Mihing Hamphatna thu guipi leh thu meilet a
hi, Universal Declaration of Human Rights (UDHR) thukhil (articles) tawh kisai
Pasian kammal Laisiangtho tawh etkakna, khinkhaina leh tehtakna.
Thukhil
(Article)- 1
Mihing
a min piang khempeuh a suah tung limlim in a suakta sa a piang hi a, vaang leh
hamphatna a kikim in nei ciat uhhi. Thu lungngaih theihna leh a sia a pha khen
theihna thupha ngah uh a, sanggam khat hihna lungsim tawh khat leh khat a
gamtat ciat ding uh ahi hi.
Piancilna 1:26-27 sungah “Eite’ lim leh meel sun in
mihing bawl ni, ei tawh kibang sak ni” ci-in mihing kibawl hi. Hih laisiangtho mun sungah mihing
pen Pasian i lim leh mel suun a kibawl a hih manin, Pasian i sehkhen khat cih
theih hi. A MA i lim leh meel sun in Pasian in mihing bawl ahih manin, mihingte
a pha gelna (moral status) pen Pasian in thupi koih hi. Thupha gelna nei a
mihing kibawl a hih mah bangin thu ngaihsut theihna, suahtakna, sia leh pha
khinkhai theihna, itna neihna cih bangin a nei kimtek i hihi. Lamkhat pan in
gen leng, Pasian in mihingte a ma lim leh meel sun a hong bawl tek (or) mihing
khempeuh in Pasian lim leh meel sun tek i hih manin “mihing khempeuh tanh
kikimna” cih thu guipi pen hih pan kipan hi, kici thei hi. Cih nopna ah kuamah
in Pasian lim leh meel pen midang khatpeuh sangin tam neihzaw, tawm neihzaw
dingin kibawl hilo hi, cihna a hihi.
Mihing
pen vaang leh hamphatna kikim neitek a hong kibawl a hih manin, sia leh pha
khinkhai theihna zong a kikimte in kinei pah takteh, khat leh khat pen unau
lungsim nei ki-et tek ding kilawm hi. Galati 5:13-14 sungah “Na suahtakna pen itna
neihna ding hi a, Nang mah bangin na vengte na it ding hi” ci’n Paul in hong
hilhcian zo hi.
Mihing
in vaang leh hamphatna kikim nei ciat a hih manin kua-mah in vaang lian zaw,
vaang neuzaw, hamphatna lian zaw, hamphatna tawm zaw cih om tuanlo hi. A kikim tek
a hong kipia khin a hih manin a kikimlo a, a ngah a om leh a kikhak tansak man
hi ding hi. “Vaang lianzaw, neu zaw” cih tawh kisai in “Thu ngen dam thei,
vaang nei ngait” cih mihing lam pan ki-om sak thei hi. Damsakna tawh kisai in Luke 7:50 sunga Jesu in,
“Na upna in hong damask khinta hi” ci hi. Nang damna ding nang ma i Upna kisam
cihna a hihi. Hih mun a, “Pasian vangliatna a ngah” “Pasian in a zat zawk” mi
bel om mah in teh. Tua pen “Pasian vangliatna” bek hi a, tua a kizang mipa,
minu in “vaang” hi zenzen lo hi. Pasian in a nasepna ah a zat zawk deuh mi tuam
om cihna a hihi.
Mihing
khempeuh pen a suakta tek i hih manin i suahtakna pen hoih tak in i zat siam
tek ding kisam hi. Hih mun ah suahtakna pen “nang ma nuntakna ding a hoih zaw
ding leh midangte nuntakna a dingin a hoih zaw ding ngimna bek” hi ding hi.
Nang mimal suaktakna pen, “nang ma khut zak khak ciang bek huam sak ding”
kilawm hi. Na khut zan a, na batphak na ciang a khengval leh midangte suahtakna
a hetkha na hi a, na suksiat sak ding kipatna ahihi. Lam khat pan in nang mimal
suahtakna na zatna ah midangte huang sung vasawk khalo ding hi. Tua pen
“suaktakna” i bulpi ngimna a hihi. Na kim leh kiang a om mite het kha, midangte
huang sung va nawk gawp a, gamtat kampauna pen midangte suahtakna a palsia
(violation) a hih manin “suaktakna” zatna lampi man hi nawnlo hi. Galati 5:15 sungah “gamsa
bangin khat leh khat kiphuai in kipet kha leng, i vek pi in kisiat lawh hi” cih
kammal pen midangte siatna ding gel loh ding a deihna a hihi.
Suahtakna
(liberty), vaang (dignity) leh tanh kikimna (equality) pen Pasian lim leh meel
sun a kibawl mihing a min piang khempeuh tungah a kikimtek in a hong kipia sa a
hihi. Sawttak Paul in Galati pawlpi mite
tungah “hamphatna (Rights)” kici pen mihing mimal in a hanciam thu tawh a ngah
hilo a hihna hong phawk sak kik a, a hizongin tua hamphatna pen Pasian hong
piak sa (ordain) khit a hihna hong gen kik hi. Paul in Pasian hong piak
suahtakna pen mimal in a mau ut bangin gamtakna ding a license a hong piak hilo
a, “midangte itna ding leh Pasianna sepna ding” a suahtakna hong piak a hihi ci
hi.
A
huamkim in cileng, Mihing Hamphatna pen Pasian in mihingte hong it man a hong
piak a hih bangin, mihing khat leh khat zong tua hamphatna tawh ki-itna ding a
deihna a hihi.
Thukhil
(Article) 2.
Mi
khempeuh in minam hang, meel pianzia hang, numei-pasal hihna hang, kampau hang,
biakna hang, gam sung ki-ukna hang leh sandan kibat lohna hang, gammi hihna leh
suahna khanna kibat lohna hang, neih leh lam hang, pianna leitang, za lian za
neu hang khatpeuh paulap in kideidanna om peuhmah loin hih Tangkona sung a
kigen hamphatna leh suahtakna khempeuh ngah kim hi.
Tua
bek hi loin, mikhat i a tenna gam in, a suakta gam hita leh, gam khat vaihawmna
sungah a ki-uk lai hi ta leh, a mau leh amau a ki-uk tuam nailo gam hi ta leh,
kumpi gam sungah ki-ukna ciangtan nei khat sungah a om hita leh, tua thute
paulam in kideidanna om theilo ding hi.
Exodus 23:2-9 “Siatna a bawl dingin mihon na zui kei
ding uh hi. Thutang a hei khia dingin mi honpi nung zui-in thu neihna-ah teci
na pang kei ding uh hi. Ama thu neihna-ah mizawngpa na langneih kei ding uh hi.
“Na langneih mite' bawngtal ahi a, a la ahi zongin a gammang na tuah uh leh ama
kiangah na hawlkik ding uh hi. Nangmah a hong mudahpa' la a van tawh a puk
na muh leh a la tawh amah na nusia kei ding a, tua la phot toh ding na huh ding
hi. “Ama thu neihna-ah mizawngpa a thutang kimlai na lelsak kei ding uh
hi. A manlopi-a mi mawhsak ding panin kikem un la, a dikpa leh thumanpa
that kei un. Bang hang hiam cih leh a gilo mi ka khah kei ding hi. Sumgolh
na la kei ding uh hi. Bang hang hiam cih leh sumgolh in uliante' mit tawsak a,
thuman mite' thu heikhiatsak hi. “Khualmi na nengniam kei ding uh hi. Khualmi'
lungsim na thei uh hi. Bang hang hiam cih leh note zong Egypt gamah khualmi na
hi ngei uh hi.
Hih
Laisiangtho kammal sungah “bang ci bangin thutanna (justice) ki kemcing,
kibawl, kizong ding cih Pasian in Israel mite tungah thu na gen i mu hi. Tua
thutanna (Justice) hangin gam sungah a teng mite leh khual mite a dingin bitna
leh lungmuanna a omna ding ngimna a hihi. Tua bangin gamsung ah thutanna kisep
suahna ding, kikepcingna dingin numei pasal, mivom mikang, biakna leh sanna, na
khatpeuh kilamdanna omlo in kisem vek ding deihna a hihi. Mikhat peuh in midang
khat tungah thutang leh diktatna a zat ding thu guipi a hihi. Tua bangin hih
mun a UDHR thukhil 2, (1) na sungah zong mihing te tungah thu tanna a om
theihna dingin kuamah deidanna omlo in kisem ding, ngah kim thei ding cih
lamlahna i muhi.
Tua
banah “ Tua bek hi loin, mikhat i a tenna gam in, a suakta gam hita leh, gam
khat vaihawmna sungah a ki-uk lai hi ta leh, a mau leh amau a ki-uk tuam nailo
gam hi ta leh, kumpi gam sungah ki-ukna ciangtan nei khat sungah a om hita leh,
tua thute paulamin kideidanna om thei lo ding hi”.
Galati 3:26-28: “Khrih Jesuh tawh na kipawl manun note
khempeuh Pasian' tate na suahtheihna uh pen na upna hang uh ahi hi. Khrih
sungah a kiphum note in Khrih' pianzia a nei khinta na hi uh hi. Tua ahih
manin Jew mi leh Gentail mi, sila leh sila a hilo, numei leh pasal cih bangin
kideidanna om nawnlo a, note khempeuh Khrih tawh na kipawlna hangun pawlkhat
hi-in, a kibangkim na hi uh hi.
