Piang lui, Piang thak leh Piang khial

Theih ding: Hih lai sungah a ki gelh thute in mimal, pawlpi leh paizia, tawnzia khatpeuh ko nopna hilo a, muhna pulakna leh genna bek a hihi. Kua mapeuh in mimal leh pawlpi tawnzia, paizia te dona in hong lak sak kei un: Lai gelh pa

Thu masa:

Hih lai sungah biakna thu ka cih ciangin Zomi a tamzawte biakna a hi, Christian biakna gen ka hih manin i gamsungah Christian hong tun pan i upna, sandan leh paiziate a gen nuam ka hihi. Christian biakna i gam-ah hong tun mahun in, i pu leh pate kithoihna, biakna leh sandante a kisapna munte bek ah i tak lang ding hi. Tu hun laitak a i gam a om biakna tuamtuam a hi, Buddhism, Islam leh Laipian biaknate bulphuh in lai gelh hilo ka hih manin tua biaknate tawh kituaklo thu a om leh zong theihsiamna i kingen hi. Christian biakna sung mahmah ah zong tangthu kicingin kigen zolo ding a hih manin leh pawlpi khatpeuh, mimal sandan khatpeuh a bukim in kisut zolo ding-a, upzia sanzia kibatlohna a om leh zong ki maisak ni. Mimal muhna bek bulphuh a kigelh hi a, pawlpi khat i upna laigil kibulphuh hilo hi. Christian biakna sungah thu upna, sandan leh a nungta Pasian maipha zonnate a hunhun in kikhek toto a hihna thu i taklat nopna le i gen nop bulpi hi zaw hi.

Biakna sungah Politics

Thu masa:

Biakna sungah Politics cih thulu i muh tak ciangin, i lungsim sungah a sianglo thu khat ngaihsutna om pahlian thei hi. A hangin biakna pen Pasian biakna leh paiina tawh kisai thu bulphuh a kivai hawmna mun le phual in kitel (understood) a, kha nuntakna ding zonna munin a kisan man ahihi. Politics leuleu ciangin leitung a om Pasian bawlsa nuntakna nei khempeuh hinkhawm, ten khawm theihna ding tawh kisai vaihawmna thu in ki mu hi. Hih thu nihte gel i et takciangin a ki kelki (ki-el puak) thu bangin kimu a hih manin bang hangin kisai kha thei ding hiam cih lungsim ngaihsutna ah om a hihi. Tua ngaihsutna in a thu guicing in i telloh man a, mite uanggen (exaggerate) na hangin hih bang ngaihsutna a nei zong i hi thei hi. Thu kihual nih a kigawm khop pen thahatna a piansak hangin thu ki-el puak (ki kelki) nih a kituah khak tak ciangin puahkhapna piang thei a hih manin biakna sungah politics cih pen a lauhuai thu ci leng kikhiallo kha ding hi. Thu paidan ding bang takin a pailo thu hi cileng zong man ding hi.

21st Pinlong or Satan kikimna lam ah..

Kawlgam in gam ki-uk zia khel ding leh gam khantohna lam manawt ding ngimna tawh kum zabi lang (half century) bang khit ciang a mipi deih tel tawh kilam khia a kumpi sem, National League for Democracy (NLD) makaihna i gam suahtak a ngah ding hun a Pinlong thukimna tawh kibang khat (or) 21st century Pinlong khat bawl ding a hong tangko ciang in Kawlgam sung a teng minam neu khempeuh in ki thoi kholhna dingin kam kupna nei in khawmpi kibawl pah ngeingai hi. Gamsung ah thautawi a minam kipawlna pan a hi zongin, thautawilo minam nasem party tuamtuam te a hizongin 21st century Pinlong ciang a thu sun ding kiging khol tek hi. Kawlgam sungah minam a ding nasem khempeuh lam et penpen kongvang (opportunity) khat hong suak a hih manin tua mun ah minam khempeuh in gam kilam zia ding, gam kivai hawm zia ding lunggulhna leh muhna sun tek theih thupi mahmah hi. Hih 21st century pan in zong Kawlgam sungah minam khempeuh in a neih gam hauhsakna ( leisung sum piang leh sum bawl paii bawlna) khantohna ding leh gam sung ah kilemna taktak om in leitung gam dang leh minam dangte khantohna tawh kiton in kalsuan khop theihna ding kalbi ( step) khat zong a hih manin gah mahpha hong gah ding lam-etna tampi om hi.

