USA gambup President kitelna pen USA gammi bek hilo in, leitung gam tuamtuam a teng gam makaite, mipite in lunglut in bil dawh mahmah hi. A hang tampi om ding a, tua sungah mi khat leh khat a lunglutna hang a kibat kimloh ding hangin a tamzaw lunglutna in USA gambup President i makaihzia in leitung gam tuamtuam dep zo a hihman hi pen kha ding hi. Cihnopna ah, USA gambup President vaihawmna leh kalsuanna lam-ah leitung gam tuamtuam in a etteh, kihei a hih man a hihi.
USA gambup President a sem ding mi pen kum (4) hal ta in kitelna kibawl a, November kha, Nipi kal masa pen i Thawhleh ni (Tuesday) ta in mipi in vote tawh tel hi.
Kua bang mite in USA gambup Lutangpi panmun dem thei ding hiam?
USA gambup Thukhunpi Article 2, Section 1, Clause 5 na sungah, gambup President panmun a dem thei ding mite pen:
1) USA gamhuam sung a suak gam mi hi ding;
2) Kum (35) a cing khin mi hi ding leh
3) USA gamhuam sungah kum (14) sung a teng suak mi khat hi ding cin kician tak in na gelh hi. Hih thu (3) tawh a kicing mi khatpeuh in USA gamsung ah President panmun a dem thei a hihi. USA gambup President a dem sawm mi khatpeuh in Vote zonna dingin sum zonna leh sum zatna ah $5000 (Tul nga) tungsiah a ngah, a zat leh Federal Election Commission (FEC) tungah register bawl kisam hi.
USA gam kiphuh cil pan in tu ni ciang gambup President panmun a sem a tamzaw thamtham pen Politics sem ngei khin mite vive hizaw hi. A hizongin gambup President a sem mite sung pan in Galkap mangpi a sem ngei Dwight D. Eisenhower a hizongin, Sumbawl siam Donald J. Trump a hizongin kihel kha hi. Gambup President a sem a tamzaw pen Degree ngah khin vive hi zaw a, tua sungah Law Degree ngah khin a gambup President a sem vekpi i a lang bang pha hi. Christian biakna a bialo mi khatpeuh in gambup President panmun a sem dingin kitel ngei nailo a, tuni ciang dong mah numei zong gambup President panmun sem ngei nailo hi. Gambup Lutangpi panmun a semte pen Barrack Obama cih loh Cikang vive a hihi. (Harvard Sangpi pan sang zo mi (8) om a, Virginia gamke a suak zong mi (8) mah om hi).
Gambup Lutangpi panmun a sem ut mite in Vote zon hun pen leitung gam dangte banglo in hun sawtpi huam, hun sawtpi kipia hi. France, UK leh Kawlgamte banglo in gambup thukhun sungah vote zon hun ding kiciangtanna hun omlo a hih manin President panmun a dem ut mi khat in a ma i deih zahzah vote zonna ding hun ngah hi. Tua a hih manin khatveivei vote zon hun pen kha (18) bang sawt thei hi.
Nominee leh Candidate ngah theihna ding paizia:
USA gambup President panmun kitelna ah lut theihna dingin lampi zuih ding siksan (steps) tampi om hi. Caucuses a kici tualsung khawmpi pan deihtelna, Primaries a kici gamke huam a kitelna leh Political conventions a kici Party gambup kikhopnate pan telkhiatna ngah kul hi.
Caucus- Political Party makaihna tawh a mau party aitangin kitelna ah Party a thapia candidate a mi zon khiat theihna dingin a munmun a phualphual a om party pawlmi te kimuh khopna, kikupna hi a, a mau (mipi) aitang in a muan pen uh telkhiatna (selection process) mun a hihi.
Primary- Gamke huam a kibawl gambup President panmun a dem ding mite sung pan mipi leh party members te in vote tawh telkhiatna hi a, vote a tam ngahngah pen in a gualzo a hihi.
President kitel kum ding a cin ma kum Spring khuahun (Mar-May) sungin President panmun a dem nuam mi khatpeuh in a dem utna thu tangko khia hi. Kitel kum ding a cinma kum khuakhal -Summer (Jun- Aug) hun pan kitel kum ding Spring khuahun (Mar-May) sung in hih caucus leh primary kitelna zawh siang hi a, tua sungah party candidates khat leh khat a mau party sungah kinialna (debate) a kisapna zui in bawl in, a mau party sung pan in President panmun a dem ding a kituak pen zon khiat hun a hihi. Kitel kum Jan-Jun kikal sungin Gamke leh party makaihna tawh primary kitelna kinei hi. Jul-Sep kikal sungin Party in gambup khawmpi (Party Convention) bawl a, President ding sehkhiatna (nomination) nei uhhi. Party Gambup Khawmpi pan Gambup President ding a sehkhiatna a ngah mite pen Party aitang a kidem ding a hihi.
