2020 USA gam kitelna tawh kisai Thu-um mi khat i muhna
USA gam sungah a teng ngiat Zomi thu-um mi zong, midangte zah in a tam nai loh hangin, hunk hop khat om ta a hih manin USA gam ki-ukna leh Kumpi sem ding kitelna zong nidang sangin kilung lut zaw ta hi. Lunglut loh theihloh zong hita hi. A hangin, thu-um Zomi tampi nuntakna (life) tawh zong kisai kha ta a hih man a hihi.
Zomite lunglut diak hun bek hilo in, tutung (2020) USA President kitelpi zong USA gam tangthu a dingin a buai huaina lam ah a beisa hun sangin suksia zia hi ci leng kikhiallo ding dinmun ah om hi.
USA gamsung a teng thu-um Zomi tampi tak in tulai tak a President a sem Donald J. Trump pen a deih zawkna a hang tampi tak in pulak hi. A langkhat ah a dem pa Joseph Robinette Biden Jr. @ Joe Biden pen a deih a om hangin a deihlo zong tampi om hi. Zomite pen thu-um mi a hih bangin Donald Trump leh Joe Biden a kideihna leh a kideihlohna pen a hang tampi tawh ki-en lo a, thu upna (Christian Upna) tawh kituak maw, kituak lo cih tawh a kikhensat ziau a hihi. Gentehna in Kumpi khat in a neih ding Foreign policy, Economic policy, Social Policy leh a Dangdang policy tawh kigentehna tamlo hi. Thu-um Zomite in Donald Trump a deihna pen Laisiangtho tawh kituak, Israel te panpih cih tawh za-ah-za kideih a hihi. Joe Biden a kideihlohna pen Laisiangtho tawh kituaklo, Israel te panpih lo cih tawh za-ah-zah kideihlo a hihi.
Tua tawh kizom in Thu-um mi tampi tak bek hilo, Pasian thuhilh Tuucing (Pastor) tampi tak in Donald Trump in a ngah leh Pasian deihna bangin USA gam ki-uk ding a, Joe Biden in a ngah leh USA gam pen Dawi gam suak ding, (Joe Biden pen Dawimangpa mizat hi cih zah dongin) lai gelh in kigen hi.
Tua hang mah in zong Pasian thu-um mitam pi tak in USA gam ah Donald Trump in President a ngahna ding thungetna nakpi tak in (pawlkhat in antang in) kinei hi. Pawlkhat bangin Pasian kamsang in Donald Trump mah in President sem ding ci'n tatsatlo in thu kingen hi. ( Thu-um mite in ei ma deih thu khempeuh a hong pia thei pa, Pasian tungah i ngen a, a hong pia ding pen i biak Pasian a hihi. A zenzen in i thu ngetna Pasian in a hong piak kei leh, ei a ding a hoih zaw Pasian gelna hi cih pen thu-um mite sanna a hihi).
Zomite i muhna leh tehna pan in Pasian thu-um leh Pasian thu-umlo cihtawh i teh hi. Tua a hih manin USA gam a President kidem (2020 kum) mi nih:- Donald Trump leh Joe Biden kua ci bang mi hi uh hiam cih theih ding zong kisam hi.
Donal Trump kua a hih hiam?
Donald J. Trump pen Germany pan a lal (immigrant) Frederick C. Trump leh Scotland pan a lal (immigrant) Mary Ann Macleod Trump sung pan in June 14, 1946 kum in Jamaica Hospital, Queens, New York ah piang hi. (A nu leh a pa lian pen USA ah suak hilo uhhi). A neu lai in Queen, NY a om First Presbyterian Church ah Sunday School kah a, 1954 kum in kitelcianna ngah hi. 1970 kum in Reformed church tawh kizopna nei Marble Collegiate Church ah a nu leh a pate pawltai uhhi. Marble pawlpi a Pastor Norman Vincent Peale pen 1993 kum dong Trump te innkuan i Siapa a hihi. 2015 kum in Trump in a mah pen Marble Pawlpi ah kikhawm ing a cih hangin tua pawlpi in Trump pen a mau pawlpi ah "pawlpi mi- active member" hilo hi ci hi. 2019 November kha ciangin Trump in a ma mimal Pastor dingin Paula White cial a, Innkangpi- White House ah Sia semsak hi. 2020 October kha ciangin Trump in a mah leh a mah pen "pawlpi khenlo thu-um mi- a non-denomination Christian" hi ing kici hi.
1964 kum in Fordham University ah kum 2 a kah khit ciangin Wharton School of the university of Pennsylvania ah kisuan in kum 2 kah beh a Economics tawh Bachelor Degree ngah hi.
President Trump pen Republic Party pan in President kidem a hihi. A beisa kum 30 sung in Trump in a party pen khek zelzel hi. 1987 kum in Republican party member hi a, 1989 kum in Independent in om hi. 2000 kum in Reform Platform pan in a khatvei na USA gam president kidem hi. 2001 kum in Democrat party ah member in lut hi. 2009 kum in Republican ah lut kik a, mai-a president kitel teh candidate dingin kidem thei ding cih kong kihonna hangin Mitt Romney panpih hi. Tua a kipan Republican a om suaksuak a hihi.
Joe Biden kua a hi hiam?