Gim neihna (Stereotype/ prejudice attitude)

Mikhat peuh tung panin "hih mipa/ minu ka muh cil a kipan in en thei het keng" cih kammal ki za ngei tek kha ding hi. Za ngei bek hilo in, mi pawlkhat bangin mi thak khat a muh tak teh, "hih mipi / mi nu pen a mel puak dan mahmah zong tua ci in teh" cih bangin upmawh thu kigen thei hi. Mihing khat leh khat ki mu ngei nailo, thu leh la kithei ngei nailo, khatvei zong kiho pih ngeilo pen a pianzia ding upmawh thu tawh mi hoih hi, mi hoihlo hi cih genna pen i lungsim tawng pan hong kipan gim neihna lungsim a hihi. Lungsim puak zia kitello, gamtat khohek zia theih ngeihloh leh misia mipha theih ngeiloh hangin a ma mel leh puam, ci leh sa puak zia leh a ma i khang thu (hong kipat khiatna thu) te tawh enkak a mihing pianzia ding genkholhna pen mihingte lungsim gim neihna pan bek hong kipan a hihi.

Khanmawh bawk (Nekgukna leh golhgukna)

Kiamsuk lam sangin khantoh lam ma-nawh leng ki-ut zaw tek hi. Siatna lam sangin hoihna lam ah min ngah leng kilung gulh zaw tek hi. Zawnna sangin hauhna lamah manawt ding lampi kizong tek hi. Natna pan damna i ngahna dingin kikem kikhoi-in i om hi. Tulaitak a, i dinmun panin nunglam kalkhat suankik sangin mailam ah mainawt ding, kalsuan khia ding cih i ut pen tek a hihi. Sum pek khat i neihna panin pek sawm neih theihna ding, pilna ah high school panin college ah, college pan in university ah cih bangin kalsuan toh ding pen i ut pen tek a hihi.

Laisimna i manphatna

Laisimna (reading/informal education) leh sanglai simna (formal education) pen kinai mahmah na pi'n a kibatlohna om kiukiau se hi. Laisimna i cih tak ciangin informal education lam kawk zaw a, pilna leh siamna sinna sangpi (college/universities) te ah kah ta kei leng thu theihna leh pilna(knowledge and wisdom) a kingah thei a hihi. Sanglai simna ( formal education) lam leuleu pen theihna leh pilna ngahna ding in lampi sialna khat zui a sinna lam kawk zaw hi. Theihna leh pilna ngahna dingin laisimna or sanglai simna te khat zawzaw, a hih kei leh a nih in zong kingah thei hi. A lampi a kibat loh deih hangin a gah pen pilna leh theihna hi a, kibang hi. Gentehna in leitung mihingte'n i phawk gige ding mi pawlkhat a hi 1) Albert Einstein a hi zongin, 2) Bill Gates a hi zongin, 3) Jack Ma a hizongin a maute in sanglai simna ( formal education) pen mi dangte zah ding a tawp dong tunlo na pi'n a nuntakna uh ah lawhcinna nei veve uhhi. Cihtak ciangin "sanglai sinna ( formal education) lo tawh zong kilawh cing thei lua, sangkah thupi kei" cihna lam hilo zaw a, sanglai sinna (formal education) i tangtun loh hang in laismna (reading) tungtawn pan in pilna leh theihna tampi kingah thei veve hi cih a gennuam hi zaw hang.

Mansakna leh Hoih gamtatna (legality and Morality)

Thukhun tawh mansakna kibawl thu khempeuh thuman leh thuhoih hi khin hetlo hi. Thukhun leh paizia bawl pen mihingte hi a, a kicinglo mihingte khutma pen khialhna tawh kipelh thei denlo hi. Hun masa lai in mi honpi sangin mikhat pen lianzaw den leh pil kisa zaw den a hih manin midangte zuih ding thukhun pen a mah bek in bawl ziau den hi. Mipite'n zong hoih hi, hoihlo hi ci'n dotna om sese lo in, zuih ding mah in kisang pah lel hi. Hunthak lam ciangin mi honpi leh ngaihsutna thak hong khangkhia a hih manin mikhat sangin mi tamzaw hoihzaw hi, cih ngaihsutna bulphuh in, a tamzaw thukimna tawh thukhun kibawl a, vaihawmna kinei hi. Mikhat bek bawl tawh vaihawmna hita leh, mi a tamzaw deihna tawh vaihawmna hita leh a bawlte pen a kicinglo mihing vive a hih manin "a khut ma" pen khialhna tawh kipelh thei tuan hetlo hi.