Sawltak Paul in, “Zeisu sungah mi khempeuh kipum khat in, mi
khempeuh tan kikimna a genna hi a, nakpi tak in ultung sak hi. (Kikimna leh
kibatna) Tua pen “bang upna leh biakna” cih hituanlo a, Jews minam leh Jews
biakna a hilo biakna sung zong a huam a hihi. Tuhun kammal in gen leng, minam
kideidanlo, biakna kideidanlo in mikim in tankikim hi hang! Pasian upna leh
zonna ah zong a pianzia pan a et in maipha a ngah zaw ding cih bang mi omtuanlo
cihna a hihi.
Mihing
pianzia ah mimal khat leh khat kikal pan in mikhat peuh in midang khatpeuh
sangin dinmun sangzaw tuam nei hi cih a hizongin, minam khat in minam dang
khatpeuh sangin nampi zaw hi cih a hizongin “pianzia” pansan in kilam danna om
vet lo hi. Minam hihna, neih leh lam, pilna siamna cih te akipan in mihing
pianzia ah a dinmun sangzaw a ngah ding mi om tuamlo hi. Mihing khempeuh “guak
tang” vive in a piang khia i hihi. Tua hi a, mihing pian khit a kingah pan
leitung nate pansan in mihing kideidanna cihte omlo in mihing khempeuh pen
suahtakna, hamphatna ah tan kikim ngah tek ding kilawm a hihi.
Thukhil
(Article) 3
Mi
kim in a ma nuntak theih na ding, a ma suahtak na ding leh a ma lungnopna ding
hamphatna ngah hi.
Luke 4: 16-19 - Tua ciangin ama khan'na Nazareth
khua-ah Jesuh pai a, Sabbath ni ciangin a pai ngei bangin kikhopna inn-ah a pai
hi. Lai Siangtho a sim dingin amah ding a, a nget bangin a sim dingin
kamsang Isaiah Lai Siangtho bu a kipia hi. A laibu lemin a simnopna mun a zon'
ciangin a nuai-a bangin a kigelhna mun mu-in a sim hi. Tua munah, “Gimna a
thuak mite tungah Lungdamna Thu a hilh dingin Topa in kei hong sehkhin ahih
manin keima sungah Topa' kha hong om hi. “Sal in a kimante tungah suahtakna thu
a gen ding, mittawte in khua a muhkik theihna ding, a kinengniamte a suaktasak
ding leh Topa in a mite a hotkhiat ding kum a pulak dingin kei hong sawl hi,” ci-in
a kigelh hi
Jesu
in a nasep a kipat ding tak ciangin Khasiangtho Vangliatna a ma tungah tung a,
hih Isaiah 61 sung a simna a hihi. Hih mun ah Jesu in “mi zawngte, a kiman mite
leh a kinengcip mite” a ding a veina, tua bang a om mite in suahtakna a ngahna
ding a deihna, mi khempeuhte tua bang mun pan suahtak sak nopna nakpi tak in
gen hi. “Nuntak theihna ding” in mat leh hen pan kipelh in, simmawh nencipna
tawh kipelh ding kisam hi.
Mihing
khat i nuntakna zonna ah kikhaktan sakloh ding, ( nuntakna ding a kisam nasep
silbawl te a kipan, an leh tui ngahna ding dong ah), suahtakna zong kisuk siat
saklo ding, kidal leh kikhak tan saklo in mi kim in lungnopna ngah theihna ding
mihing khempeuh kisap thu a hihi.
Jesu
in a MA i Ministry a kipat a kipan in mihing khat i nuntakna (life),
zalenna/suahtakna (liberty) leh bitna (security) pen thupi tak in na koih hi.
Tua hi a, Jesu pianma a kipan in Jews mi sunga zong tua bang mite a ding in a
kikim hamphatna a om theihna dingin na masak mahmah hi. Jesu in A kinengcip
mite a masak na pen midangte sangin a maute a manpha zaw cih lam hilo a, a
maute pen thutanna tawh kisai in a panpih ding, a huh ding mi omlo a hih man hi
zaw hi.
Thu-um
mi (Christian) khat in Topa Jesu hong lamlahna bangin mi cimawhte, a kinengcip
mite lam ah thu man leh thutang a om theihna dingin panpih in, hut a kep cing ding
kilawm hi. Tua bangin hi leh mi kim in suahpih nuntakna sungah suahtakna leh
lungnopna, bitna ngah kim ciat ding hi.
Thukhil
(Article) 4
Kua
mahmah sila in kinei thei lo ding a, mikhat le khat sila (Bawi lut) bangin
kibawl theilo ding hi. Sila neihna leh sila vai a sumbawlna peuhmah kikhaam hi.
Galati 5:1 1 “Khrih in eite hong khahkhiatna hangin a suakta mite hi
khinta ihih manin tua suahtakna thu (sung)-ah kip(tak) in om unla, sila va
suakkik nawn kei un”.
Laisiangtho
sungah “Sila neihna, a hihkei leh Sila tawh kisai a genna mun om a hih manin, Laisiangtho
in Sila neihna khaamlo hi i ci kha ding hi. Tua bek hilo, Laisiangtho sungah
Sila khawi (nei) mite (eg. Abraham) bang Pasian in mawhsak lo, dan pialo bek
hilo in, Thupha pia veve a hih manin Sila neihna pen Pasian in mawhna, khialhna
a koihlo, sanglo hi ding hi, i ci kha mai thei hi.
USA
gam sungah Africa gam panin civom mite sila in a khawina uh zong cikang mi pawlkhat
in “Laisiangtho sungah zong sila om a, a siatna kigenlo cih lamin a mau leh a
mau kidik tang sak uhhi.” Sila khawina, Sila vulhna, sila zuakna nasep pen mawhna
leh khialhna in na sanglo ngei uhhi.
A
taktak in Pasian in mihing khat leh khat sila a kikhawina, kineihna leh sila
ding a kizuakna pen hoih sa maw, hoih salo cih lam sangin “sila khawina” pen
mihingte i khosak nuntakzia (civilization) a niam leh a sanna tawh kisai zaw
hi. Mihingte i khosak nuntakzia (civilization) a tualniam lai na munte ah sila
khawina pen a hi ding bangin kisang thei a, Civilization a sanna munte ah sila
khawina pen mihingte kigawtna bangin kisang in kilawm kisa zolo hi.
Laisiangtho
sung a hi a, mihingte tangthu sung a hizongin “Sila khawina” a om ngeina, mihing
nuntakna ah kisangthei (legal) in a kikoihna, Mihingte zuih ding thukhun sungah
“sila khawina” tawh kisai a kiphal ngei phial hangin tuhun mihing khosak
nuntakna (civilization) tawh i tehkik ciangin “sila khawina, sila neihna leh sila
zuakna” pen a beisa hun sila khawina i khiatna bangin kikhia thei nawnlo hi. Mihing
khangtang thu, Thukhun leh thuhilhnate sangin a thuukzaw in a khiatna kankik a
kulta a hihi. A thuuk zaw in i kan tak ciangin “Mihing khempeuh pen Pasian lim
leh meel (image) sun vive i hih manin Pasian mai ah tanh kikimna a nei tek i hi
a, sila leh to cih omlo bek thamlo in Jesu in “nang ma pumpi bangin veng a om
mite na it ding hi” cih hong hilh tawh a thu kituak a kalsuan hun hita hi.
Pasian
lim leh mel a sun mite khat leh khat kisimmawhna, kibawlsiatna pen Pasian a
bawlsia i hihi. Topa Jesu hong sihna hangin sila suahna leh sila bang nuntakna
pan suahtak theihna ding kongpi kihong a hih manin mi kuamah sila a kikhawi
ding hilo a, itna leh Pasian hoihna a kikim in ngah thei tekin suahtakna a
kikim neitek i hihi.
Thukhil
(Article) 5
Kuamah
kigawt bawl, mulkimhuai taka kibawlsiat, mihing bang a ki-en lo, kineu seekna
leh kigawtna phal hilo hi.
Luke 22:63-65 [Jesuh a cingte in simmawh bawlin a sat uh hi. Puan
tawh a mit tuamsak uh a, “Kua'n hong sat ahi hiam, thei dih in,” a ci uh
hi. Amah simmawh bawlna kam tampi a pau uh hi.]
Hih
Laisiangtho mun sim ziau leng, Op! Topa Jesu zong kibawl sia, kigawt leh
simmawh bawlna tampi om hilo maw, kici kha ding hi. Topa Jesu in mihingte a
hong it man leh Pasian gelna om sa a tangtun sakna ding a hih lam tel kei leng,
bawlsiatna leh simmawh bawlna pen a hi ding bangin kisang thei kha ding hi. Topa
Zeisu in ngimna hoih zaw a neih manin tua bangin bawlsiatna hong thuak a hihna i
thuk kan ding kisam hi.