Political Party Convention
Caucus leh Primary khawmpi neih khit ciangin Party te'n gambup khawmpi nei uhhi. Tua Gambup khawmpi ah Party tangmi te in a mau Party tang a Gambup President leh Vice President a dem ding mite kipsakna nei uhhi. Gambup President panmun a dem ding Party aitang in sehkhiatna (nomination) a ngah mite pen caucus leh primary khawmpi a kitel khiatna pan a zo penpen a hihi. A zenzen in a zo mi a om kei leh party gambup khawmpi a kah tangmi te in tel khia uhhi. Hih Party Gambup khawmpih ah President ding a sehkhiat mi (Nominee) in a mah seppih ding Vice-President ding tangmi leh mipi lakah tangko khia hi.
USA gamah Political Party kidemte
USA gamsungah party lian nih om a, Democratic Party (Liberal) leh Republican (Rightist) party a hihi. Republican party pen USA gamsung ah Grand Old Party (GOP) ci'n zong kithei hi. Tualo party dang Libertarian party, Green Party leh Independent pan in zong President ding kidem zel hi.
Kitel ni (Election Day)
USA gambup President kitelni pen November kha nipi kal masa pen Thawhleh ni (Tuesday) ni in kinei hi a, tungkha nisim ni simna zui-in tua ni hi ci'n kiciamteh lo zaw hi. Kitel ni taktak a tun ma hun, ni (15) val sung bang pen vote khiat kholhna (early voting) ci'n vote kikhia ta hi. ( Kitel ni a mi tam lua leh nasep tamlua ding pelhna khat a hihi.) Voters te in gambup a ding President leh Vice President ding a deih pen vote a piak uh hangin USA gam kitelzia paidan ah gamke sunga vote tawi mite (Electoral College) te khutsung ah vote a ap hi kici thei hi. USA gambup President kitel pen Direct vote tawh President ding a tel a bat hangin Indirect vote zang a, a tel a suak hi.
Electoral College
USA gam ah President leh Vice President kitelna ah a zo (or) a lel a khensat ding pen Electoral College pan Vote tang kisim a hihi. Mimal buppi i vote tang tawh kikhensat lo hi. Gambup sungah Electoral College Vote tang 538 om hi. Gamke khat sim in Senator leh Representatives a neih uh kigawm zahzah vote tang nei uh a, Washington D.C in vote tang (3) nei hi. President ding a dem mi khat in Electoral College vote tang 270 a ngah leh a cing in kitangko hi. A zenzen in a kidem mite sung pan in vote tang 270 a ngah zo a om kei leh House of Representatives in President ding tel a, Senate in Vice President ding tel ding hi. Hih bang thu pen piang mengmeng lo a, 1824 kum bek in khat vei piang hi. ( Electoral College Vote tang pen December kha in khia pan hi.) Electoral College Voting pen USA gam phuh cillai pen a nakpi tak a kikupna tungtawn a kibawl hi a, gamke lianzaw leh mitam zaw gamke te in gamke neuzaw leh mi tawmzaw gamkete a mau deih dan bek tawh talkaih gawp theihlohna ding ngimna tawh kibawl a hihi.
USA gambup President kitelna ah mimal tamzaw vote ngah na pi'n President kigelna ah ngahlo cih om thei hi. Gamke (state) leh District of Columbia ah mimal tamzaw vote a ngah penpen in Electoral Vote a ngah hi sam na pi'n gambup ah mimal a tamzaw (popular vote) a kigawm teh a ngahzah (result) a tuampi suak thei hi. USA gam tangthu ah 1876 kitel, 1888 kitel, 2000 kitel leh 2016 kitel ah zong popular vote a ngah tamzaw te in Electoral College Vote tawh President a cing a hihi. Bang ci bang a piang thei hiam cih leh 2016 kitelna ah California (CA), Pennsylvania (PA) leh Texas (TX) gamke (3) en le hang:
CA - 8,753,788 Democratic votes kikhia Vs 4,483,810 Republican votes kikhia = 55 Democratic electors
PA - 2,926,441 Democratic votes kikhia Vs 2,970,733 Republican votes kikhia = 20 Republican electors
TX - 3,877,868 Democratic votes kikhia Vs 4,685,047 Republican votes kikhia = 38 Republican electors
Total - 15,658,117 Democratic votes kikhia Vs 12,139,590 Republican votes kikhia vekpi hi a, a hizongin Democratic electors (55) vs Republican electors (58) in gamke kitelna i zawhna zui in kipia hi.
Hih gamke (State) thum teng a Democratic Party Vote pia zah mimal gawm vekpi a tawm zawk hangin, PA leh TX state te ah Republican in zo a hih manin Electoral Vote tang pen Republican in a ngah a hihi.
Electoral College Vote pen kitel zawh kum thak January bul lam in khia uh hi. Kitelna pan a ngah President in January 20 ni in gambup President ding in kiciamna nei hi.
