm, a kituak gelna nei in nasep na tawh mapang ding hi.

Thukhil (39)

Tualsuak mite in hih thupuan sunga om thukhil khempeuh a vek in a ngah kim theihna dingin gam kumpite leh leitungbup kipawlnate tung pan sum leh pai huhna, pilna siamna huhna ngah theihna ding hamphatna nei uhhi.

Thukhil (40)

Tualsuak mite in gam kumpite (or) pawldang khatpeuh tawh kikal a om buaina leh kilemlohnate a vensak na dingin thutang leh thulai gen paidan tawh thu khensatna ngah thei ding ban-ah, a maute i mimal leh mihon hamphatna siatsakna a omte pan in damsakna ding malakna ngah thei ding uhhi. Tua bang thukhenna a kineih na mun ah, a maute i ngeina, pupa tawnzia tawh a kituak thukhenna leh leitung bup mihing hamphatna tawh kituak ngaihsutna bulphuh in kinei ding hi.

Thukhil (41)

UNO kipawlna leh UNO kahiang a tuamtuam, leh gam kumpi tuamtuam kipawlnate in hih thupuan sung a om thukhil khempeuh a kisep suah zawhna dingin sum leh pai huhna, pilna siamna huhna pia ding hi. Tualsuak mite tawh kisai thu le la khatpeuh kivaihawmna ah a mau a kihel theihna ding kongpi kihon sak ding hi.

Thukhil (42)

UNO kipawlna leh pawlmi gamte, UNO i kahiang tuamtuam kipawlnate, tualsuak mite kipawlna leh gam kumpite in hih thupuan sunga om thukhil khempeuh a kim in a kisepsuah na ding leh a kizahtakna dingin nungzuih in na sem ding hi.

Thukhil (43)

Hih thupuan sunga theihpihna kipia hamphatnate pen leitung a om tualsuak mite in nuntak khuasakna, vaang leh cidam ludam in nuntakna pha a ngahna ding a kisam penpen thute a hihi.

Thukhil (44)

Hih thupuan sunga theihpihna kipia hamphatnate leh suahtaknate pen tualsuak mite sung a om numei leh pasal khempeuh tungah a kikim in kingah sak ding hi.

Thukhil (45)

Hih thupuan sunga thukhil khatpeuh tualsuak mite i hamphatnate a siasak thei ding leh a maute’ mailam khaktan thei ding ngimna tawh kuamah in deihkaihna tawh tei khia theilo ding hi.

Thukhil (46)

(1)  Gam khatpeuh, mi khatpeuh, mihon kipawlna (or) mimal khatpeuh in hih thupuan sungah thukhil khat peuhpeuh pen UNO Kiciamna laipi tawh kituak lo gamtatna leh nasepna a hi zongin, gamlei kithu hualna, gam leh minam kipum khatna leh suahtakna khenkhat (or) a buppi in a hizongin a suksiat theihna dingin thuneihna kipia bangin deihkaihna tawh tei khia theilo ding hi.

(2)  Hih thupuan sung a om hamphatnate a kizatna ah mihing hamphatna leh bulpi suahtaknate zahtakna tawh kizui ding hi. Hih thupuan sunga om hamphatnate pen leitung bup mihing hamphatna tawh kisai zuih ding mawhpuakna huangsung ciangbek pen gambup thukhun in dinkhawl sak thei ding hi. Tua bang dinkhawl sakna a om leh zong kideidanna leh zawhthoh thu a vaihawmna hilo ding a, democracy vaihawmna nuai a kisapna leh hamphatnate zahtakna hang bek hizaw ding hi.

(3)  Hih thupuan sunga kigelh thukhilte pen thutanna, democracy, mihing hamphatna thu guipite zahtakna, tanhkikimna, kidendanna beina, vaihawmna hoihna leh lungmuana a omna ding deihna bulphuh in kitei khia ding hi.