Tua
bangin i genteh, mipi leh mihing a ding a hoihzaw ding a hih nak leh
bawlsiatna, simmawh bawlna leh gawtna pen a hoih khat hive maw, cih dotna khat
hong om thei leuleu hi. Gentehna in Bomb thangkam mikhat pen a thangkam na mun
theih khiatna dingin “gawtna, leh bawlsiatna” cihte kisem thei lel ding ai ve,
ci’n kidik tangsak in gawtna kisem thei hi. Mihing nuntak khosakna
(civilization) a khantoh na zui in tuhun ciangin tuabang in mi khat leh khat kigawtna,
bawlsiatna pen “mihing hoihzawkna ding a kibawl thukhun” phalna omlo in zat
ding pen kisang zo nawnlo hi.
Deuteronomy 25:3 “Sat sawmli kipia thei ding a, ahih
hangin tua val hilo ding hi. Tua hi kei leh, hih sangin a tamvei zaw mi khat in
sat lai leh note' muhna-ah na sanggampa uh a kineubawl suak ding hi.
Sat
theihna ding ciangtanna om a, tua khengval satna pen, “neu et simmawhna” suak
ta hi. Cihnopna ah thukhun phalna ciang tawh mihing hoih zawkna dingin mawhna
daan piakna kinei thei na pi, tua khengval a nasepna pen mihing banglo a bawlna
suakta hi cihna hi.
Hih
Laisiangtho mun sunga satna, bawlsiatnate ah “ngimna tawh natsakna leh
bawlsiatna ding” a deihlohna a hihlam i mu thei hi. Mawhna daan piakna pen
kikham hilo na pi’n, simmawhna tawh bawlsiatna leh nengniamna pen a deihlohna i
mu thei hi.
Mihing
khatpeuh in mawhna thaman a ngah ding pen “gawtna” hi zaw hamtang hi. A
hizongin mawhna thanam piakna i ngimna pen “mihing khat gawt nopna, simmawh
bawl ding” cih hilo dinga, “amah (gawt a om mi) leh veng leh pam a ding” in
kibawlphatna ding ngimna hizaw ding hi. Mawhna thaman piakna khengval a, mimal
mahmah simmawhna leh gawtna tawh mikhat tungah bawlsiatna pen mihing nuntakna
ah kilawm thu hilo hi.
Thukhil
(Article) 6
Mikim
in Thukhun maiah mihing ngeina bang a mun khempeuh ah ki-et ding hamphatna ngah
hi.
Acts (Nasepte) 22:25. Amaute in sat dingin a hen khit uh
ciangin Paul in a gei-a ding galkap mangpa kiangah, “Khial hi, ci-in thu
nangawn a kisit nailo Rome mi khat na sat ding uh ngeina ahi hiam?” a ci hi.
Mihing
a min piang khat i mihing hihna (personhood) theihpihna (recognition) piakna
pen Pasian lim leh meel zahtakna a hihi. Tuamdannate (particularities) in
mihing khat i hihna hong kilang sak zaw a, tua tuamdannate in Pasian i sutna hi
zaw hi. Tua tuamdanna i neih tek hangin tuate in mihing i hihna a khiamkiam hi
peuhmah lo hi. Civom, cikang, ci-eng leh a niam, a sang cihte a kipan te in
mihing hihna kiamsak, pungsak hilo hi.
Hih
a tungah laisiangtho mun i et tak ciangin Paul in “mi khempeuh thukhun (law)
mai ah thu paidan tawh kituak in kikim hamphatna ngah theih ding a hihna” a
genna ahihi. Thukhun mai ah thu kisit leh thukhenna ngah nailo pen daan piak
ding kilawm a hihlohna tawh na nial kik hi. Gam mi khat in thukhun phalna om
bek in khialhna thaman piak theih a hihna na kawk muhhi.
Thukhun
pen mihing khempeuh hoihna ding leh kidalna ding deihna a hihman in mikim in
thukhun mai ah venbitna a ngah kim ding a kilawm a hihi. Thukhun zong a thutang
thukhun leh a thutanglo thukhun om thei hi. A thutanglo thukhun khempeuh in
mihing a min piang mi pawlkhat siatna ding hi hamtang a hih manin hoihlo hi.
Mihing
a min piang khempeuh in a thutang thukhun nuai a om tek ding hi a, mihing khat
leh khat kituam danna (particularities) hangin a vo zaw leh a tungtuang zaw a
thukhun nuai-ah maipha ngah zaw ding cih pen thumah hilo hi.
Thukhil
(Article) 7
Mi
khempeuh Thukhun mai ah a kiza kim ciat hi a, kideidanna omlo in thukhun i
hutna leh kepna nuai ah kibang a, ki-et ding thu ngah ciat hi. Hih Tangkona
palsat a kideidanna ahi zongin, kideidan nang a kihan thotna ahi zongin a om
zenzen leh mikim in thukhun i hutna leh kepna a kibang ngah theih na’ng thu
ngah ciat hi.
James 2: 1-5. Sanggamte aw, minthan'na vang tawh a kidim i Topa Jesuh
Khrih umin na om laitakun a pualama kilang pianziate siksanin mi na deidan kei
un. Gentehna-in, kham zungbuh bulhin puan manpha a silh mihau khat leh
puan siasa a silh mizawng khat, note' kikhopna-ah hong paikhawm leh, limtakin
a kizem mipa zahtakbawl zaw-in, “Hih lai-ah tutna nuamah hong tu in,” ci le uh
cin a, ahi zongin mizawngpa kiangah, “Tua lai-ah na ding phot in,” cihna ahi a,
“Sual tung hih ka khe kiang khawngah hong tu in,” cihna ahi zongin kam na zat
uh leh, mi a deidan na hi uh a, ngaihsutna hoihlo nei-in a gamta na hi uh
hi.
Topa
Jesus sanggampa James in “leitung ah neih leh lam, ci leh sa bulphuh a kideina
a om ding a deihlohna, Pasian thu khun mai-ah kuamah in maipha ngah om tuamlo a
hihna na a pulakna ahihi.
A
pualam pianzia (or) tuam danna (particularities) siksan a nei in mi khentuam,
deidan loh ding deihna hi.
Mihing
hihna, pianpih hamphatnate khak leh khat kikhak tansak loh ding hi a, khat leh
khat kikhak tansakna a om ciangin kideidanna tawh kizom pah a hihi. Mihing
khempeuh in ngah ding a kilawm thu leh hamphatna a kikhaktan sak ciangin mihing
sia leh pha theihna in thuman lo a hihna thei a hih manin, tua in mihingte
kideidan a hoihlohna hong lak hi.
Tua
a hih manin a thutang thukhun mai ah mite khempeuh in a kibangin thusitna,
biakna thu tawh gen leng, a lian a kang tokhom mai-ah mikhempeuh in
thukhensatna ngah kim ding i hih manin, leitung ah zong kuamah ki deidanna tawh
nasep ding kilawm lo hi.
Thukhil
(Article) 8
Thukhunpi
ahih kei leh, thu bullet in a piak hamphatna bulpite palsatna khatpeuh a om tak
ciangin a kituah pih thukhen zum pen in phatak a, zaangna dopna tawh a hut nang
mi kim in hamphatna ngah hi.
Psalm 82: 1 Thu vaihawm kikhopna sungah, Pasian in ama pan'mun hong len
a, amah in pasian-te' lakah thu a khen hi. “Note in bang tanvei a manloin thu
khenin, migilote tungah angvanna zang ding na hi uh hiam? A ginalo mite leh pa
a neilo mite tungah thuman un la, a thuakte leh a cimawhte' thu a manin khen
un. A ginalo mite leh a cimawh mite hon un la, migilote' khutsung panin a maute
honkhia un,” a ci hi. Amaute in thutheihna ahi a, thutelna ahi zongin bangmah
neilo uh a, khuamial sungah gamta uh ahih manin leitung bulpite khempeuh a
kilinggawp hi. Ke'n kong cihin-ah, “Note khempeuh, Sangpenpa' tate, pasian-te
na hi uh hi. *
Hebrew
mite Laisiangtho sungah thuman leh thutanna (justice) tawh thukhenna, thu
vaihawmna a om ding pen a thu guipi pen a hihi. Thunei mite, makaite, lutang
panmun a len mite in mizawng daipam, meigoing tagah, belh ding neilo, a kineng
niam mite tungah thu man leh thutang in vai a hawm ding uh deihna kigen hi. Thu
leh la khat a deih uh leh zong simmawh zawhthohna tawh vaihawmlo in, a kilawm a
kituak thusitna a om khit ciang bek in thaman kipia ding hi.
Tua
ban-ah thuman leh thutanglo pi tawh na sem, vaihawm makai, lutang mite zong kidopna
ding Laisiangtho sungah hong gen pah hi.
Simmawh
bawlsiatna a thuak mite leh diklo tak a kisim mawh bawl mite in a kilawm a
kituak noptuamna pen a ngah ding a bawlsak sak kisam hi. Tua pen thu manlo a
kisem kha, natna damsakna a hihi.
Thukhil
(Article) - 9
Kuamah
upmawh thu tawh kimatna, thong kikhiatna leh gamdangah kihawlkhiatna pen ngeina
hilo hi.