Joe Biden pen English, French leh Irish sisan kigawm Joseph Robinette Biden Sr. leh Irish sisan nei Catherine Eugenia "Jean" Biden te sung pan a piang tapa upa pen hi a, November 20, 1942 kum in St. Mary Hospital, Scranton, Pennsylvania ah suak hi. A nu leh pa pen Catholic pawlpi a hih manin Catholic upna nei innkuan sung pan a khangkhia a hihi. A neu lai in Scranton, PA a om St. Paul Elementary sangah pilna sin kipan hi. Kum (13) a phak ciangin a nu leh pa tawh Mayfield, Delaware ah lal uhhi. St. Helena Sangah kah a, 1961 kum in High School man hi. 1965 kum ciangin University of Delaware ah Bachelor Degree ngah hi. Tua kum mah in Syracuse University of Law School ah pilna sin beh dingin kisang a 1968 kum in Law degree ngah hi.
Joe Biden in Law Degree ngah in Sitni a sep kawm in Democratic party ah pawlmi (active member) a hihi. 1972 kum in Delaware gamke Senator dingin Democratic party pan in dem a zo hi. Tua a pan in Democrat Party a kip suaksuak hi.
Thubuai ah Trump leh Biden kibatlohna Zomite lung himawh penpen nihte
| A thu (Issues) | Donald J. Trump | Joseph R. Biden |
| Nau lak khiatna (Abortion)* | Pro-life a hih hangin Rape, incest leh a nu' nuntakna hotna ding thute ah nauphiat thu kim. Family Planning paulap in naulak khiatna nei mite huhna piak loh ding | Pro-choice mimal in nauphiat deihlo, a ma upna midang tungah thulut (impose) ut lo. Nau lak khiat ding a deihtel mite in huhna a kisap leh insurance piak ding |
| LGBTQ Rights** | Social nuntakna kilam dang a, a om takpi a hih hangin theihpih kipsak ding dik lo. Galkap sungah " a hi kawikawi thei- transgender sanglo. | Social nuntakna kilam dang a, a om takpi a hih manin theihpih kipsak ding dik hi. Galkap sungah "a hi kawikawi thei-transgender sang kik sawm. |
Zomite i etna leh muhna pan biakna bulphuh muhna a hih manin Saptuam leh gam kumpi khenna (Seperation of Church and State) thu tawm gen leng. Saptuam leh gam kumpi khenna (Separation of Church and state) a kici pen, USA gam lamkhiat hunlai a, khuahun luanzia zui in a thupi mahmah thu (issue) khat a hihi. Hih thu a thupi mahmah khat a hih manin, tu ni, tu hun dongin zong mihing nuntakna ah a thupi paisuak hi lai hi. Mihing nuntakna a zo pen thu khat a hihna zui in, zong a kideih kaih thei, a kideih lak thei pen thu zong hi veve hi. Gentehna in, "Politics leh biakna hel khawm kei un" cih bang a kigen ciangin "biakna thu ah politics a kizat teh, Or Politics thu ah biakna a kizat teh" a deihna taktak bei a, deihkaihna or deihlakna tawh kigen bek hi thei hi. Tua ban-ah, "nang upna pen na biak inn sung ciang ah zangin la, midangte thunlut sese ken" cihna in zong kikai thei hi. Hih thu i deihna taktak pen "Biakna pen politicize lo ding, a lang khat pan in zong Politics pen religionize lo ding" cih ngimna hi a, a nih tuak in suakta takin sem thei, bawl thei ding cih deihna bulpi hi zaw hi.
USA gam a kilam khiat ding tak ciangin USA gamsung a teng mite gamkhen pen Catholic Colonies, Protestant Colonies, Saptuam (pawlpi) omlohna Colonies cih bangin om hi. Tua ban-ah Anglican Church a hatna Virginia gamke om a, USA gam ah a lal mite pen Anglican Church a sang zolo tam hi. Tua a hih manin USA gam in suahtakna a ngah tak ciangin UK gam ah Anglican Church pen gambup biakna dingin a kiseh bangin USA gamah zong ukna nei kumpi in a ma biakna pen gambup biakna dingin a seh khak ding lauthawng uhhi. Tua hangin zong 1802 kum in Connecticut gamke Danbury Baptist Association in Thomas Jefferson tungah lai khat gelh in, "a mau upna (Baptist doctrines) suakta takin a biak theihloh khak ding uh, lauthawngna" pulak uhhi. Pawlpi dangte in zong tua bangin lauthawngna nei uh a hih manin "saptuam leh gam kumpi kikhenna- separation of church and state" paidan ding a pokhia zo a suak hi.
Saptuam leh gam kumpi kikhenna (separation of church and state) i deihna bulpi pen biakna leh upna nei mi khempeuh in a mau biakna leh upna pen gam kumpite thupiakna tawh bia ding, pai ding or bia lo ding, paii lo ding cih thupiak hang hilo in a mau mimal suahtakna zangin a mau up penpen biakna a bia thei ding deihna a hihi. Biakna leh upna neilo mite na ngawn in bia lo, paii lo in om thei ding cih na zong a hihi. Lam khat pan in ci leng hih thu pen Democracy thu guipi mahphatna (democratic value) a hihi. Kua mah in a ma' i biakna leh upna, sandan leh pom dan pen midang khat sungah ukna leh thuneihna zangin thunlut (impose) theilo ding, a mimal (individual) in a ma hoih sak pen zui in khen sat bek ding cih ngimna a hihi. ( Hih mun ah USA gam kiphuh cil lai in tu hun a USA gamsung a om biakna nam kim om hi leh, bang ci bangin thu a pai mawk tam cih bel ngaih sut huai thu hi.)
November 28, 2020
https://www.biography.com/us-president/donald-trump
https://en.wikipedia.org/wiki/Donald_Trump
https://www.biography.com/political-figure/joe-biden
https://en.wikipedia.org/wiki/Joe_Biden
* https://www.cbsnews.com/news/trump-vs-biden-2020-presidential-election-major-issues/
** https://www.washingtonpost.com/elections/2020/trump-policies-vs-biden-policies/