Mikangte Pasian up zia leh Zomite Pasian up zia

Thugen siam pawlkhat in Mikang gamah Pasian upna kiam mahmah a hih manin a maute a khanglo sak kik dingin ( missionary a sem kik ding) Pasian in Zomite mikang gam ah hong puak hi, ci'n a hon g gen tak uh ciangin thu ngai/za mipi ten, " hi ei!" ci ngeingai in kithu kim mahmah hi. Pasian thu upna pen mikang mite sungah a beisa hun lai sangin nakpi tak in kiam zaw cih pen san theih hi. Pasian upna pen mikangte in Zomite hong hilh masa zaw uh hih man in a beisa hun in ei' sangin a maute upna sungah hatzaw uh cih pen nial theihlo a hihi. Hih mun ah i gen ut pen tak a hi, " Pasian thu upna leh Pasian thu upzia" pen kibang linlian lo hi. Upna ka cih ciangin Pasian na muanna zahzah leh na ki apna zahzah a gen nuam (grammar danin gen leng noun ) a hihi. A hizongin upzia pen Pasian na upna panin Pasian leh a MA minthanna dingin na upna khaici na tuh zahzah, na upna na lahkhiatna a gen nuam ( grammar dan in gen leng Verb) a hihi.  Hih upna leh up zia pen kibang pian leh kinai mahmah a hih manin a kibang in kisang khial thei hi.

Paunak zunna: " Mite'n ka mei hong sik sak henla, ke'n a mau tu leng"

Gamsung ah gamvak mi khat in ngimna thu hilo (accidentally)  in, gul mei sikkha a hih manin a gul in a mah tu a, liamna nakpi tak in ngah thei hi. Hih kammal pen mi khatpeuh in mi dangkhat tungah a thang siah tak ciang a, kigen hi a, "paunak" cih sangin "thu gen" ci leng kinai zaw lai ding hi. Mi mawhna zon nopna, leh hih kammal zang pen mi in a mah leh a mah a kisian sak nop man a, mite khialh theihna ding mun lamah mite tui zawl bang a, a zawl thawh a hihi.

Paulap (Excuses or Justification)

Leitung ki-ukna leh vaihawmna i et kikkik ciangin mi khatpeuh in a ma-angsung ding khualna tawh a gamtatnate a selsimna ding paulap tuamtuam na zang thei gige hi. A diakin gam ki-ukna lam bang enleng, ukcippi (dictator) khatpeuh in gamsung thuneihna pen mipi thuneihna pan in a sutkhiat ut ciangin paulak kician mahmah khat na zong hamtang hi. Kawlgam tangthu a en kik hi leng; General Ne Win in gambup thuneihna (power) a sutkhiatna dingin paulap kician mahmah khat na neihi. Gamsung ah Thakhin Than Tun leh Thakhin Soe te makaihna tawh kibawl White and Red flag communist te leh tualsuak minamte thautawina hangin Kawlgam pen "ken guam sungah a kiat ing khap khat bekin a sam hita" cih paulap in a ma deih, gambup thuneihna na sut khia hi.Tua paulap pen a zat theih ding in zong tua hunlai takin tua bangin gamsung buaina a na om kha mah a, a piangthu mah ahihi. A hizongin a taktak in tua a kipaulap thu pen a dal-ut masa hi lo-in, a ma i sep nopkhat leh lunggulh khat a ngah theihna dingin a om sa thu leh a piangtakpi thu ah mipite khentel theih pak loh ding thute pen paulap ding a, a zang na hi zaw uhhi.

Thukhun (Law) pen lau kei ni

Kawlgam pan a khangkhia mikhat in, "thukhun ( laws), paizia leh sepzia ( rules and regulations) i muhdan pen uniform silh, thau tawi mite tawh kimu khawm pah a, kigap cipna leh lau huaina bangin kimu in, siatna lam kipatna lam in" ki mu hi. A hizongin gam khangto sa USA, UK cih bang gam pan a khangkhia mikhat in, tuate pen " zuih ding, mihingte a ding hoihna ding" in mu uh a, "hih pen paidan hi" ci thei uhhi. Midang tawh kikal a thu lai gen leh thu hoih ngahna dan in mu thei uhhi.

Zuihding thukhun (laws), paizia le sepzia ( rules and regulations) pen i muh dang kibang hetlo mawk hi. Thukhun, paizia le sepzia i bawl tak ciangin mikhat bek in vaihawmna hi thei nawnlo leh midangte tawh lungkihual (harmony) a nuntak khop theihna ding ngimna hi a, a tamzaw pen mihingte a dingin a hoihzaw ding ngimna hi pen hi. Mikhat leh khat kikal a kithu tuahlohna a om ciang a hi zongin, na sepna ah midangte zong gup tuam paih tuam neih lohna ding a hi zongin "thu laikim" thei pen ding a ngimna hi zaw hi.