John 7:45-49 Tua ciangin siampi liante leh Farisi mite kiangah palikte a
va ciahkik uh ciangin, “Bang hangin amah hong kailo na hi uh hiam” a na ci uh
hi. Palikte in, “Hih mipa' thugen bangin a gen kuamah om nailo hi,” a cih
uh ciangin Farisi mite in, “Note zong hong khem khinzo ta ahi hiam? Jew
mi uliante hita leh Farisi mite hita leh sung panin amah a um, na theih uh
omnai ahi hiam? Hih mihonte in ahih leh Moses Thukham theilo uh ahih manin
Pasian' samsiatna a thuak dingte hi lel uh hi,” a ci uh hi.
Pharisee
makaite in Topa Jesus pen Palik te man sak dingin sawl uh a, a hizongin Palik
te in Jesu manlo in ciah kik uhhi. Palikte in mite thugen sawn pansan in leh
upmawh thu tawh Jesu a man utlo uh a hihi.
Hih
thukhil sunga upmawh thu leh muhdahna tawh thu zong a mawk matna pen mihing
ngeina hilo a hihna i mu thei hi. Khialna nei in kingawh in, a khialh leh
khialhloh theih cianna dingin thusit ding in a kimat ding leh zong, a thu leh
la kician in kan in vel a thukhun tawh kituak a sep ding deihna a hihi.
John 7:51 sungah “mi khatpeuh a thu dongin a gamtatna theih masak loh
a matna pen Moses thukham in phallo” a hihna Nicodemus in na gen hi. Mi khat
mat theihloh ding, mat hetlo ding cih hilo a, a kimat leh hen theihna dingin
thukhun i phalna a om masak kul a hihna a hong kawkmuh a hihi.
Hih
thukhil -9 sungah mi khatpeuh a kimat, henkol bulhna, gamdang ah hawlkhiatna a
thuak leh zong tua bangin sep theihna ding tua mitung ah khialhna kician muh
masak kul a, tua khialhna muhna dingin thukhun zui in nasep masak a kul a hihi.
Thukhil
(Article) – 10
Mi
kim in a ma ngah hamphatna leh a ma mawhpuaknate khensatna ding leh, a mah a
kihekna hangin thu khensatna neihna mun-ah, guptuam paihtuam a nei hetlo
thukhen zum in mipi mai ah a kilawm a kituak in thu a sit hamtang ding pen
kicingin hamphatna ngah kim ciat hi.
Luke 18:1-8 “Tua ciangin amaute in thu ngen tawntungin a lungkiat
ngeilohna ding uh a hilh nopna-in Jesuh in a nungzuite kiangah thugentehna khat
gen a, “Khuapi khat sungah Pasian a zahtaklo, mi zong a donlo thukhen mang
khat a om hi. Tua khuasung mahah meigong numei khat zong om a, ama kiangah
hong pai tawntungin, ‘Ka thu uh hong khensak in,’ ci-in a thum tawntung
hi. Tawlkhat sung thudon loin om a, ahi zongin a nung ciangin, ‘Pasian
zahtakloin, mite zong ka donnop kholloh hangin, hih meigongnu in hong
nawngkaisak niloh ahih manin, a thu khensak kei leng, hong pai nilohin hong
lunggimsak ding hi,’ ci-in ngaihsun hi,” a ci hi. Tua ciangin Topa in, “Hih
mihoihlo thukhenpa' kampauna ngaihsun un. A sun a zanin ama tungah a
thumthum ama mite' thu a manin Pasian in khensaklo ding ahi hiam? Amaute a
huhding kizekaisak ding ahi hiam? Ke'n kong cihin-ah, amaute' thu a manin
manlang takin khensak ding hi. Ahi zongin Mihing Tapa hong pai ciangin
leitungah amah a um mi a mu ding hiam?” ci-in a genthuah hi.
Topa
Jesus thugentehna ah “meigong numei khat i thubuai hoih tak in a kikhensak ding
ngetna” tawh kisai gentehna hi a, a mah in a ma tunga kibawl thu pawlkhat pen
thuman sa lo in thuman tawh a kivensak theihna ding ngimna a hihi. Numei nu in
a nget niloh ciangin in thukhen mang in a thu uh mantak in a khensatna a hihi.
A
diktatlo thukhen mang pawlkhat in a thu neihna uh zang khial in thuman lampi
pan pial khia thei uhhi. A hizongin mi khat in thu a neih tak ciangin a thuman
leh thutang tawh a ding thu khen mang in thusitna nei in, a mawh leh a khial a
khen sat ma teng pen mi khempeuh zong kisim mawh loh ding deihna a hihi.
Pasian
pen a thuman leh thutang thukhen mang hi a, mi khempeuh a kitam kim in (tehna
kibang) tawh teh kak in thu a khen ding a hihi.
Hih
thukhil – 10 na in “mihing tuam danna (particularities) bulphuh in kikhena om
lo mikhempeuh in Pasian mai ah i din ciangin a kibang thukhenna i tuah ding
bang tektek in a tehna kibang khat tawh thusitna leh thukhenna ngah ciat ding
kilawm hi.
Thukhil
(Article) – 11
(1)
Khialhna bawl hi ci-a mikhat a kingawh peuhmah leh tangpi theih in a thu kisit
ding a, ngeina bangin amah leh amah a kihut khit ciangin, thukhun tawh kituakin
khial mah hi, a kicih ma tengin tua mi pen a khiallo bangin ngaihsut ding a
hihi.
(2)
Mikhat pen khial hi a kicih laitak hun a leitungbup thukhun leh gambup khat
thukhun sung a khialna a, kiciamteh lo thute ah, na sep ding seplohna a hih
keileh sep khialhkhaknate pansan le paulap in a nung ciangin mawh hi cih theih
na’ng thu om lo hi. Mawhna a bawl laitaka gawt na’ng ngeina zah sang a, a
gikzaw gawtna zong piak theih hi lo hi.
Deuteronomy 1:16-18 “Tua hun laitakin na thukhente uh ka
thuhilh a, ‘Na sanggamte uh thu neihte za un la, mi khat leh a sanggampa ahi a,
amah tawh a om khualmipa tawh ahi zongin thu a mantakin khen un. Thukhenna-ah
angvan na nei kei ding uh hi. A neu leh a liante a kibangin a thu na ngai ding
uh a, maitang zahtak tuam na nei kei ding uh hi. Bang hang hiam cih leh
thukhenna pen Pasian-a' ahi hi. Note-a' dingin a haksa lua thute kei kiangah
nong paipih ding uh a, keimah in tua thu ka za ding hi,’ ka ci hi
Hih
mun ah Moses in Israel mite tungah makaih, thukhen sem hi. Isreal mite khang in
tamlua a hih manin a mah in Nambing makai (tribe leaders) ding tel hi. Tua
makai te in kisiatna (kinialna) a om ciangin tuate vengsak uh hi. Tua bangin
thubuai kinialna a om ciangin na sep ding zia Moses in a genna ah 1) mi
khempeuh thu pen hoih tak leh nello tak in langbuk omlo in ki ngaihsak ding hi.
2) Thutang tak in khen ding (Khual mi leh tual mi khen tuamlo ding 3) Deihsak
tuam neilo ding, a hi zongin a thu bucing in ngaihsak, kantel ding cih hi.
Tua
bang a sepna a om ma siah mi khatpeuh pen mikhial in kikoih lo ding hi.
Hih
thukhil (11) na in, mi khial a kingawh khat i thu hoih tak in a kikan a kulna, mi
khat peuh mawhna muh khiat mateng mimawh cih theih a hihloh na, Mipi mai ah
thusitna a kisapna, thu nei mite zong a kidal theihna ding lampi zonsakna leh mi
khatpeuh in a khialh leh zong a khialh hun laitak lian a kipia thei mawhna
thaman piak a kisapna te hong gen cian hi.
Thukhil
(Article) – 12
Mi
khatpeuh i mimal thusim, innkuan sung thu, inn vai lo vai leh lai kikhak vaite
ah thuman lopi in kikausi phum mawk ding ngeina hilo a, ki min siatsak mawkmawk
theih zong hilo hi. Tua bang a, thuman lo pi tawh kikausi phumna leh ki min
siatsakna hangin mi khempeuh in thukhun i hutna ngah thei hi.
Psalm (Late) 5: sungah i et ciangin mihing khat siatna
dingin a ma pumpi tektek na do na, va gawtna leh bawlsiatna bek tawh kisem thei
hilo hi. Lampi tuamtuam tawh mihing khat siatna ding a kibawl theihna i mu thei
hi. Mikhat peuh thu omlo pi a va nawngkai sakna, a innkuan sung thu uah va
kikausi phumna, a ma min thanna leh minphatna siatna ding gelna cih bang in
“kampauna tawh a hizongin, lai gelhna tawh a hizongin seploh ding a hihi. Tuate
khempeuh zong a hoihlo a hihi. Tua bangin mi khat siatna ding gelna tawh
nasepna pen mikhat a dingin hamphatna (rights) in kiciamteh theilo hi.
Tua
a hih manin Late lai gelh pa in zong tua bang gal bawlna, langpanna a thuak
ciangin a belh ding Topa kiang na ko hi.
Leitung
mihingte lam pan in “tua bangin sim mawh bawlsiatna” a thuak mite in a kidalna
ding pen a thutang thukhun (Just Law) kisam a hihna hih thukhil 12 na in hong
gen hi.
Thukhil
(Article) - 13
(1)
Mikim in a ma gam sungah suakta tak in munkhat pan mun khat-ah lal kawikawi
thei a, mun khat peuhpeuhah ten theih na’ng hamphatna ngah hi.
(2)
Mikim in a ut nak leh a ma tenna gam nangawn ki hel in, gam khat peuhpeuh ah
zin khiat theihna, leh ciakkik theihna ding hamphatna ngah hi.
Genesis 12:1-3 “ Topa in Abram kiangah, “Na gam, na
beh, leh na pa' inn panin nang kong lah ding gamah pai in. Thupha a ngah dingin
minam lian khatin nang hong bawlin, thupha hong pia-in, na min kong liansak
ding hi. Nang thupha hong piate thupha ka pia ding a, nang hong samsiate ka
samsia ding hi. Nang' thupha ngah bangin thupha a ngahna dingun leitung midang
khempeuh in hong ngen ding uh hi,” a ci hi.
Laisiangtho
sung i et takciangin mimal a hi zongin, Innkuan a hizongin, tenna (or) omna mun
panin Pasian lamlahna tawh paikhia in, kalsuan khia leh pem khia dingin a
kisawlna mun tampi om hi. Tua pen Pasian gelna hi a, Pasian in thupha a piak
nop man hizaw hi. Hih Laisiangtho mun ah en leng, Abraham pen a tenna gam pan
in Pasian in samkhia, Pemkhiat ding a sawl hi. A taktak in, tuhun pau in gen
leng, Abraham in hih Thukhil 13 na sungah, “suak ta tak a kikhin, mun suan theihna,
(right to freedom of movement) leh khua lal, pem theihna (rights to leave any country)”
hoih tak a, a zang na hi gige hi. Laisiangtho sungah lalna, kikhinna pen na
hoih zaw sem ding, itna khahkhia ding cih lam tawh kikhia thei hi.
Thukhil
(Article) –14
(1)
Mikim in bawlsiatna tawh a kipelh theih nangin gam dang khat peuhpeuh ah buk
theihna ding leh a kisam huhna ngahna ding hamphatna ngah hi.
(2)
Minam leh gamvai sepna hang tawh kisai lo-a khialhna, UN’ ngimna leh thubulpite
tawh kituaklo-a sepna hang a khialhna a hih leh hih hamphatna pen paulap thei lo
ding hi.
Leviticus (Siampi Laibu) 19:33-34 “Na gamsung uh note lakah khualmi khat
hong peem leh ama tungah a manlo in na gamta kei ding uh hi. Note lakah a hong
peem khualmite tualsung mi mah bangin na ngaihsun ding uh a, nomau mah bangin
amaute na it ding uh hi; bang hang hiam cih leh note pen Egypt gam sungah
khualmi na hi ngei uh hi; kei pen Topa na Pasian uh ka hi hi.
Eima’
khialhna a hilo hanga gawtna thuakna ding pan in kiven theihna dingin “kumpi
dang khat i ukna nuai a om gam dang khatpeuh ah kibuuk theihna ding hamphatna
mi khempeuh in i nei tek hi. Laisiangtho thuciam lui sungah ah zong Moses
thukhunte enkik leng, galtai (refugee) leh gambeel (asylum) mite muak ding,
hoih tak a bawl ding kilim gen mahmah hi.
Thuciam
thak Hebrew 13:2
Khualmite hoihtakin zin na do ding uh na phawk un. Mi pawlkhat in vantung mite
zindo ahihlam a phawklopi-in a do na hi gige uh hi.
Hebrew
Laisiangtho sungah zindo na, mi khualte hoih tak a bawlna tawh kisai na lim gen
mahmah hi. Topa Jesu zong, a mah tektek galtai (Refugee) hi ngei a, galtai mite
leh khual mite hoihtak a bawl ding na hilh hi.
Hih
thukhil sung a Galtai mi, gambel mite hoihtak a et ding cih pen Pasian thu Laisiangtho
sung a om thu laigil khat a hihi.
Thukhil
(Article) –15
(1)
Mikim in kumpi khat ukna gam sungah gammi suah theihna hamphatna ngah ciat hi.
(2)
Gammi suahna pen diklo tak in kiphiat sak ziau thei lo ding a, gammi khat pan
gam dang mi khat ah a laih nop leh laih theihna zong kuamah in nial thei lo hi.
Ruth 1: 15-17 Tua ciangin amah in, “En in, na sanggamnu a mipihte leh a
pasian-te kiangah ciahkik khin hi. Na sanggamnu' nungah nang zong ciah in,” a
ci hi. Ahih hangin Ruth in, “Nang kong nusiatna ding ahi a, nang zuihna panin
ka ciahkikna ding ahi zongin hong cici nawn kei in; bang hang hiam cih leh na
paina-ah ka pai ding a, na giahna-ah ka giak ding hi. Na mite keima mite hi
ding a, na Pasian keima Pasian hi ding hi. Na sihna-ah si-in ka kivui ding hi.
Sihna cih lohbuang thudang hangin kong nusiat taak leh Topa in kei hong dawm
kei ta hen,” a ci hi.
Naomi
leh a mo nu Ruth tangthu en leng Naomi pen Bethlehem gam mi hi uhhi. A tapa te
tawh Moab gamah kial hangin a lal uh a hihi. A tapa te in Moab gam mi numeite
zi in nei uhhi. A tapate a sih ciangin Ruth zong a ciah dingin kisawl hi na
pi’n Ruth in, na paina ah ka pai ding, Na Pasian ka bia ding ci hi. Tua pen a
tek nu in zong khak tan nawnlo hi. Naomi leh Ruth zong Bethlehem a ciah uh
ciangin Ruth in a gammi hihna a khek hi. Tua ban ah Moab gammi a hih na hangin
simmawhna thuak sak ding hituanlo hi.
Thukhil
(Article)–16
(1)
A khangcing khin numei leh pasal pen minam, gammi hihna, leh biaknate hangin zi
leh pasal-a kineih ding kikhaam theilo a, innkuan khat suang a kipat theih
na’ng hamphatna ngah uhhi.
(2)
Kitenna pen nupa ding mite i mimal utna leh thukimna ngiat bek tawh kibawl ding
hi.
(3)
Innkuan i cih in minam khat hihna sungah leitung ngeina leh a kip tualsung
kipawlna khenneu khat a hih manin, Kumpi leh tualsung kipawlna in a hut ding
ahi hi.
A
tom in ci leng, a khangcing sa numei leh pasal pen a kingaih nak uh leh
kikhenlo in kiteng thei hi.
Genesis 24:57-67 Amaute in, “A numei samin amah i dong
ding hi,” a ci uh hi. Amaute in Rebekah samin ama kiangah, “Hih mipa na zui pah
ding hiam?” a ci uh hi. Amah in, “Ka zui ding hi,” ci pah hi. Tua ahih ciangin
amaute in a sanggamnu uh Rebekah leh a cingnu, Abraham' nasempa leh a nungzuite
tawh ciahkhiasak uh hi. Amaute in Rebekah thupha pia-in ama kiangah, “Kote'
sanggamnu aw, a tultul a thenthente' nu hi ta in. Na suanlekhakte in amau a
mudahte' khuapite luah ta uh hen!” a ci uh hi.Tua ciangin Rebekah leh a numeite
dingin, kalaohte tungah tuangin mipa a zui uh hi. Tua bangin nasempa in Rebekah
la-in a paina ding lamah a pai hi.Tua kikalin, Isaac, Beerlahairoi panin hong
pai-in Negeb gamah na teng hi. Isaac, thu a lungngaingai dingin nitakin
gamlakah a paikhia hi. Amah a khuadak leh kalaohte hong pai a mu hi. Rebekah in
Isaac a muh ciangin, kalaoh tung panin kumin nasempa kiangah, “Hua lai-a mipa,
eite hong dawn dingin gamlaka hong pai kua ahi hiam?” a ci hi. Nasempa in, “Ka
topa hi,” a ci hi. Tua ahih ciangin amah in a kikhuhna puan la-in a kikhuh hi.Nasempa
in Isaac kiangah a gamtatnasa khempeuh a gen hi. Tua ciangin Isaac in a puanbuk
sungah Rebekah paipih a, amah pen a zi a suak hi. Amah in tuanu a it hi
Hih
Laisiangtho mun ah i et tak ciangin Abraham nasem mite in Rebecca pen Isaac zi
dingin a neih mahmah uh hangin, 1) Rebecca thu dong masa uhhi. 2) Rebecca
thukimna ngah uhhi. Rebecca utna, lungsim sung ah phalna (Consents) la uhhi. A
khangcing tuak a hih uh hangin innkuan bawl/suanna dingin “a mite utna” bulphuh
masa uhhi. Lamkhat pan cileng, a mite khat leh khat ki-itna bulphuh in innkuan
kilam khia a hihi.
Thukhil
(Article) -17
(1)
Mi kim in neihsa khat peuhpeuh ama aipeng in nei tuam thei a, mi dang tawh
kipawlin zong nei khawm thei hi.
(2)
Kuama i neihsa lamsa, thu kician om lopi-in, diktat lo takin mawk suhsak theih
hilo hi.
Kumpi Masa 21:1-5 “Tua laitakin Jezreel khuami Naboth in
Samaria kumpi Ahab' kumpi inn gei-ah leenggui lo khat nei hi. Hih thu teng khit
ciangin Ahab in Naboth kiangah, “Ka inn tawh kinai ahih manin anteh huan dingin
ka neih theihna dingin na leenggui lo hong pia in; keimah in tua tangdingin
leenggui lo hoihzaw khat kong pia ding hi; ahih kei leh zong nang-a' dingin a
hoihzawk ding leh a man ding sum kong pia ding hi,” a ci hi. Ahih hangin Naboth
in Ahab kiangah, “Ka pu ka pate' gamh nang tungah kong piak ding Topa in hong
kham hi,” a ci hi. Tua ciangin Jezreel khuami Naboth in ama tungah a thugenna
hangin hehna leh maikhin'na tawh Ahab a inn-ah ciah hi; bang hang hiam cih leh
amah in, “Ka pu ka pate' gamh nang tungah kong pia kei ding hi,” ci hi. Amah a
lupna tungah lumin a mai hei a, an nelo hi.”
Hih
Laisiangtho mun sungah Kumpi leh a zi (Jezebeel) in Naboth sihna ding gel,
(that) uh a, Naboth neihsa lenggah huan a sut sak uhhi. Naboth neihsa lenggah
huan a kisuhsak khit ciangin Pasian in Kamsang Elijah sawl in Kumpi Ahab
thuhilh sak hi. Hih mun ah, minau tang khat i neihsa zawhthoh thu tawh
suhsakna, a hoih lohna i mu hi.
Mizawng
daipam khat a hi phial zongin neih leh lam neih theihna ding, kuamah in mawk
sut theihloh na ding a kilat na khat a hihi. A mau neihsa tek pen zuak nop leh
zuak theihna, zuak nop kei leh zong zuak loh theihna nei hi.
Thukhil
(Article)-18
Mi
kim in thu ngaihsut theihna, thu khentat theihna leh biakna tawh kisai
suahtakna ngah hi. Hih suahtakna in biakna leh upna khek theihna zong huam a,
biakna le upna tawh kisai thuhilhna, zuihna, paaina leh zehtanna zong tangpi
tangta mai-ah sep theih bawl theihna ding thu a ngah ban-ah, a simtham in a mah
guak in bawl theihna leh mi dangte tawh kipawlkhawm in a hi zongin sep theihna
ding suahtakna zong huam hi.
Luke 9:49-50 Tua ciangin Johan in, “Topa aw, nangma min tawh dawi a
hawlkhia mi khat ka mu uh a, amah pen eima pawl sungah a om hilo ahih manin ka
kham uh hi,” a hong ci hi. Ahi zongin Jesuh in ama kiangah, “No hong
langpanglote note' pawl ahih manin kham kei un,” a ci hi.
Hih
sungah “Jesus tawh kipawl tektek hita kei leh, Jesus min zang a nasem mite Jesu
in khamlo hi. A man min zat ding leh a ma min tawh nasep ding pen Jesu kihong
mahmah lel hi. Jesu in no hong langpang lote note’ pawl a hihi, a cih pen
“Kitheihsiamna (tolerant), lungduaina, midangte (kipawl pihloh mite tawh zong)
na sem khop theihna ding lampi kong kihonna a hi. Ei pawl a hih tektek loh
hangin hong langpan kei nak leh ei pawl, nasep pih bang a koih ding ngimna khat
a hihi. Midangte upna zong a mau a ding a gal i hih loh ding cihna zong hilai
hi.
Thukhil
(Article) –19
Mikim
in a ma deih bang ngaihsut theihna leh ama hoihsak bang a pulak theih na ding
suahtakna ngah hi. Hih suahtakna sungah kinawngkai sak selo a, mi dang’ thu san
theihna ahi zongin, gamgi ciangtan omlo in thu kizakna khat peuhpeuh tungtawn
in mi dangte ngaihsutna leh thu khat peuhpeuh zon theihna, ngah theihna ban-ah,
amahmah in tua thute hawmkhiat theihna zong huam hi.
Ephesa 4:25-29 Tua ahih manin zuau gen nawn kei un
la, Khrih pumpi nate ihihna hangin pawlkhat ihih manin khatlekhat tungah thuman
kigen ni. Na heh uh ciangin, tua hehna hangin khialkha kei un la, a tawntungin
heh paisuak kei un. Dawimangpa in hong suksiat theihna ding hun omsak kei un. Guta
ngeite in gu nawnloin, ama nuntakna ding thuman takin thalawhin, mizawngte zong
a huhtheih laina dingin thatang tawh nasep ding kipan ta uh hen. Na kiho uh
ciangin kamguh zang kei un la, na pauna uh a za mite in phattuamna a
ngahtheihna dingin na-in a kimang kam hoihte bek na pau un.
Hih
laisiangtho mun ah, thugenna, pulakna te tawh kisai neih ding khamlo hi. Thu
ummi te a dingin kammal pen vang nei mahmah leh thu nei mahmah hi. Mihing pen
thu gen theihna nei hi, a hizongin zuau gen ding kideihlo hi. Hehna pulak ding
kikhamlo hi, a hizongin kilem kikna zon ding kideih hi. Thu gen theihna om hi,
a hizongin mi gensiat ding kiphallo hi. Kam khum, kamnem tawh kiho, itna leh
hehpihna kilah ding kideih hi. Suakta tak a genna pen mi khat siatna ding hilo
ding thupi hi.
Thukhil
(Article)- 20
(1)
Mi kim in suakta takin thu dam tawh khawmpi vaihawm theihna leh kipawlna bawl
theihna hamphatna ngah ciat hi.
(2)
Mi khat pen kipawlna khat peuhah kihel hamtang ding hi cih teitei theih hilo
hi.
Acts 2: 44-47 Thu um khempeuh kikhawlin omkhawm uh a, a neihsate uh zong
a neikhawm uh hi. Amaute in a neih a lamteng uh zuak uh a, a sumte pen amau
kisapna tawh kizui-in amaute lakah a hawm uh hi. Nisimin biakinn-ah kikhawm uh
a, a innte uhah an nekhawmin, lungdamna leh kiniamkhiatna tawh a ne ciat uh hi.
Pasian phat uh a, khatlekhat thupha kideihsakin a om uh hi. Pasian in nisimin
hotkhiatna a ngah mi kibehlapsak tawntung hi.
Sawltakte
nasepna sungah, Pentecost ni in (Pawlpi kiphut cillai in) thu ummite kipawl khawm,
kikhawm khawm uhhi. Kua mah in nawngkai saklo, buaisak lo uhhi. Jesu in zong
lungdamna thubu sungah a kineng cip mite suahtakna ding thu na tangko hi. Cih
nopna ah, Pasian in mi khempeuh suahtakna ding a deihna kilang hi.
Thukhil
(Article)- 21
(1)
Mi kim in ama gam kumpi i vaihawmna ah a ma mimal in ahi zongin, suakta tak a
kiteel mite zangin ahi zongin kikum theihna hamphatna ngah hi.
(2)
Mi kim in a mau gam sung kumpi nasepna-ah mi dangte mah bangin a sep theihna
ding hamphatna ngah hi.
(3)
Mipite’ deihna pen kumpi i thuneihna in bulphuh tawntung ding hi. Tua pen a man
tak leh a hun lianlian a leitung bupah kiza kim a kizang kiteelna tungtawn in a
sim tham a vote khiatna, leh tua mah tawh a kibang suakta tak a vote khiat ngeina
khat zang a kiteelna tawh ki-en ding hi.
Thuhilh kikna (Deuteronomy) 1:9-15 “Tua hun laitakin note kiangah, ‘Kei
guak bek in note kong enzo kei ding hi. Topa na Pasian un note tampi hong
phasakzo hi. En un, note tuhunin vantung aksite zahin tampi na pha uh hi. Topa,
na pate uh Pasian in tu-a zah tulin note hong bawl hen la, note tungah hong
ciamsa bangin thupha hong pia ta hen! Kei guak in note' thu kineihnate
sian'sakna ding tavuan lianpi bangci puakzawh ding ka hi hiam? Na minam uh tawh
a kizui-in a pil, thuthei, thuphawksa mite teel un la, note' lutangin amaute ka
koih ding hi,’ kong ci hi. Note in, ‘Nangma hong gen thu pen kote-a' dingin
hoih hi,’ ci-in nong dawng uh hi. Tua ahih ciangin na minam lutang uh ahi, a
pil thu phawksa mite ka la a, note' tungah lutangin a tul uk, a za uk, a
sawmnga uk, a sawm ukte, leh uliante na minam khempeuh sung uhah ka koih hi.
Hih
laisiangtho mun sungah Isarael mite tam semsem a hih manin Moses bek in makai
zo nawnlo a, namphung (tribe) zui in makai teel sak in, thu buai a veng sak
ding ukna leh thu neihna a kipiakna i mu thei hi. Tua bang kitelna pan in Mosi
in a thuneihna mipi makaite tungah hawmzakna cih i mu a, tua kitelna pen
namphung sung pan mipil leh siamna, mi muanhuai teng kitel a hihna i mu thei
hi. Hih thukhil in Mosi (uk cipna) pan in democracy khaici tuhna a hihma i mu
thei hi.
Tua
kitelna ah, namphung (tribe) bulphuh a kitel hi a, ei leh ei hong uk ding
mitelna kipatna, laisiangtho pan ki mu thei hi. Tua sungah zong mi a telthei
ding kikhenna omlo hi.
Thukhil
(Article)- 22
Leitung
mihing khat hihna tawh mi kim in lungmuang tak a nuntak theih na’ng hamphatna
ngah hi. Tua pen mihing khat a hihna tawh kisai suakta tak a, a khantoh na ding
leh vaang a ngah nadingin a lo theilo a kisam nek leh dawn, sum leh pai,
tualsung kipawlna leh ngeina tawh kisai hamphatnate pen ama kumpi-gam i neih
leh lam pan ahi zong, kipawlna paizia tawh kituakin gam khat i hanciamna leh
gam tuamtuam kipawl khawm a na sepna tawh ahi zongin a tangtun sakna ding
hamphatna ngah hi.
Genesis 1:28 Pasian in amaute thupha pia a, Pasian in amaute tungah, “Ci
pha-in tampi pha un la, leitung dim in zo un. Tuipi ngasate tung, leitungah a
gamtang, a nungtate khempeuh tungah ukna nei ta un,” a ci hi. Pasian in, “En
un, leitung maitang khempeuhah a om, tang a piangsak kungnote khempeuh leh a
gah sungah tang a om singkung khempeuh note tungah kong pia khinta hi.
Pasian
in leitung mihingte a bawl a kipan in, a kipiang sak nate, singkung lopate leh
na khempeuh tungah thu neihna leh ukna a nei dingin thupia, bawl hi. Hih mun a
thuneihna ukna tawh kisai in tel khialh loh ding ah, mawhpuakna lakna
(accountable) omlo a, ukna hilo a, leitung a teng (na khempeuh) a hoih zawkna
dingin ukna neih ding cih lam a hihi. Mihing leh society zong thu neihna ah tua
bangin ukna leh thuneihna zat ding kisam a hih lam telsiam kul hi. Kumpi leh
ukna nei khat peuh in zong ukna te ah mite leh leitung a teng na khempeuh
hoihna ding sep ding mawhpuakna nei hi.
Thukhil
(Article)- 23
(1)
Mi kim in nasep na a neih na’ng, a mau sep nopna lam teel theih na’ng, nasepna
tawh kisai mun hoih leh thudik a hih na’ng, nasepna pan kimawk tawpsak ziauziau
theihna pan kihut theih na’ng hamphatna ngah hi.
(2)
Mi kim in kideidanna omlo in na sep kibang sepna pan in a kikim khasum ngah
na’ng hamphatna ngah hi.
(3)
Nasep nei mi kim in amah leh a innkuan pihte tawh mihing ngeina bangin, a
kilawm a kituak vaang a neih nading leh a kisapna zui-in tangpi kihutna a ngah
behlap theih nading hamphatna ngah hi.
(4)
Mikim in amau metna leh noptuamna a hutna dingin sumbawl kipawlna phuan theihna
leh pawlmi suah theih nading hamphatna ngah hi.
Luke 10:7 Nasemte in a thaman a ngahding a kilawm ahih mah bangin na
zintun'na inn mah uhah omsuak un la, a hong piak peuhpeuh uh na ne un. Na
zintun'na inn uh kheel themthum kei un.
Pasian
in mihingte a bawl cil a kipan in nasem ding, na sep thaman ngah dingin na
bawlna Eden huan sungah kimu thei hi. Huan cingin singgah ne thei ci hi. Hih Laisiangtho
mun ah Jesu in a nungzui mite zong nasem dingin a sawlna, Pasian thu tangko
dingin a genna i mu hi. Mi khempeuh in na sem thei ding a, na sep thaman kipia
tek ding cihna a hihi. Thaman kipia lo pi in na sem mi omlo ding a, a sepna
thaman tawh a mau leh a innkuan pihte khempeuh in a thaman ne thei ding hi.
Thukhil
(Article)- 24
Mi
kim in nasep hunsung a kilawm ciang nai ciangtanna leh a hunhun a khasum tawh a
khuan ngah a, tawlngak hun leh tawldam hun ngah na’ng hamphatna ngah hi.
Genesis 2:1-3 “Tua ahih ciangin vantung, leitung, leh a sunga omte
khempeuh kiman khin hi. Ni sagih ma-in Pasian in a nasepte zo khinta a, ama
hihsa nasep khempeuh panin ni sagih ni-in a tawlnga hi. Tua ahih ciangin Pasian
in ni sagih ni thupha pia-in siangthosak hi. Bang hang hiam cih leh pian'sak
nasepna ama nasep khempeuh panin tua ni-in Pasian a tawlnga hi.
Pasian
in piansakna hun a zawh tak ciangin “tawlnga” hi. Pasian in a sepsa, a bawlsa tungah
lungkim in a tawl ngak bangin mihingte zong sepna pan in tawlnga ding lunggulhna
i nei tek hi. Judah mite laisiangtho sungah Sabbath ni in tawlnga in hun nuam
zatna ding thupi gen mahmah hi. Tawlngakna leh hunnuam zatna pen midangte tawh
kizopna, veng leh pam mite tawh kizopna ding deihna leh mihing nopsakna ding
deihna a hihi. Tawlngakna ni ding a om theihna dingin hi a, nasep hun sawt lua
lo ding, a kisam bangin khuan ngah theih ding gel ding kisam hi.
Thukhil
(Artilce)- 25
(1)
Mi kim in amah leh a innkuanpihte’ cidam nading leh nopsak nading a kisam
khempeuh, annek tuidawn, puansilh nikten, tenna giahna, zatui zaha kikepna leh
lungnop nading a kisam tuamtuam dongin ngah theih na’ng hamphatna ngah hi. Tua
banah, nasep neih lohna, cidam lohna, sepzawh bawlzawhlohna, meigonna, tek leh
guaina akipan ama thu a hilo haksatna khat peuhpeuh a tuah hun nangawn in kikep
zawh nading hamphatna ngah hi.
(2)
Nupi leh naupangte in a vou zaw in kikepna leh kihutna ding hamphatna ngah hi.
Nupa ngeina sung pan a suak hita leh, nupa ngeina bang a kitenglo sung pan a
suak hita leh, nausuak khempeuh in a kibang in kep leh khoi ding hamphatna ngah
ciat uhhi.
Luke 10:29-34 Ahi zongin Thukham hilh siapa amah kitangsak nuam ahih
manin Jesuh kiangah, “Ka vengte i cih kuate ahi hiam?” ci-in a dong hi. Jesuh
in dawng a, “Jerusalem panin Jerikho khua-ah mi khat paisuk a, lamkalah
migilote in na suam a, a neih khempeuh laksakin a satgawp khit uh ciangin nusia
uh a, a si dektaksa-in a paisan uh hi. Tua laitakin siampi khat tua lampi
tawnin hong paisuk a, amah a muh ciangin lamnawl lam tawnin a paisan hi. Tua
ciangin Levi mi khat zong tua mah bangin hong pai a, amah a muh ciangin lamnawl
lam tawnin a paisan leuleu hi. Ahi zongin Samaria mi khualzin khat, tua lai mun
hong tungin a liampa a muh ciangin hehpihhuaisa a, a kiangah va pai-in a
liammate sathau leh leenggahzu a nuhsak khit ciangin a tunsak hi. Tua ciangin a
la tungah tuangsak a, zintun' inn khatah paipihin tua lai-ah a khoi hi.
Samaria
mihoih pa tangthu gentehna i et ciangin veng leh pam, mihing pihte a huh ding i
deihna Jesu thugen tehna a hihi. Samaria mite pen tua hun lai in a kipuakoih
mite a hihi. A hizongin Samaria mite mi cimawh khat, a kisapna – an nek leh
dawn, belh ding inn leh zatui zaha piak ding na gel hi.
Hih
thukhil i et ciangin mihing khat a min piang khempeuh in nisim a kisap an leh
tui, silh leh ten, inn leh lo, zatui zaha pen a kisapna zui in ngah theih na
ding hong kawk muhhi. Tua bangin mihing hihna tawh kineu sekna omlo in I kihuh
tek ding deihna a hihi.
Thukhil
(Article) - 26
(1)
Mi kim in pilna zon theih na’ng hamphatna ngah hi. Kibul patna sang leh a bulpi
siamsinna sang ciang peuhmah a sap omlo in kahsak ding ahi hi. Kibul patna sang
ciang pen kuamah peuh pello in kah hamtang ding hi. Set lam siamsinna leh
kivaakna ding siamsinna pen mi khempeuh in a ngah kim na’ng kivaihawm ding a, a
sang zaw siamsinna zong amau theihna leh siamna tawh kituakin mi kim in a ngah
theih nangin kivaihawm ding hi.
(2)
Siamsinna in mihing khat a cingtaak a, a khantoh na’ng, suahtakna bulpi leh
mihing hamphatna bulpite in a mainawt na’ng in ngimna nei ding hi. Tua banah,
Leitung kumpi tuamtuam sungah biakna leh minam vai kikal ah khat leh khat
lungsim kimuhna, lungduaina leh kilawmtatna in mai nawt a, kilemna a om zawh na
dingin UNO i sepna leh bawlnate mainawt na’ng hanciam ding hi.
(3)
Nu leh pate in tate tungah bang pilna nam guan ding hiam, cih thu tawh kisai
in, khentat theih na’ng hamphatna ngah masa uhhi.
Luke 2: 46-47 “A ciahzawh uh a ni thum ni ciangin biakinn sungah amah mu
uh a, siate lakah tu-in a thugen uh ngai-in, thu zong dong zelin a om a mu uh
hi. Amah in pilna tawh thu genin a dawn'na a za mite khempeuh in lamdangsa
mahmah uh hi.
Jesu
kum 12 a phak in Biak inn sungah Pasian thu thuk tampite deihna nei in, pilna
tawh thu a dot, a ngaihna kimu hi. Jesu in Pasian thu pilna neih a thupi na
hong lak a, mite in zong i nuntakna a ding pilna a kisampa i thei hi.
Hih
Thukhil in Mihingte pen pilna lo tawh khanglian zolo, palhkhia zolo a hihna i
muh bangin pilna ngahna ding tang lang pan a sangzaw siamsinna dong i neih tek
ding deihna hong lak hi. Tua pilna in mihing thutheihna khangcing sak a, mihing
in midangte tungah mawhpuakna i neihte zong hong telsiam sak hi.
Thukhil
(Article) – 27
(1)
Mi kim in a kim a pam a om tualsung, gamsung a om ngeina leh tatdan zuih theih
na’ng, khutsiam pilna sungah gualnopna ding leh science pilna pan kingah
mainawtna leh metnate kihawm in ngahna ding hamphatna ngah hi.
(2)
Mi kim in lai tawh kisai, khutsiam pilna tawh kisai, science pilna tawh kisai
in ama’ bawlkhiatna pan noptuamna leh minphatna a ngah dingte phatak a hutsak
ding hamphatna ngah hi.
Exodus 25:1-9 “Topa in Moses kiangah, “Amaute in kei-a' dingin biakna
hong paipihna dingin Israel mite' kiangah gen in. A pia nuam mi peuhmah tung
panin kei-a' dingin biakna na sang ding hi. Amaute' tung panin na san' ding
biakna hih bang ahi hi: Kham, ngun, sumngo, a dum, a dupsan, a ausan puante leh
a kopin a kikhuk khau tawh a kigan puan hoih, keelmul, a kisansak tuutal vunte,
keelvunte, singkha sing, meivakte-a' ding sathau, nilh sathau ding leh
paknamtui dingin a namtui nate, siampipuan leh awmdal-a bulh dingin onik
suangte ahi hi. Amaute' lakah kei ka om theihna dingin kei-a' dingin biakbuk
khat amaute bawlsak in. Biakbuk leh a nazatte' lim ding tawh kisai-in nang'
tungah kong lahte khempeuh tawh kituakin nangmah in na bawl ding hi.
Hih
Laisiangtho mun sungah Moses in Pasian biakbuk bawl zia ding a genna a hihi.
Pasian biak buk bawlna ah numei pasal a kikim in vaipuak kipia hi. Biakbuk
bawlzia ding, zepzia ding pen Juda mite ngeina bangin “a mau i minam ngeina”
bangin zep ding kisawl hi. A mau minam ngeina zang thei uhhi.
Mark 5:25-34 sungah “Dam utna tawh Zeisu puan a lawng mikhat, in damna a
ngah ciangin khotang nuntakna (society) sungah kihel thei ta hi.
Hih
thukhil in mihing khat pen society sungah kihel theihna dingin hamphatna i neih
ciat lam hong gen hi.
Thukhil
(Article) – 28
Mi
kim in gam sung leh leitungbup ah hih Tangkona sung a kigen suahtakna leh
hamphatna a kicing takin a ngah theih nading hamphatna ngah hi.
Isaiah 65:17-25 “Keivom leh tuuno in an nekhawm ding
uh a, humpinelkai in bawngtal bangin buhkung ne ding hi. Leivui pen gulpi' an
hita ding a, mite hong tu nawnlo ding hi. Keima mual siangtho tung tengah a
maute kiliamsaklo ding uh a, kisusialo ding uh hi, Topa in ci hi,” a ci hi. *
A
kipiang sak mi khempueh in thukhil sunga kigelh thute a kizatna ah nopsak
theihna ding a neih bang un, laisiangtho in zong tuabangin nun thak a pianna
ding ngimna na ngei hi.
Mangmuhna 21: 1-4 John in van thak leh leithak a pian
ding a gen bangin tua sunga om mite in ki-itna, kilemna leh kingaihna bulphuh
ding cih a hihi. Hih thukhil in Pasian deihna a hi, unau banga ki-et theihna
ding society a pianna ding a gen bangin mihingte lam pan in zong a kisapna I mu
hi.
Thukhil
(Article) -29
(1)
Mi kim in mihing khat a hihna pen suakta tak leh cingtaak taka a khangcin zawh
na’ngin ama omna gam sungah vaipuakna nei hi.
(2)
Mi kim in a ma’ suahtakna leh hamphatnate zat na’ng, ngah na’ng tawh kisai-in,
mi dangte i suahtakna leh hamphatna te zahtaksak ding a, democracy thuguipi zui
a vaihawmna tawh kilawm kituak in a sia a pha khentel a gamtat ding, tangpi
tangta in lungnop daihna a ngahna ding leh khuasung gamsung ah nopsakna a om na
dingin thukhun phalna a om ciang bek in gamtat ding a hihi.
(3)
Hih suahtakna leh hamphatna thute pen UNO’ ngimna leh thubulpite tawh ki-elpuak in bang thu bangla ah zat ding
hilo hi.
Micah 6:8 Mun khempeuhah a om no mihingte aw, Topa in a hoih nate
hong gen khinzo hi. Topa in note tung panin hong kalh thu in: Thuman thutang
sem ding a, itna kip nei tawntungin, kiniamkhiatna tawh Pasian' thu man' ding
ahi hi.
Mihing
khat a khangcing na ding, a picinna ding in society kisam leh thup pen khat a
hihi. Hih thukhil in mihing khat a hoihna ding leh a siatna ding midang khat in
vaipuak I neihna hong kawk muhhi. Mihing khempeuh pen khat leh khat kizopna nei
ciat hi a, tua kizopna zui in nasep leh nuntakna a zong tek i hihi. Mihing
dangte hoih zawkna dingin ei ma hamphatna a khengval a i zatloh ding thu nih om
hi. 1) A hong kipia hamphatna khempeuh sunga ei bangin midangte zong a kikim
hamphatna sungah nuam a sak theihna ding leh 2) Mihingte san theih sia leh pha
theihna khengval a gamta lo in mipi hoih zawkna ding a gamtatna a neih ding
kisam hi.
Laisiangtho
in thutanna, diktatna leh daihna tawh kidimlo na munte ah mihing khat i
suahtakna mawkzat loh ding hong hilh hi. Kamsang Micah in Thudikna Justics pen
a kisam pen a hihna h ong lak hi. Tua Justics ngahna dingin Political leh religious
kipawlna in a nasep nate sittel ding kisam hi. Laisiangtho sungah Pasian tawh
kilemna, thudikna i lam khiat theihna dingin mikhempeuh in vaipuak leh mawhpuak
i neihtena hong kawk muhhi.
Thukhil
(Article)– 30
Hih
Tangkona sungah thu khat peuhpeuh pen hih sunga kigen suahtaknate leh
hamphatnate suksiat nopna lungsim tawh Kumpi khat in ahi zongin, mi pawlkhat in
ahi zongin, mi mal khat in ahi zongin na sem a, gamtat na’ng in bangmah
deihkaih tawm ding hilo hi.
Proverbs 2:1-11 “Ka ta aw, kong thuhilhte mangngilh
kei in la, kong thugente phawk tawntung in. 2Kong thuhilhte in na khan' hong
sausak ding a, hong daupaisak ding hi.
Hih
laisiangtho sungah “Ka hong thuhilhna leh thugente na zuih leh Pasian in pilna
leh thuman lampi ah hong kha ding cihna a hihi.
Hih
Universal Declaration of Human Rights (UDHR) thupuan pen biakna pawlkhat bek
tawh kituak a kibawl hilo a, Pasian bawlsa mite tawh kituak dinga kibawl a
hihi. Thu um mi, thu umlo mi a hizongin hih sungah thutang leh thudik mu a hih
manin zuih ding lunghianglo uhhi.
Christian
biakna a bia mite in hih thupuan sunga kihel thu khempeuh pen Laisiangtho i thu
guipi tawh a kituah a kigelhna a hihna i etkak bangin mihing nuntakna a hoihsak
zaw ding a hihna i mu hi.
August
1, 2020
